Alkitab Mobile SABDA
[VER] : [MAKASAR]     [PL]  [PB] 
 <<  2 Samuel 13 >> 

1Absalom ana’ bura’nena Daud nia’ andi’na sitau baine ga’ga, niareng Tamar. Amnon, ana’ bura’nena Daud battu ri bainenna maraenganga, eroki mae ri Tamar

2siagang eroki angngagangi sikatinroang. Mingka anjo kammaya tena olona lakkulle lanri anjo Tamar tenapa nale’ba’ a’bunting siagang takkulleai sileporang siagang bura’-bura’ne. Tulusu’ nanawa-nawana Amnon anjo passalaka sa’genna tu’guru’ garring.

3Nia’ sitau aganna Amnon sanna’ porena akkala’na, niareng Yonadab ana’na Simea daenna Daud.

4Nakanamo Yonadab mae ri Amnon, "O, Karaeng lolo, angngapa naallo-allota kucini’ si’na kamma? Apa saba’na kutadeng?" Appialimi Amnon angkana, "Erokka’ ri Tamar, andi’na anjo sari’battangku Absalom."

5Nakanamo Yonadab ri ia, "Anu gampang sikali antu! Attinro mako ri katinroanga, siagang assara-sarai mako garring. Punna battu manggenu antoakko, angkanako ri ia, ‘Bapa’, kisurosai Tamar battu sollanna nasarea’ kanre. Punna akkullei kucini’ ampallui anjo kanrea anrinni, akkullea’ angnganre.’"

6Nampa attinromo Amnon ri tampa’ katinroanga, assara-sarai garring. Ri wattunna battu Daud antoaki, nakanamo Amnon ri ia, "Bapa’, kisurosai battu Tamar untu’ appallu kanrejawa ri dallekangku anrinni; sinampe’ nakuero’ angnganre."

7Nampa appasammo Daud mae ri Tamar niaka ri balla’ kakaraenganga, angkana, "A’lampako mange ri balla’na daennu Amnon, siagang pappalluangi kanre."

8Nampa a’lampamo Tamar mange anjoreng siagang narapikammi Amnon attinro ri katinroanga. Angngallemi Tamar sike’de’ labu’ nileo’, nampa appasadia kanrejawa nilangga ri dallekanna Amnon.

9Le’baki anjo napasulu’mi anjo kanrejawaya battu ri pancia nampa napatala. Mingka taerokai Amnon angnganre. Nakana, "Suro kabusuki taua assulu’ battu anrinni!"

10Assulu’na ngasemmo taua battu ri anjo bilika, nakanamo Amnon ri Tamar, "Erangi sikamma anjo kanrejawaya mae anrinni, ri tampa’ katinroangku, siagang sioiya’!" Namminawang turu’mo Tamar.

11Mingka ri wattunna napajonjo Tamar anjo kanrejawaya mae ri ia, nata’gala’mi Amnon anjo tuloloa na nakana, "Andi’, maeko assikatinroang siagang inakke!"

12Appialimi anjo tuloloa angkana, "Teaki’ daeng. Teaki’ passaia’ anggaukangi anjo panggaukang tuna kammaya! Anjo panggaukang kammaya ta’le’bakai nigaukang ri Israel.

13Punna kajariang anjo kammaya, kemae musti kocokko tanjakku? Nampa pole, ikau lanihina tongko ri taua anrinni ri Israel. Bajikangngang bicarai siagang karaenga, ma’nassa lanasitujui antu karaenga punna a’jaria’ bainennu."

14Mingka taerokai Amnon mannuruki, siagang lanri la’bi gassingi, napassami andi’na naagang sikatinroang.

15Mingka le’baki anjo sanna’mi birisi’na Amnon mae ri Tamar siagang anjo birisi’na la’bi lompoangngangi napangngainna ri uru-uruna. Nampa nakanamo ri anjo andi’na, "Assulukko!"

16Appialimi Tamar angkana, "Angngapa kippakamma daeng? Punna nubongka’, la’bi lompoangngangi anjo kaja’dallang kammaya na anjo kaja’dallang le’baka nugaukang sumpaeng!" Mingka taerokai Amnon mappilangngeri.

17Nakio’mi palayang kalenna nampa nakana, "Erangi anne bainea assulu’, nampa nukonci pakke’buka!"

18Nagaukammi palayanga anjo parentana. Pakeanna Tamar iamintu juba la’bu ia la’bua limanna. Anjo wattua sikamma tulolo tenayapa nale’ba’ a’bunting biasana ammakei pakeang kamma anjo.

19Nampa naboneimo au ulunna Tamar, nakekkeki jubana, siagang natongko’mi rupanna siagang rua limanna nampa angngarru’ pacce nyawana.

20Ri wattunna nacini’ Absalom appakamma anjo, akkuta’nammi ri ia angkana, "Apaka nagau’ salako sumpadeng Amnon? Sudamo andi’, tea’ mako nawa-nawai pole anjo. Sai ia daennui. Jari teako paui anne passalaka manna pole ri nai." Nampa naalleimo kalenna Tamar mae ri balla’na Absalom, siagang sanna’mi si’nana nyawana na sino nasa’ring.

21Nalangngereki Daud anjo apa kajarianga, siagang sanna’mi larrona napakamma.

22Naboli’-boli’mi larro duduna Absalom mae ri Amnon siagang taerokami angngagangi akkana lanri le’ba’na nagau’ sala andi’na iamintu Tamar.

23Ruan taung ribokoanganna appare’mi passua’-suarrang Absalom lanri anggoncinna bulu gimbala’ ri Baal-Hazor, ri ampi’na kota Efraim. Naundang kabusu’mi ana’ bura’nena karaenga.

24Andallekangi ri Karaeng Daud na nakana, "Bapa’, apparekka’ passua’-suarrang panggoncingang bulu gimbala’. Kuminasaiki’ bapa’ nakibattu todong mae ri anjo passua’-suarranga siagang sikamma tumalompona balla’ kakaraenganga."

25Mingka appialimi karaenga angkana, "Teako na’, nasaba’ punna battu ngasengi ikambe, lanisusaijako." Tulusu’ napala’ dudumi Absalom mingka tuli tena naero’ battu manggena. Nasareji bawang pangngellai.

26Nampa nakanamo Absalom, "Punna padeng kamma, kilappassammi sari’battangku Amnon angngagangi ikambe." Nakanamo karaenga, "Teami amminawangngi battu."

27Mingka lanri tuli napala’ duduna Absalom, kale’bakkanna nakellaimi Daud anjo Amnon siagang sikontu ana’ bura’nena maraenga amminawang assua’-suara’ siagang Absalom. [Nampa appatalamo Absalom kanre-kanreang ka'jala' siagang nyamang.]

28Naparentakammi mae ri sikamma ata-atanna angkana, "Parhatikangi baji’-baji’, punna nasa’rimmo Amnon angnginung anggoro’, lakusareko pammatei nampa nubuno. Teako mallakki. Inakke antanggongi anne passalaka. Pa’baraniangi kalennu anggaukangi siagang teako bata-batai."

29Nagaukammi anjo sikamma ataya parentana Absalom, nampa nabuno ke’nanga Amnon. Nacini’na anjo kajariang kammaya sikamma ana’ bura’nena Daud maraenganga massing nai’mi ri jaranna nampa lari.

30Lalang a’jappana ija ke’nanga ammotere’, nipauammi Daud ri taua angkana, "Le’baki nabuno Absalom sikontu ana’ bura’nena karaenga, manna sitau tania’ attallasa’!"

31Ammentemmi karaenga, nampa nakekke’ pakeanna lanri si’nana nyawana, siagang napara’bami kalenna naung ri daparaka. Sikontu pagawena nakkekke’ tommi pakeanna ke’nanga.

32Mingka Yonadab ana’na Simea daenna Daud nakanamo, "Karaeng, teaki’ lussakki siagang teaki’ pikkiriki angkanaya mate ngasemmi ana’ bura’neta. Poro Amnon bawang mate, nasaba’ singara’mi angkanaya iaminjo nakaerokia Absalom baku’ le’ba’na Tamar andi’na nipassa nigau’ bawang ri Amnon.

33Jari teaki’ tappakki angkanaya mate kabusu’mi ana’ bura’neta karaeng, nasaba’ ia matea iamintu poro Amnon bawang."

34Lalang anjo wattua larimi Absalom. Naciniki pajagana balla’ kakaraenganna Daud angkanaya jai tau battu anynyoloro’ battu rate monconga battua ri Horonaim. Jari a’lampami mae ri karaenga allaporoki anjo passalaka.

35Nampa nakanamo Yonadab ri Daud, "Iaminjo ana’-ana’ bura’neta karaeng! Kammatojengi apa napaua atanta sumpadeng."

36Tena nasallo le’ba’na a’bicara, antama’mi ana’-ana’ bura’nena Daud. Appakkaramulami ke’nanga angngarru’. Daud siagang sikamma ata-atanna angngarru’ tommi napakamma si’na.

37Larimi Absalom mange ri balla’ kakaraengang ri pa’rasangang Gesur, iamintu Talmai ana’na Amihur. Anjorengi ammantang tallun taung sallona. Salloi susa kamateang Daud lanri Amnon,

38(13:37)

39mingka ri tenanamo nasi’na nyawana Daud, sanna’mi nakku’na mae ri Absalom.


  Share Facebook  |  Share Twitter

 <<  2 Samuel 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel