Dual Panel1Napasse’rei Daud sikontu ana’ buana, nampa nabage a’jari pirang pa’rappungang; nia’ tassisa’bu tau nia’ todong tassibilangngang. Nampa naangka’ perwira-perwira untu’ angkapalai anjo sikamma pa’rappunganga.
2Le’baki anjo nasuromi ke’nanga maju lalang tallung pammantangngang untu’ a’bundu’, massing-massing nipimping ri Yoab, Abisai andi’na Yoab siagang Itai battua ri Gat. Nakana karaenga ri ana’ buana, "Inakke lamminawang todong siagang ikau ngaseng."
3Mingka appialimi sikamma anjo taua angkana, "Teaki’ karaeng. Nasaba’ punna tarpassa musti lari ikambe, yareka manna tawaruanaja battu ri kambe mate, tenapa nasukku’ pakkasia’na musua, nasaba’ ikatteji naboya karaeng. Ikatte sangkammaki’ sampuloa sa’bu battu ri kambe anggaranta. Nampa pole bajikangngangi akkiring maki’ bantuang mae ri kambe battu lalang ri kotaya."
4Nampa nakanamo karaenga, "Baji’mi, battu ri kau mami padeng." Nampa ammenteng ri sa’ri pakke’bu’ lompona kotaya, na sikontu pasukanga a’barrisiki assulu’ lalang siapa are pa’gompoang; nia’ tassisa’bu tau, nia’ tassibilangngang tau.
5Nampa naparentakang karaenga mae ri Yoab, Abisai siagang Itai, angkana, "Teako apa-apai anjo Absalom nasaba’ inakke." Sikontu pasukanga nalangngereki anjo parentana Daud.
6Nampa a’lampamo pasukanna Daud mange ambunduki pasukanna Israel siagang a’bundu’mi ke’nanga ri romanna Efraim.
7Nibetami pasukanna Israel ri ana’ buana Daud; teai sipato’ lompona nibetangi pasukang Israel; nia’ 20.000 tau mate anjo alloa.
8A’la’baki anjo pa’bundukanga mange ri sikontu anjo daeraya, siagang la’bi jaiangngangi mate takkurunga lalang ri romanga naia matea ri tampa’ pa’bundukanga.
9Ri wattunna nabae Absalom jaranna, ti’ring assibuntulu’mi siagang ana’ buana Daud. Allaloi anjo jaranga rawanganna poko’ kayu lompoa nabodo poko’na, sa’genna tassangkala’mo ulunna Absalom ri tangkenna anjo poko’ kayua. Jaranna lari tulusuki nampa Absalom ammantangi ta’gentung anjoreng ri tangke kayua.
10Kalase’renna ana’ buana Daud anciniki nampa nalaporo’ mae ri Yoab, angkana, "Bapa’, kuciniki Absalom sumpaeng ta’gentung ri se’reang poko’ kayu lompo!"
11Appialimi Yoab angkana, "Apa? Nuciniki? Angngapa natena nubunoi linta’? Mattantu kusareko sampulo doe’ pera’ siagang se’re passikko’ aya’ ka’de’ nubunoi."
12Mingka appialimi anjo taua angkana, "Manna pole nisarea’ 1.000 doe’ pera’ talaerokka’ ampa’risi ana’ bura’nena karaenga. Nalangngere’ kabusuki ikambe apa naparentakanga karaenga mae ri katte siagang mae ri Abisai na Itai, sollanna tena naniapa-apai anjo Absalom lanri karaenga.
13Siagang ebara’ angkana kubunoi Absalom sumpaeng, mattantu lanaassengi karaenga, nasaba’ tantu nalangngereki karaenga sikontu-kontua, kammayatompa tantu tena nalakialleia’."
14Nakanamo Yoab, "Sudamo. Poro tappela’-pela’ji wattua angngagangku a’gea’." Nampa angngalle Yoab tallu poke na’lampa ampacokai antama ri barambanna Absalom attallasaka ija anjo wattua siagang ta’gentunga ri poko’ kayua.
15Nampa nia’mo sampulo ana’ buana Yoab amborongi siagang ambunoi.
16Appasa’rami Yoab tarompe’ sa’genna ammarimo ana’ buana angngondangi pasukang Israel.
17Nampa niangka’ maya’na Absalom siagang nipasambila antama’ ri bungung lantanga lalang romang. Anjo bungunga natambungi ke’nanga siagang batu sa’genna tinggi. Sikontu pasukang Israel massing naerammi kalenna lari mange ri balla’na.
18Lalang attallasa’na Absalom le’ba’mi napambangungang kalenna se’re tugu ri Ka’bung Karaeng, nasaba’ tena ana’ bura’nena untu’ ampatulusuki jari-jarina. Anjo tugua niarengi situru’ areng kalenna, na sa’genna anne alloa anjo tugua niassengi salaku Tugu Absalom.
19Nampa nakanamo Ahimaas ana’na Zadok mae ri Yoab, "Kellaima’ lari a’lampa mange ri karaenga angngerang kabara’ baji’ angkanaya nipasalama’mi ri Batara battu ri musunna."
20Nakanamo Yoab, "Teako, ri bokopi. Anne alloa takkulleako angngerang kabara’, nasaba’ matemi ana’ bura’nena karaenga."
21Nampa nakana Yoab mae ri atanna battua ri Sudan, "A’lampamako mae ri karaenga ampabattuangi apa le’baka nucini’." Su’ju’mi anjo ataya anynyomba nampa lari a’lampa.
22Mingka napala’ dudumi Ahimaas mae ri Yoab angkana, "Manna pole apa kajariang, mingka kikellai tomma’ a’lampa angngerang kabara’." Akkuta’nammi Yoab angkana, "Angngapa naterasa’ kamma nyawanu ero’ todong a’lampa, ana’? Tena nulanggappa passawallang lanri anjo."
23Nakanamo Ahimaas, "Tena nangngapa. La’lampa’." Nakanamo Yoab, "Punna padeng kamma, a’lampamako." Jari larimi Ahimaas antulakkangi oloang allaloa ri Ka’bung Yordan, siagang tena nasallo akkullemi napilumbai battu anjo ata battua ri Sudan sumpaeng.
24Sitabangi Daud ammempo lalang ri kamara’ alla’na pakke’bu’ lompo lalanna kotaya siagang pakke’bu’ lompo pantaranna. Naiki pajagaya ri temboka nampa ammenteng ri pattongko’na anjo pakke’bu’ lompoa. Ri wattunna accini’ bella’, nia’mo se’re tau nacini’ lari battu mae.
25Akkio’mi anjo pajagaya naung ampauangi karaenga, siagang nakanamo karaenga, "Punna kale-kalennaja, mattantu kabara’ baji’ naerang." Ri wattunna a’birimmo battu anjo taua,
26nia’moseng sitau battu mae lari todong. Jari akkio’mi angkana, "Ciniki! Nia’ pole tau maraeng lari kale-kalenna mae anrinni." Appialimi karaenga angkana, "Mattantu kabara’ baji’ todong naerang."
27Nakanamo anjo pajagaya, "Anjo uru-urua Ahimaas. Naassengi atanta batena lari." Nakanamo karaenga, "Ia tau baji’. Tantu kabara’ baji’ naerang."
28Akkio’mi Ahimaas a’bari sallang ri karaenga, nampa su’ju’ siagang nakana, "Nipujimi arenNa Karaeng Allata’alata, le’baka ampassareangi mae ri katte sikamma tau angngewaya mae ri katte!"
29Akkuta’nammi karaenga angkana, "Apaka salama’ji Absalom?" Appialimi Ahimaas angkana, "O karaeng, sumpaeng ri wattungku nasuro Yoab, nia’ kucini’ karicuang lompo, mingka takuassengai angkana apa kajariang."
30Nakanamo karaenga, "Ammenteng mako ba’leang anjoreng," jari a’lampami Ahimaas ri sa’riang siagang ammenteng anjoreng.
31Nampa battu tommo atanna Yoab, siagang nakanamo ri karaenga, "Kabara’ baji’ naerang atanta untu’ ikatte karaeng. Anne alloa Nasare maki’ Batara pammetang mae ri sikontu tau angngewaya mae ri katte."
32Akkuta’nammi karaenga angkana, "Apaka salama’ji Absalom?" Nampa appialimo anjo ataya nakana, "Sikontu musunta karaeng, sikontu angngewaya mae ri katte sangkamma ngasengi sarenna, kammayatompa anjo ana’ bura’neta."
33Nalangngere’na anjo kabaraka, sanna’mi si’nana nyawana karaenga, nampa nai’mo ri kamaraka irateanna pakke’bu’ lompoa angngarru’ nakana, "O anakku! Anakku Absalom! Absalom anakku! Bajikangngang inakkemo mate ansambeangko, anakku! Absalom, anakku!"