Dual Panel1Le’baki anjo akkuta’nammi Daud ri Batara angkana, "Apa Kikaerokangi nakua’lampa mange angkoasai kalase’renna kotaya ri Yehuda Batara?" Appialimi Batara, angkana, "Iyo". Akkuta’nammi Daud angkana, "Kota kereanga?" Appialimi Batara, angkana, "Hebron".
2Jari a’lampami Daud mange ri Hebron siagang rua bainenna, iamintu: Ahinoam baine tu Yizreel, siagang Abigail jandana Nabal iamintu baine battu ri Karmel.
3Kammayatompa ana’-ana’na siagang massing kaluargana ke’nanga amminawangi ri Daud, nampa ammantang ke’nanga ri Hebron siagang tammulilina.
4Nampa battumo tu Yehuda mange ri Hebron, na nalanti’ Daud a’jari karaeng mae ri tu Yehuda. Nalangngere’na Daud angkanaya le’ba’mi nitarawang maya’na Saul ri tu Yabesh ri Gilead,
5akkirimmi tunisuro mange anjoreng angngerang pasang angkana, "Dasi-dasi Nabarakkaki ngasengko Batara, lanri nupappicinikanna tamamminrana pa’mai’nu mae ri karaennu, iamintu lanri nutarawanna maya’na.
6Lanri kammana anjo, dasi-dasi naNapappicinikang pangngamaseanNa siagang pa’mai’ tamamminraNa Batara mae ri kau ngaseng. Inakke lakugau’ baji’ tongko lanri anjo apa nugaukanga.
7Pakasa’baraki pa’mai’nu siagang gaukangi gau’ kabaranianga! Saul, karaennu matemi, mingka le’ba’ma’ nalanti’ tu Yehuda a’jari karaenna ke’nanga."
8Ia panglimana tantarana Saul, iamintu Abner ana’na Ner, larimi siagang Isyboset ana’na Saul, mange ri Mahanaim ri ba’leanna Binanga Yordan.
9Anjoreng, niangka’mi Isyboset ri Abner a’jari karaeng mae ri daera-daera Gilead, Asyuri, Yizreel, Efraim siagang Benyamin, ba’lalo mae ri sikontu Israel.
10Anjo wattua patampulo taung umuru’na Isyboset nanipa’jari karaeng mae ri Israel, na ruan taung sallona ammarenta. Mingka suku Yehuda tuli majarreki pa’mai’na mae ri Daud,
11siagang ammarentammi Daud ri Hebron mae ri tu Yehuda tuju sitangnga taung sallona.
12Ri se’reang allo, a’lampai Abner battu ri Mahanaim mange ri kota Gibeon, nirurungang ri ana’ buana Isyboset.
13Kammayatompa Yoab (amma’na niarengi Zeruya), sipa’rurungang ana’ buana Daud a’lampa tongi mange ri anjo kotaya. Anjo ruaya sipa’rappungang siagang a’balia, assidallekangi ri balang Gibeon; Abner sipa’gangngang ammempo ri ba’leang anrinniang, nampa Yoab sipa’gangngang ri ba’leang anjorengang.
14Nampa nakanamo Abner mae ri Yoab, "Umba nanisuroi ana’ buata attanding!" Appialimi Yoab angkana, "Baji’mi".
15Nampa majumo sampulonrua tau battu ri suku Benyamin wakkele’na Isyboset, siagang sampulonrua tau battu ri ana’ buana Daud.
16Sikakka’ uu’mi ke’nanga siagang sitobo’mi para parru’na ke’nanga, sa’genna para mate ke’nanga. Lanri kammana minjo naniaremmo anjo tampaka ri Gibeon "Koko Pa’dang".
17Le’baki anjo kajariammi bundu’ lompoa. Na nibetamo Abner siagang tantarana Israel ri ana’ buana Daud.
18Tallua ana’na Zeruya niaki anjoreng, iamintu Yoab, Abisai, siagang Asael. Ia gassinna lari Asael rapangi kijang.
19Jari tuli naondammi Abner.
20Assailei Abner mae ri boko nakkuta’nang angkana, "Ikauka antu Asael?" Appialimi angkana, "Iyo."
21Angkanami Abner, "Teako ondangia’! Allemi jakkala’ kalase’renna anjo parajurika siagang allei sanjatana!" Mingka tuli niondanna ri Asael.
22Sikalipi pole angkana Abner ri ia, "Teako ondangia’! Gassingka tarpassa kubunoko. Kemaemi kuboli’ tanjakku mae ri anjo daennu Yoab?"
23Ri wattu tuli tenana naero’ Asael ammantang, ammokemi Abner mae ri boko, nanitabamo battanna Asael sa’genna annarrusu’ anjo pokea mae ri dongko’na. Anra’bami siagang matemi Asael anjoreng memang ri tampaka. Sikontu tau battua mae ri anjo tampa’ napammonrangia, ammantang ngasengi anjoreng.
24Mingka Yoab siagang Abisai napannarrusuki angngondangi Abner. Ri wattunna labumo alloa, anrapi’mi ke’nanga mange ri Bulu’ Ama, niaka ri rayanganna Giah, a’lampa mangea ri parang lompona Gibeon.
25Anjoreng sikamma tu battua ri suku Benyamin asse’remi siagang Abner, nampa naatoro’ barisanna ke’nanga irate ri coppo’na se’rea bulu’.
26Battu anjoreng akkio’mi Abner mae ri Yoab angkana, "Apa musti tuli a’bundukki’? Tenaka nanuu’rangi angkanaya anne bunduka poro angngeranna kapa’risang? Ikambe anne sari’battang julu bansanu. Siapapi sallonu ero’ attayang lalang tenanapa nanuparentakangi ana’ buanu sollanna ammari angngondangi ikambe?"
27Appialimi Yoab angkana, "Lanri Allata’ala mattallasaka, ebara’ angkana tena nuppakkaramula a’bicara, ma’nassa tulusu’ lanaondannu ana’ buaku sa’genna ammuko bari’basa’."
28Nampa attui’mo tarompe’ Yoab salaku pammatei mae ri ana’ buana sollanna ammari angngondangi tu Israel. Jari ammarimi anjo pa’bundukanga.
29Abner siagang ana’ buana a’barrisiki sipattang bujuru’ allalo ri lappara’ ka’bunna Yordan, nampa a’limbang ri Binanga Yordan. Na le’baki a’jappa tulusu’ sikabusu’na alloa ammukona, anrapi’mi ke’nanga mange ri Mahanaim.
30Ammantannamo Yoab angngondangi Abner, napasse’remi sikontu ana’ buana. Pantaranganna Asael kaassengammi angkanaya nia’ sampulo assalapang battu ri ke’nanga tappela’.
31Ana’ buana Daud nia’ 360 tau pasukanna Abner battu ri suku Benyamin nabuno ke’nanga.
32Le’baki anjo naangka’mi Yoab siagang ana’ buana anjo maya’na Asael nampa natarawang lalang ri jera’ kaluargana ri Betlehem. Nampa a’jappa ke’nanga sipattang bujuru’ sa’genna battu mange ri Hebron ri wattu subu-subua.