Dual Panel1Le’baki anjo battu ngasemmi sikontu pamimping-pamimpinna suku-suku Israel mange ri Daud ri Hebron siagang angkana ke’nanga ri ia, "Ikambe anne bija ma’reppesettaki’ karaeng.
2Battu rioloji, ba’lalo ri wattu ammarentana ija Saul mae ri kambe, ikatte tonji karaeng ampimpingi tantarana Israel punna maju mange a’bundu’. Nampa pole le’ba’mi a’janji Batara mae ri katte angkanaya ikattemi lampimpingi umma’Na siagang la’jari karaeng mae ri ke’nanga."
3Appare’mi parjanjiang Daud siagang anjo pamimping-pamimpinna tu Israel, nampa nilanti’ ri ke’nanga a’jari karaeng mae ri Israel.
4Tallumpulo taung umuru’na Daud anjo wattunna a’jari karaeng, siagang patampulo taungi sallona ammarenta.
5Tuju sitangnga taung ammarenta ri Hebron mae ri Yehuda, siagang tallumpulo antallu taung ammarenta ri Yerusalem mae ri sikontu Israel siagang Yehuda.
6Ri se’reang allo a’lampai Karaeng Daud siagang ana’ buana ero’ ambunduki Yerusalem. Pandudu’na anjo kotaya, iamintu tu Yebus, nakapangi angkanaya tanakulleai Daud ambetai Yerusalem. Lanri kammana anjo nakanamo ke’nanga ri ia, "Takkulleako lantama’ mae; manna tau butaya siagang tau tempanga akkulle tongi ambongkako."
7Nakanamo Daud mae ri ana’ buana, "Niakka anrinni tau angkabirisi tu Yebus sangkamma bateku angkabirisi ke’nanga? Maka birisi’ tojengi sa’genna cinna dudu ambunoi ke’nanga? Punna kamma, antama’ mako battu ri passolongang je’neka nampa bunduki anjo tu butaya siagang tu tempanga kukabirisia." (Iaminjo saba’na nanakana taua, "Tu butaya siagang tu tempanga takkulleai antama’ ri Balla’Na Batara.") Akkullemi naalle Daud anjo pattahanganna Sion siagang naempoi. Naaremmi "Kota Daud". Nabangummi anjo kotaya ri tammulilina anjo pattahangnganga, appakkaramula battu ri rayanganna bonto nipakatinggia siagang butta.
8(5:7)
9(5:7)
10Pila’ sallo pila’ kassa’mi Daud, lanri nitulungi ri Batara, Allata’ala Kaminang Koasaya.
11Karaeng Hiram battu ri pa’rasangang Tirus akkiringi wakkele’ mae ri Daud. Kammayatompa kayu camara Libanon siagang tukang-tukang kayu na tukang-tukang batu untu’ ambangung balla’ kakaraengang.
12Lanri kammana anjo tappa’mi Daud angkanaya nipakajarreki ri Batara a’jari karaeng mae ri Israel, siagang nipa’jari kassaki kakaraenganna untu’ kaparalluanna umma’Na Batara.
13Le’ba’namo a’lette’ Daud battu ri Hebron mange ri Yerusalem, a’bainemi pole siapa are tubaine siagang angngalle tommi siapa are baine piara; jari pila’ katambammi ana’-ana’ bura’nena siagang ana’-ana’ bainena.
14Ana’-ana’ bura’nena nilassukanga ri Yerusalem iamintu: Syamua, Sobab, Natan, Salomo,
15Yibhar, Elisua, Nefeg, Yafia,
16Elisama, Elyada siagang Elifelet.
17Ri wattunna nalangngere’ tu Filistin angkanaya nipa’jari karaemmi Daud ri Israel, battumi ke’nanga ero’ anjakkalaki. Mingka nalangngereki Daud anjo passalaka, nampa a’lampa mange ri pattahangnganga.
18Battumi tu Filistin ri Ka’bung Refaim siagang naempoi anjo tampaka.
19Akkuta’nammi Daud ri Batara angkana, "Apa musti kubunduki anjo tu Filistin? Maka laKisarea’ pammetang?" Appialimi Batara angkana, "Bundukimi. INakke lassareko pammetang."
20Nampa a’lampamo Daud mange ri Baal-Perasim siagang nabetami anjoreng anjo pasukang tu Filistin. Nampa angkana, "Le’ba’mi Narumbang Batara pattahanganna musungku, sanrapang a’ba anrumbangi sikontu apa-apaya lalang wattu sinampekang." Lanri kammanami anjo naniaremmo anjo tampaka, "Baal-Perasim".
21Larimi tu Filistin, siagang tenamo nasawe angngerangi sikamma patung-patung barhalana ke’nanga. Niallemi ri Daud siagang ana’ buana anjo patung-patunga.
22Tena nasallo ribokoanganna battumi pole tu Filistin angngempoi Ka’bung Refaim.
23Sikalipi pole Daud appala’ pangngunju’ ri Batara. Appialimi Batara angkana, "Teako bunduki ke’nanga battu anrinni, mingka a’jappako a’dete’ siagang bundukimi ke’nanga battu ri boko, battu ri poko’-poko’ kayu murbei.
24Punna nulangngere’ sa’ra tau a’barrisika irate ri coppo’na anjo poko’-pokoka, maju mako, nasaba’ iNakke la’jappa ri dallekannu untu’ ambetai tantara Filistin."
25Nagaukammi Daud anjo apa Naparentakanga Batara, siagang akkullemi natunrung sa’genna ammunduru’ anjo tu Filistin battu ri Geba sa’genna mange ri Gezer.