Dual Panel1A’lampai Rehabeam mange ri Sikhem lanri sikontu ra’ya’ niaka ri bageang wara’ a’rappungi anjoreng untu’ allantiki Rehabeam anjoreng a’jari karaeng.
2Anjo wattua nia’ iji Yerobeam ana’na Nebat ri Mesir lanri lari napakamma malla’ ri Karaeng Salomo. Nalangngere’na kabara’na Rehabeam, ammotere’mi mange ri Israel.
3Nikioki Yerobeam ri ra’ya’ niaka ri bageang wara’, nampa a’lampa siagang ke’nanga mange andallekang ri Rehabeam. Nakana ke’nanga,
4"Manggeta Salomo nabattalli dudui kambe. Punna kisarei ikambe karingangngang siagang nikurangngi pa’risi’na ikambe, latunduki ikambe mae ri katte."
5Appialimi Rehabeam angkana, "Musti kupikkiriki rolong. Tallungallopi nampa battu poleangko." Jari ammotere’ kabusu’mi anjo taua.
6Nampa appala’ tangara’mo Rehabeam mae ri tau toa-toaya le’baka biasa napappalakki pappitangara’ Salomo manggena Rehabeam. Akkuta’nangi Rehabeam ri ke’nanga angkana, "Antekamma bateku musti appiali ri pakkuta’nanna anjo ke’nanga? Antekamma panggappata ngaseng?"
7Appialimi ke’nanga angkana, "Punna erokki’ anggaukangi bajika mae ri ra’yaka, siagang ampakasannangi nyawana ke’nanga, appiali bajikki’ mae ri ke’nanga, sollanna tamamminraya pa’mai’na mae ri katte sa’genna satunggu-tungguna."
8Mingka tena najampangi Rehabeam pappakainga’na anjo tau toa-toaya. Kabalekanna a’lampai mae ri tau rungka-rungkaya iamintu sampangka’-pangka’na umuru’na, a’jaria pambantu-pambantuna kamma-kamma anne.
9Akkuta’nangi ri ke’nanga angkana, "Apa pappitangara’nu mae ri nakke untu’ ampiali ra’ya’ ampalakai mae ri nakke sollanna kuringangngi battala’na ke’nanga?"
10Appialimi ke’nanga angkana, "Kamma anne musti kikana ri ke’nanga, ‘Manna pole antekamma lammaku mingka gassingangngang ija’ namanggeku.
11Nabattalliko manggeku, mingka inakke la’bi lakubattalliko. Nacambokko manggeku siagang pa’ba’bala’ biasa, mingka inakke lakucambokko siagang pa’ba’bala’ akkatinting bassia!’"
12Tallungallo le’ba’na, nia’mi pole Yerobeam siagang sikontu anjo taua battu andallekang ri Karaeng Rehabeam, situru’ parentana Rehabeam.
13Sisalai pappakainga’na tau toa-toaya, a’bicara kasaraki mae ri anjo ra’ya’ battua mae ri ia.
14Situru’ pappakainga’na tau rungka-rungkaya, nakanamo Rehabeam ri ke’nanga, "Manggeku nabattalliko mingka inakke la’bi lakubattalliko pole. Nacambokko siagang ba’bala’ biasa, mingka inakke ba’bala’ akkatinting bassi lakucambokangko!"
15Tena najampangi anjo pappala’na ra’yaka. Mingka memang anjo ero’Na Karaeng Allata’ala. Anjo apa le’baka Napau Batara tete ri Na’bi Ahia battu ri Silo musti a’rupai.
16Nalangngere’na ra’yaka angkanaya taerokai Karaeng Rehabeam ampilangngeri pappala’na ke’nanga, a’gorami ke’nanga angkana, "Angngapa nalanijampangi Daud siagang jari-jarina! Tena apa-apa kabajikang le’ba’ nagaukang mae ri katte. Umba ikatte ra’ya’ Israel nakiammotere’! Lappassang tommi anjo Rehabeam nanaurusuki kalenna!" Jari ammotere’mi ra’ya’ Israel,
17siagang daera Yehuda mami naparenta Rehabeam salaku karaeng.
18Mingka manna pole nakamma nasuro iji Karaeng Rehabeam a’lampa Adoniram, kapalana tau nipajama passaya, untu’ ampakasannangi ra’yaka. Mingka nisambilai batu ri ke’nanga sa’genna mate. Kalenna Rehabeam akkullei ta’lappasa’ nampa lari linta’ nai’ ri karetana, nampa lari mange ri Yerusalem.
19Appakkaramula anjo wattua tuli angngewami ra’ya’ niaka ri bageang wara’ mae ri sikamma karaeng jari-jarina Daud.