Dual Panel1Ri taung makasampulo assagantuju ammarentana Yerobeam ri Israel, anjo wattua na’jari Karaeng Abia ri Yehuda,
2siagang tallun taungi ammarenta ri Yerusalem. Amma’na iamintu Mikhaya ana’na Uriel battu ri kota Gibea. Nampa jarimo bunduka, iamintu Abia sipa’bali Yerobeam.
3Abia napagioki tantarana 400.000, nampa Yerobeam napagio’ tongi tantarana 800.000 jaina.
4Assidallekangi anjo ruaya pasukang ri daera monconna Efraim. Naiki Abia ri Moncong Zemaraim nampa a’gora mae ri Yerobeam siagang tu Israel angkana, "Pilangngeri ngasengi!
5Nuassengi angkanaya le’baki Batara, Allata’alana Israel appare’ janji mae ri Daud, angkanaya ia siagang jari-jarina lammarenta ri Israel sa’genna satunggu-tungguna. Anjo janjia tena le’bakai nipinra.
6Mingka manna nakamma mamo, anjo Yerobeam ana’na Nebat, angngewai mae ri Salomo, karaenna.
7Appasse’rei sipa’gompoang tau kurangajara’ nampa ero’ napassakang ero’na mae ri Rehabeam ana’ bura’nena Salomo, rungka dudua anjo wattua siagang tenayapa pangalamanna untu’ angngewa.
8Kamma-kamma anne gassingka nukapangi angkanaya akkullei nuewa kakoasang Napassareanga Batara mae ri jari-jarina Daud, lanri lompona pasukannu siagang lanri nia’na patung sapi bulaennu nipareka a’jari rewata ri Yerobeam untu’ nusomba.
9Sai le’ba’mi nubongka imang-imanNa Batara, iamintu jari-jarina Harun siagang tu Lewi? Na sambenna iamintu inai-nai sambarang ero’ a’jari imang, assala’ angngerangi sikayu sapi yareka tuju kayu gimbala’. Nupa’jari imang teai untu’ Allata’ala, nasaba’ memang kammami anjo batena bansa-bansa maraenga angngangkaki imanna ke’nanga. Mingka ikatte tena nigaukangi kammaya anjo.
10Ikatte tuli anynyombata mae ri Karaeng Allata’alata siagang tena kima’boko ri Ia. Ikatte imang-imanta tuli jari-jarina Harun siagang tuli tu Lewi pambantuna ke’nanga.
11Tunggala’ bari’basa’ siagang karueng attunui ke’nanga dupa siagang assarei koro’bang nitunu untu’ Batara, kammayatompa appasadiai roti nipatala. Tunggala’ bangngi ke’nanga apparinra kanjoli-kanjoli ri pa’dongkokang kanjoli bulaenga. Ikatte tuli mannurukiki’ ri parenta-parentaNa Batara, mingka ikau ngaseng nubokoimi Batara.
12Ikatte pamimpinta iamintu Allata’ala KalenNa siagang sikamma imang niaka anrinni. Sadiami ke’nanga appasa’ra tarompe’ untu’ a’jari pammatei ri katte lamaju ambundukiko. He, tu Israel, teako angngewai ri Batara, Allata’alana boe-boenu! Takkulleako ammeta!"
13Lalanna anjo wattua nakirimmi Yerobeam sipa’gang pasukanna untu’ angngadangi pasukanna Yehuda battu ri boko, nampa sipa’gang maraenganga andallekangi ke’nanga battu ri dallekang.
14Ri wattunna nacini’ pasukang Yehuda angkanaya nikurummi ke’nanga, a’gorami ke’nanga appala’ tulung ri Batara. Sikamma imanga appasa’rami tarompe’,
15nampa akkio’ bundu’ pasukanna tu Yehuda siagang maju a’bundu’, nipimping ri Abia. Lalang a’gorana ke’nanga nibetami Yerobeam siagang pasukang Israel ri Allata’ala,
16sa’genna larimo ke’nanga. Nisaremi pammetang tu Yehuda ri Allata’ala.
17Ammeta lompoi Abia siagang pasukanna mae ri tu Israel; nia’ 500.000 pasukanna Israel kaminang bajika mate.
18Ammetai tu Yehuda lanri Batara, Allata’alana boe-boena ke’nanga napattoang.
19Ri wattunna naondang Abia pasukanna Yerobeam, nia’ siapa are kota siagang desa-desa niaka ri ampi’na anjo kota-kotaya naalle. Anjo kota-kotaya iamintu Betel, Yesana, siagang Efron.
20Lalang ammarentana Abia tanakulleami napakajarre’ ammotere’ Yerobeam kakoasanna. Kale’bakkanna nibunomi ri Batara.
21Kabalekanna, Abia pila’ lompomi koasana. Nia’ 14 bainenna, 22 ana’ bura’nena siagang 16 ana’ bainena.
22Pau-pau maraengannaya ri passala’na Abia, siagang ri passala’na sikontu kana-kananna siagang apa nagaukanga le’baki nicata’ lalang ri kitta’ Pau-pauanna Na’bi Ido.