Dual Panel1Wattunna a’jari Karaeng Yotam ri Yehuda, 25 taung umuru’na, siagang ammarentai ri Yerusalem 16 taung sallona. Amma’na iamintu Yerusa ana’na Zadok.
2Ningai Yotam ri Batara, sangkamma todong manggena. Iaji bawang katena nattunu dupa ri Balla’Na Batara, sangkamma nagaukanga manggena. Mingka manna nakamma, tuli a’gau’ dosana ra’yaka.
3Iaminne Yotam ambangungi Pakke’bu’ Lompo Bageang Wara’na Balla’Na Batara, siagang ampakajarreki tembo’na Yerusalem ri daera niarenga Ofel.
4Ambangungi kota-kota ri daera monconna Yehuda siagang tembo’-tembo’ pattahangnganga kammayatompa menara-menara niaka ri romanga.
5Nabunduki nampa nabeta karaeng Amon siagang tantarana, nampa napassa tu Amon assare pa’bayara’. Tassikali lalang tallun taung musti a’bayara’ ke’nanga 3.400 kilogarang pera’, ruang rupa gandung, massing-massing 1.000 kilogarang tassirupa.
6Pila’ a’jari jarre’mi kakoasanna Yotam lanri majarre’na tappa’na siagang mannurukinna mae ri Karaeng Allata’alana.
7Kajariang-kajariang maraengannaya ri wattu pamarentahanna Yotam, pa’bundukang-pa’bundukang nagaukanga siagang antekamma akkala’na lalang pa’bundukanga, kabusu’na niaki nicata’ lalang ri kitta’"Pau-pauanna Sikamma Karaeng Israel siagang Yehuda."
8Wattunna a’jari Karaeng Yotam, 25 taung umuru’na, siagang 16 taung sallona ammarenta ri Yerusalem.
9Matemi siagang nitarawang ri Kota Daud, nampa ana’ bura’nena niarenga Ahas ansambeangi a’jari karaeng.