Dual Panel1Le’ba’mi natantukang Karaeng Daud angkanaya anjo Balla’Na Batara musti anjorengi ri Yerusalem nibangung, iamintu ri Moncong Moria ri ampi’na panggilingang gandunna Arauna tu Yebus. Anjo pambangunanna Balla’Na Batara appakkaramulai nabangung Karaeng Salomo
2ri bulang makarua taung makaappa’ ri pamarentahanna.
3La’buna anjo Ballaka 27 metere’ siagang sangkara’na 9 metere’.
4La’buna kamara’ bageang dallekang sangkammai sangkara’na anjo ballaka iamintu 9 metere’. Tinggina 54 metere’. Bageang lalanna kamaraka anjo nilapisiki siagang bulaeng ti’no’.
5Kamara’ makase’rea nisarei papang kayu camara kaminang bajika siagang nilapisi’ bulaeng toa. Ri anjo lapisang bulaenga nia’ ukirang gambara’ poko’ palem siagang gambara’ rante.
6Nabelo-beloi karaenga anjo Ballaka siagang batu paramata ga’ga-ga’gaya siagang bulaeng-bulaeng nieranga battu ri pa’rasangang Parwaim.
7Napake tongi anjo bulaenga untu’ allapisiki anjo tembo’-tembo’ Balla’Na Batara, balo’-balo’na, bageang-bageang ratena pakke’buka siagang pakke’bu’-pakke’bu’na. Tembo’-tembo’na naukiriki siagang gambara’ malaeka’ akka’nyi’.
8Kamara’ bageang lalang niarenga Kamara’ Kaminang Matangkasa’ la’buna 9 metere’ siagang sangkara’na 9 metere’, sangkamma sangkara’na anjo Balla’Na Batara. Ruampulo tong battala’na bulaeng nipake untu’ allapisi tembo’-tembo’na anjo Kamara’ Kaminang Matangkasaka
9siagang 570 garang bulaeng nipake untu’ appare’ paku. Manna tembo’-tembo’ kamara’ bageang ratea nilapisi ngaseng tongi bulaeng.
10Nasuro tongi karaenga sikamma pajamaya untu’ appare’ rua patung malaeka’ akka’nyi’. Anjo patung-patunga nilapisiki bulaeng nampa nitannangi a’remba lalang ri Kamara’ Kaminang Matangkasaka a’dalle’ mae ri pakke’buka. Tunggala’ anjo patunga massing nia’ rua ka’nyi’na, massing 2,2 metere’ la’buna anjo ka’nyi’na. Takka’rangi anjo ka’nyi’-ka’nyika sa’genna sigappa cappa’na ri tangngana anjo kamaraka, nampa cappa’ ka’nyi’ maraenna narapiki temboka ri kairi siagang ri kanang. Jari takka’rangi anjo ka’nyika sa’genna 9 metere’ la’buna, iamintu sangkamma sangkara’na anjo kamaraka.
11(3:10)
12(3:10)
13(3:10)
14Untu’ anjo Kamara’ Kaminang Matangkasaka nipapparekangi pole gordeng battu ri kaeng lenang siagang kaeng cura’ moncongbulo, lame butung siagang eja. Anjo gordenga nibelo-beloi siagang gambara’-gambara’ malaeka’ akka’nyi’.
15Appareki karaenga rua benteng, massing-massing 15,5 metere’ tinggina, nampa napataba ri dallekanna Balla’Na Batara. Tunggala’ anjo bentenga massing ammakei ulu benteng 2,2 metere’ tinggina.
16Bageang ratena anjo ruaya benteng niga’gai siagang belo-belo battu ri tambaga, sangkamma anyangngang rante siagang 100 batunna rappo delima.
17Anjo ruaya benteng nipaentengi ri sa’ri kairinna siagang sa’ri kananna pakke’bu’ antamaya ri Balla’Na Batara; bageang timboranga niarengi Yakhin, na ri bageang warakkanga niarengi Boas.