Alkitab Mobile SABDA
[VER] : [MAKASAR]     [PL]  [PB] 
 <<  2 Tawarikh 9 >> 

1Nalangngereki Ratu Syeba ri passala’ masahoro’na arenna Karaeng Salomo. Jari battumi mange ri Yerusalem ero’ anso’ri kacara’dekanna na nasare pakkuta’nang-pakkuta’nang sukkara’. Battui nirurungang ri siapa are jaina paeranna siagang unta battalaka eranganna angngerang rampa-rampa, batu paramata, siagang teai sipato’ jaina bulaeng. Ri wattunna assigappa siagang Salomo, akkuta’nammi anjo ratua a’rupa-rupa pakkuta’nang niaka ri pikkiranna.

2Kabusu’na anjo pakkuta’nanga akkulle ngasengi napiali Salomo, tena manna se’re sukkara’ mae ri ia.

3Kalenna anjo ratua ansa’bi antekamma cara’de’na Salomo. Naciniki balla’ karaeng nabangunga Salomo,

4antekamma atoro’na jama-jamanna pagawe-pagawena balla’ karaenga, siagang pakeanna kammayatompa balla’na ngaseng ke’nanga. Naciniki kanre nipatalaya, siagang pakeanna sikamma palayang allayaniai ke’nanga; naciniki koro’bang-koro’bang napassareanga Salomo ri Balla’Na Batara. Yangasenna anjo napakalannasaki pa’mai’na anjo ratu battua ri pa’rasangang Syeba napakamma.

5Jari nakanamo ri Karaeng Salomo, "Sikontu anjo kabara’ kulangngereka ri pa’rasangangku ri passala’na ikatte siagang kacara’dekanta memang kammatojengi.

6Riolo tena kukkulle tappa’, mingka battukumo mae siagang kalengku ancini’ kabusuki, nampama’ tappa’ tojeng-tojeng. Sikontutojenna tenapa nattawa rua jaina anjo apa kulangngereka battu ri anne kucinika ri kamma-kammaya anne. Ma’nassa anjo kacara’dekanta siagang kakalumanynyanganta la’bi lompoangangi na anjo kabara’ kulangngereka.

7Teai sipato’ upa’na ngaseng pagawe-pagawe allayaniaki’ siagang tuli anjamaya untu’ ikatte sa’genna akkulle nalangngere’ battu ri katte kalenta sikontu pangngajarang bajika!

8Nipujimi arenNa Batara, Allata’alata! Lanri Naangkatta a’jari karaeng untu’ ammarenta lalang arenNa Napappicinikammi antekamma sannanNa mae ri katte. Lanri Nakamaseanna umma’ Israel siagang Nakellaina tuli nia’ ke’nanga, Naangka’maki’ a’jari karaeng mae ri ke’nanga, sollanna akkulle kipaenteng hukkunga siagang kaadelanga."

9Nampa napassareang anjo ratu battua ri pa’rasangang Syeba mae ri Salomo hadia-hadia naeranga, iamintu la’bi 4.000 kilogarang bulaeng siagang majai batu paramata kammayatompa rampa-rampa. Tena le’bakami Salomo ribokoangannaya annarima passare rampa-rampa kammaya baji’na anjo napassareanga ratu battua ri pa’rasangang Syeba mae ri ia.

10(Ana’ buana Hiram siagang ana’ buana Karaeng Salomoangngeranga bulaeng battu ri Ofir untu’ Salomo, angngerang tongi batu paramata siagang kayu cendana.

11Anjo kayua napakei Salomo untu’ appare’ tuka’ ri Balla’Na Batara siagang balla’ karaenga, kammayatompa untu’ appare’ kacaping siagang gambusu’ untu’ sikamma pakelonga. Tena le’bakapi nia’ anu kammaya anjo ri pa’rasangang Yehuda.)

12Pantaranganna hadia-hadia pa’balasa’ biasaya napassareang Salomo, nasare tongi Salomo anjo ratu battua ri pa’rasangang Syeba iamintu sikontu apa napalaka. Nampa ammotere’mo anjo ratua mange ri pa’rasanganna siagang sikontu paeranna.

13Tunggala’ taungi Salomo annarima a’biring 23.000 kilogarang bulaeng,

14tanirekengapi sima-sima battua ri sikamma pabalu’-baluka siagang padangganga. Karaeng-karaeng Arab siagang guburnur-guburnur niaka ri Israel assare tongi mae ri ia bulaeng siagang pera’.

15Appareki Salomo 200 pannangkisi’ lompo battua ri bulaeng nisappu’. Tunggala’ anjo pannangkisika ammakei kira-kira 7 kilogarang bulaeng.

16Appare’ tongi 300 pannangkisi’ bulaeng ca’diangnganga. Tunggala’ anjo pannangkisi’ ca’dia ammakei kira-kira 3 kilogarang bulaeng, sangnging bulaeng nisappu’. Anjo sikamma pannangkisika naboliki ri se’reang kamara’ lompo niarenga Kamara’ Romang Libanon.

17Appare’ tongi karaenga se’re kadera kakaraengang lompo, iamintu nipareka battu ri gading gaja siagang nibelo-beloi bulaeng ti’no’.

18Anjo kaderaya nia’ panna’gallanna siagang appimbali sa’rinna nia’ patung singa. Anjo kaderaya ammakei annang baringang siagang se’re pattuppuang bangkeng nilapisika bulaeng. Anjo pattuppuang bangkenga assisambungi siagang kaderaya.

19Ri cappa’ kairinna siagang cappa’ kananna sikamma anjo baringanga massing nia’ patung singa, yangasenna nia’ 12 patung. Tena le’bakai nia’ kadera kammaya anjo manna pole ri kakaraengang kemae.

20Sikontu pakkakasa’ pangnginunganna Salomo sangnging bulaeng nipare’, siagang sikontu pakkakasa’ niaka niboli’ ri Kamara’ Romang Libanon sangnging bulaeng ti’no’ todong nipare’. Ri jammanna Salomo, anjo peraka nicini’ tenai anggaranna.

21Jai todong kappala’ lompona Salomo assombalaka ri tamparang lompoa siagang kappala’-kappala’na Hiram. Tallun taung sikali ammotereki sikamma anjo kappalaka angngerang bulaeng, pera’, gading gaja, dare’ siagang jangang-jangang ga’ga.

22La’bi kalumanynyanna siagang cara’de’na Karaeng Salomo na karaeng manna pole battu kemae.

23Sikontu karaenga nausahai assicini’ siagang Salomo untu’ ampilangngeri pangngajarang kacara’dekanna Napassareanga Allata’ala mae ri ia.

24Massing battui ke’nanga angngerang hadia untu’ Salomo. Assarei ke’nanga barang-barang kammaya pera’, bulaeng, pakeang, sanjata, rampa-rampa, jarang siagang bagal. Kammami anjo taung-taung.

25Nia’ todong napatang Karaeng Salomo 4.000 bara jarang siagang karetana. Jarang bundu’na nia’ 12.000 kayu. Nia’ sipa’gang naboli’ ri Yerusalem, na sipa’gang naboliki ri kota-kota pammolikang kareta-kareta bundu’na.

26Koasai mae ri sikontu karaeng niaka ri daera luara’ appakkaramula battu ri Binanga Efrat sa’genna mange ri pa’rasangang Filistin siagang pa’baeng-baenna Mesir.

27Ri jammang pamarentahanna Salomo, anjo peraka sangkammaji barang-barang biasa ri Yerusalem, sangkamma batu, siagang kayu camara battua ri Libanon teai sipato’ jaina sangkamma kayu ara biasa.

28Ampantamaki Salomo jarang battu ri Mesir siagang battu ri tunggala’ pa’rasangang maraenga.

29Pau-pau maraengannaya ri passala’na Karaeng Salomo sa’genna kala’busanna niaki nicata’ lalang ri kitta’ Pau-pauanna Na’bi Natan siagang lalang ri kitta’ Kana tappu riolona Ahia tu Silo, siagang lalang ri kitta’ Pappicini’ Na’bi Ido, niaka todong napau pau-pauanna pamarentahanna Yerobeam karaeng Israel.

30Sallona ammarenta Karaeng Salomo iamintu 40 taung; anjorengi ri Yerusalem ammarenta mae ri sikontu Israel.

31Nampa mate siagang nitarawang ri Kota Daud. Nampa ana’na niarenga Rehabeam ansambeangi a’jari karaeng.


  Share Facebook  |  Share Twitter

 <<  2 Tawarikh 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel