Alkitab Mobile SABDA
[VER] : [MAKASAR]     [PL]  [PB] 
 <<  Amsal 15 >> 

1Pappiali lammaya, ampa’jari naungi larroa; pappiali passea appaumbai larro.

2Kana-kana cara’deka ampa’jari pangngassenganga angngalle pa’mai’; kana-kana tau dongoka, poro kadongokang bawang bonena.

3Naciniki Batara sikontu apa kajarianga ri sikontu tampa’; Naparhatikangi sikontu apa bajika siagang ja’dalaka.

4Kana-kana bajika annambai sumanga’, kana-kana appakapa’risika nyawa, allammai pattujuang.

5Tau dongoka nabawang-bawangngangi pappakainga’na manggena, tau cara’deka Naparhatikangi pappasailea.

6Ri balla’na tau bajika jai barang-barang; kakalumanynyangnganna tau ja’dalaka lalanynyaki lanri bala.

7Kana-kana tau cara’deka rassi siagang pangngassengang, mingka pikkiranna tau dongoka tena nakamma.

8Natarimai Batara pappala’ doanna tau bajika, mingka birisiki mae ri passarena tau ja’dalaka.

9Birisiki Batara ri batena attallasa’ tau dorakaya, mingka Nakamaseangi tau usahaya anggaukangi ero’Na.

10Tau a’gau’ ja’dalaka lanisessai; tau taeroka nipasaile lamatei.

11Naassengi Batara linona tau matea siagang lampa-lampana; antekamma batena lakkulle nicokko pikkiranna taua mae ri Ia?

12Tau masarroa anghinai paranna tau, tanangaiyai nipasaile; kuttui appala’ tangara’ battu ri tau cara’deka.

13Pa’mai’ rannua napaccayai tanjaka; pa’mai’ si’naya natepoki sumangaka.

14Tau cara’deka a’boyai pangngassengang; tau dongoka sibuki siagang kadongokanga.

15Tau susaya tuli appattujuangi lalang tallasa’na, mingka tau sarro rannua tuli mate’nei.

16Bajikangngangi sike’deka barang-barang mingka mallakki’ ri Batara, kala jai barang mingka tuli lussaki pa’maika.

17Bajikangngangi gangang bawang nikanre assala’ sikamaseangi taua, kala angnganrea dageng mingka sikabirisi taua.

18Tau lintaka larro appaumbai pa’beserang, tau sa’baraka angngerangi passiamakkang.

19Tau malasaka tuli lanakasiaki kasukkaranga; tau lambusuka tammuntulai kasukkarang.

20Ana’ cara’deka, napakasannangi pa’mai’na manggena; ana’ toloa tanapakala’birai amma’na.

21Katoloanga iami kasannangnganna tau dongoka, tau cara’deka lambusuki tallasa’na.

22Rancanaya takkulleai a’jari punna tena nirurungangi siagang tangara’ baji’; lanjari rancanaya, punna jai assare pappakainga’.

23Kana-kana nipasuluka ri wattu kaminang cocoka, langngerangi karannuang.

24Tau cara’deka amminawangi ri oloang angngambika mange ri katallassanga; teai oloang naunga mae ri kamateanga.

25LaNarumbangi Batara balla’na tau tinggi langgaya, mingka laNajagai buttana sitaua janda.

26Birisiki Batara ri rancana ja’dalaka; mingka kana-kana bajika napakasannangi pa’mai’Na.

27Inai a’boya passawallang tenaya nahallala’, napanraki kaluarga kalenna. Inai angkabirisi doe’ pammuccuka, lamate’nei.

28Tau bajika natangara’ bajiki kana-kananna; tau ja’dalaka appasuluki kana-kana rantasaka.

29Napilangngeri Batara punna appala’ doang tau bajika, mingka tena najampangi tau dorakaya.

30Tanja’na tau rannua appakarannui pa’mai’, kabara’ bajika appakabajiki nyawa.

31Tau manjampangia pappasaile nibilangi tau cara’de’.

32Tau taeroka nipakainga’, tena napakala’biriki kalenna; tau eroka nipasaile, a’jari bajiki akkala’na.

33Mallaka mae ri Batara, iami dasara’na ajarang bajika; kala’biranga nipirioloi ri matuna pa’maika.


  Share Facebook  |  Share Twitter

 <<  Amsal 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran