Alkitab Mobile SABDA
[VER] : [MAKASAR]     [PL]  [PB] 
 <<  Amsal 28 >> 

1Tau ja’dalaka lari nampa tena angngondangi, mingka tau lambusuka, barani sanrapang singa.

2Punna doraka bansaya, assisambe-sambeangi pamarentana; punna cara’de’ pamimpinga, lattahangi anjo bansaya siagang latuli kassaki.

3Pamarenta anjallakkangai tu kasi-asia, sanrapangi bosi sarro ammanrakia kattoang.

4Inai tanjampangiai hukkunga, agangi tau ja’dalaka; inai mannuruki ri hukkung, nabaliangi tau bambalaka.

5Kaadelanga tanapahangngai tau dorakaya, mingka tau anynyombaya ri Batara, napahang tojeng-tojengi.

6Bajikangngangi tu kasi-asi lambusuka pa’mai’na, kala tau kalumanynyang jekkonga.

7Turungka mannurukia ri hukkung, iami tu cara’de’. Mingka tau sileporanga tau pa’laboanga napakasiriki manggena.

8Inai a’jari kalumanynyang lanri appamanaki doe’ siagang angngalle passawallang ta’liwa’-liwa’, latu’guruki anjo barang-baranna mae ri tau mangngamaseanga ri tu kasi-asia.

9Punna tena numannuruki ri hukkunNa Allata’ala, latakkoa’ tongi Allata’ala ri pappala’ doannu.

10Inai anynyonyoki tau lambusuka sollanna a’gau’ ja’dala’, ia kalenna latu’guru’ antama’ ri sikko’ nitannanga. Tau ci’nonga pa’mai’na lanibarakkaki sa’genna mate’ne.

11Tau kalumanynyanga tuli nakana kalenna cara’de’, mingka tu kasi-asia, bajika akkala’na, naassengi angkana inai kalenna.

12Punna tau baji’ ammarenta, sannang ngasengi taua, punna tau ja’dala’ ammarenta, accokkoi ra’yaka.

13Inai ancokkoi dosana tena nalaupa’. Inai angngakui, lanabokoi, nampa laNikamaseang ri Batara.

14Tuli pakalompoi Batara, na nulamate’ne. Punna nubaliangi, langgappako bala.

15Tau ja’dalaka ammarenta ri tau kakuranganga, sanrapangi singa ammarrunga sa’ranna yareka beruang a’bakkaya.

16Tukoasa anjallakkangai tau maraenga, tena akkala’ baji’na; tukoasa birisika ri kajekkonganga lattaung taungi ammarenta.

17Tau ammunoa tulusu’ kammai tuniondang na kasia’ sa’genna narapi’ a’jala’na; manna sitau takkulle antahangi.

18Tau tenaya callanna lalang tallasa’na lasalamaki. Tau a’lekko-lekkoa tallasa’na, latu’guruki.

19Pamarri anjama terasaka lagannaki ri kanre; tau ampela’-pelakai wattunna lakakurangangi.

20Tau lambusuka laNibarakkaki ri Batara, mingka tau eroka linta’ kalumanynyang, takkulleai naliliang hukkunganga.

21Tabajikai nipasimmara’-maraeng taua; mingka nia’ todong haking ero’ a’gau’ jekkong lanri ero’na anggappa sike’de’ doe’.

22Tau angngoaya eroki linta’ kalumanynyang; tanaassengai kalenna angkana tasalloai nakakasi-asiang antujui.

23Tau appasailea, kale’bakkanna la’bi nipakalompoi na tau appalecea.

24Inai allukkaki tau toana siagang nakana teai dosa anjo kammaya, sangkammai palukka’-palukka’ maraenga.

25Punna kaparalluang kaleaji nicinikiang lappaumbai pa’beserang; la’bi upakkangngangko punna tappakko ri Batara.

26Inai manrannuang ri panggappang kalenna, tabajikai akkala’na. Inai ampinawangi ajaranna tau cara’deka lasalamaki.

27Inai assare ri tu kasi-asia tena nalakakurangang. Inai tanjampangiai kaparalluanna tu kasi-asia lanatabai pattunra.

28Punna tau ja’dala’ koasa, accokkoi ra’yaka; punna panra’ tau ja’dalaka, tau adeleka lammarenta siagang laluasa.


  Share Facebook  |  Share Twitter

 <<  Amsal 28 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel