Alkitab Mobile SABDA
[VER] : [MAKASAR]     [PL]  [PB] 
 <<  Amsal 8 >> 

1Pilangngeri! Akkio’-kioki kacara’dekanga, assa’rai pangngassenganga.

2Ammentengi ri bulu’-buluka ri biring aganga, siagang ri sikamma panyingkulu’na aganga.

3Ri pakke’bu’ lompoa, ri oloang antamaka ri kotaya, anjorengi kalangngerang sa’ranna, angkana,

4"He, umma’ rupataua, makkioka’ mae ri kau; tunggala’ rupatau ri lino, parhatikangi anne pakkiokku!

5Ikau tenayapa pangalamannu, appilajarakko ampatangi pikkirang taranga; ikau toloa, appilajarakko a’jari insa’.

6Parhatikangi kana-kanangku, lanri annabana ngaseng siagang baji’na matu-matunna.

7Apa kupaua, annaba ngasengi, saba’ kukabirisi balle-ballea.

8Kana-kanangku lambusu’ ngasengi, manna se’re tania’ a’jekko yareka sala.

9Untu’ tau cara’deka, annabai kanangku, untu’ mangngassenga, coco’ sikali kanangku.

10Anggaraki pappakaingakku la’biangngang na pera’ ti’noka paralluangngangi pangngassenganga la’biangngang na bulaeng ti’noka.

11Inakkemi kacara’dekang, la’biangngang anggaranna na barliang; takkulleai nipasanrapang siagang sikontu apa nukacinnaia.

12Inakkemi kacara’dekang; ri nakke nia’ pammahang; kacara’dekang siagang pangngassengang.

13Punna nipakala’biri’ Batara, battuanna nikabirisi kaja’dallanga; takungaiyai kaborroanga siagang katampoanga. Kukabirisi gau’-gau’ ja’dalaka siagang kana-kana annipua.

14Inakkemi assare pikkirang. Na inakke todong ampa’rupai. Inakke cara’de’ na kugassing todong pole.

15Sikamma karaenga kubantui anggaukangi pamarentahanga, sikamma tukoasaya kutulungi ampaentengi kaadelanga.

16Lanri jasaku, sikamma tumalompoa siagang bija karaenga ammarenta siagang napajappa kaadelanga.

17Kukamaseangi tau mangngaia mae ri nakke; inai amboya’, lanabuntulukka’.

18Ri nakke sadiai pakkalumanynyangnganga kammayatompa kalompoanga siagang kacopponganga.

19Apa nugappaya battu ri nakke la’biangngangi na bulaeng ti’noka; la’bi lompoangngangi anggaranna na pera’ ti’noka.

20Amminawanga’ ri oloang kaadelanga, a’dakka’ ri agang kalambusanga.

21Inai tau angkamaseanga’, kupa’jari kalumanynyangi; kupirassi balla’na siagang barang-barang.

22Inakke Napa’jari Batara a’jari uru-urua, inakkemi bate pare’Na ri pakkaramulaya ri jammang riolo dudu.

23Nipa’jaria’ battu ri pakaramulanna jammanga, ri pakaramulanna, ri tenanapa nipa’jari buttaya.

24Lassu’ memamma’ ri tenanapa nipa’jari tamparang lompoa, ri tenanapa nammumba sikamma kabattuanna je’neka.

25Inakke lassu’ memamma’ ri tenanapa nipaentengi sikamma monconga, ri tenanapa nibangungi sikamma bulu’-buluka,

26ri tenanapa Napa’jari Batara buttaya siagang sikamma paranna, ba’lalo ri tenanapa Napa’jari kangkanna butta uru-urua.

27Kusa’bi ri wattunna Napaka’rang langika, siagang ri wattunna Napabantang passimbanga rateanna tamparanga,

28ri wattunna Naboli’ Batara rammanga rate ri allaka, siagang Nasungke sikamma kabattuanna tamparang lompoa,

29ri wattunna Naparenta je’ne’ tamparanga sollanna tena nalaloi pa’baeng-baenna. Inakke nia’ tonga’ hadere’ anjoreng ri wattunna Napadongko’ pa’lapa’na buttaya.

30Niaka’ ri sa’rinNa a’jari ana’ nisayanNa, tunggala’ allo inakke kate’neanNa; tuli niakka’ akkarek-karena ri dallekanNa.

31Assannang-sannanga’ ri tompo’ buttaNa, na mate’ne pakkasiakku ri alla’na rupataua.

32Lanri kammana anjo, pilangngeria’, he tau rungkaya! Turuki pitunjukku, nulamate’ne.

33Tarimami pappakaingakku siagang a’jari mako cara’de’, teako bawang-bawangngangi.

34Mate’nei tau mappilangngeria ri nakke tunggala’ alloa ammempo antayanga’ ri pakke’bu’ ballakku, tuli a’jaga-jagaya ri pakke’bu’ lompona pammantangangku.

35Inai ambuntulukka’, anggappai katallassang, mangngellai Batara mae ri ia.

36Inai tena nabuntulukka’, napakarugi kalenna; tau birisika ri nakke, natanringi kamateanga."


  Share Facebook  |  Share Twitter

 <<  Amsal 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel