Dual Panel1Mingka appialimi Ayub angkana, "Tamaka cara’de’nu assare pannulung ri nakke tau lammaya siagang posoa!
2(26:1)
3Tamaka baji’na anjo pappakaingaka siagang pangngajaranga nupassareang mae ri nakke, anne tau dongoka!
4Inaika natuju anjo bicarannu? Inai assareko pitunju’ untu’ a’bicara kamma anjo?"
5Appialimi Bildad angkana, "Annekkereki sikamma tau niaka lalang ri linona tau matea; je’neka siagang bonena ta’ge’gosoki.
6Ri dallekanNa Allata’ala, tassungkei linona tau matea, tena tattongko’ sa’genna Nacini’.
7Naka’rangi Allata’ala langika irateanna tamparang lompoa, nampa nagentung buttaya ri alla’ tenaya bonena.
8Napierangngi rammanga siagang je’ne’ allumpa-lumpaya, mingka tena nakekke’ rammanga lanri battala’na.
9Nacokkoi rupanna bulanga ri bokona rammang le’baka Naka’rang.
10Nagambaraki bo’donga ri tompo’na tamparanga untu’ ansa’laki singaraka siagang sassanga.
11Punna angga’gara’ kamma sa’ra gunturu’, annekkereki sikamma benteng pattumpa’na langika.
12Napadundui tamparang lompoa lanri koasaNa siagang Naballassi Rahab lanri kaporeanNa.
13Nappasa’ antuiki langika sa’genna singara’ sikali; limanNa ambunoi naga eroka lari.
14Mingka yangasenna anjo kammaya poro pammateiji ri kakoasanNa poro pa’bici’naji battua mae ri tolinta. Tamaka sike’de’na pammahanta ri passala’ kahebakkanna koasaNa Allata’ala!"