Alkitab Mobile SABDA
[VER] : [MAKASAR]     [PL]  [PB] 
 <<  Ayub 30 >> 

1"Mingka anne kamma nicau-cauma’ ri tau la’bi rungkaya. Riolo manggena ke’nanga sanna’ kucini’ irawana untu’ anjagai gimbalakku siagang kongkong pakalawaki.

2Tena matu-matunna ke’nanga mae ri nakke lanri tenamo kagassinganna.

3Cipuruki ke’nanga siagang sanna’ pa’risi’na, sa’genna aka’ kayu kalotoro’ nakanre ri parang sinoa.

4Ammi’buki ke’nanga rompo’ ri parang lompoa nampa nakanre leko’na siagang aka’na.

5Nibongkai ke’nanga siagang pangga’gara’ sanrapang tau angngondanga palukka’.

6Ri kali’bong batuai ke’nanga ammantang; kali’bong sa’rinna monconga a’jari balla’na ke’nanga.

7Appiraung tojeng ke’nanga rapang olo’-olo’ ri romang, a’gompo-gompo rawanganna rompo’ katinting ri romang.

8Tena arenna ke’nanga siagang tena anggaranna, tau nibongkayamo battu ri pa’rasanganna.

9Anne kamma battumi ke’nanga siagang nakakkalima’; inakke anne, a’jarima’ tunikakkalinna ke’nanga.

10Nacini’ hinama’ siagang kodima’ ke’nanga, ba’lalo napi’rui ke’nanga rupangku.

11Lanri Napa’jarima’ Allata’ala tau lamma siagang tena kulleku, napa’bettese’ ngasemmi jallo’na ke’nanga.

12Nabakkaima’ anjo garombolanga battu ri dallekang, le’ba’ narancanami ke’nanga katu’gurangku.

13Napolongi ke’nanga oloangku untu’ ampanrakia’; manna sitau tania’ anrompai ke’nanga ri wattungku nabakkai.

14Sanrapang a’ba ke’nanga nalappoi tembo’ pattahangangku; assama-samai ke’nanga battu anjallakkangi tubuku.

15Nikalimbukima’ ri bala lompo; rapang anging mammiri’, allalomi anggaranna kalengku; rapang rammang allalo, tappela’mi mate’neku.

16Kamma-kamma anne a’birimma’ mate; tena karingangngang mae ri pa’risikku.

17Ri wattu bangngi tilu ngaseng buku-bukungku; tenammarina anno’do’ pa’risi’na.

18Naaccekanga’ Allata’ala ri kallong bajungku sa’genna ta’doleng pakeangku ri kalengku.

19Nipatappasakka’ antama’ ri peoka, a’jari sanrapang mama’ loro!

20Akkioka’ ri Katte, o, Allata’ala, na tena Kipialia’; punna appala’ doanga’, tena Kiparhatikangi.

21PallakKi’ mae ri nakke, Kijallakkanga’ siagang sikontu kagassinganTa.

22Kilappassanga’ niri’bakang ri anging; Kipata’ronang-ronanga’ lalang ri anging lompoa.

23Kuassengi, angkana Kieranga’ mange ri lino kamateanga, tampa’na nipasse’re sikamma apa attallasaka.

24Angngapa Kibakkai tau cilakaya, tamakkullea a’gau’ apa-apa, pantaranganna appalaka pangngamaseang?

25Sai sipangngarrukanga’ siagang tau susaya, siagang kukamaseangi tau kakuranganga?

26Kuminasai mate’nea siagang singaraka, mingka kasukkarrang siagang kasassangang battu.

27Nikekke’ma’ ri susa siagang salibanra; pila’ mae allo pila’ jai pa’risikku.

28Pitilampa-lampaima’ lalang ri sassang, tenaya singara’; ammenteng ri dallekanna tau jaia appala’ tulung.

29Si’na sa’rangku, jai kodongku, rapang karru’na serigala siagang jangang-jangang unta.

30A’jari le’lemmi bukkulengku; rapang nitunumi kalengku ri rammusu’.

31Riolo kulangngereki musi’ rannua, anne kamma poro karru’ na piraung mami."


  Share Facebook  |  Share Twitter

 <<  Ayub 30 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel