Dual Panel1Lanri tappa’ duduna Ayub ri annabana kalenna, tenamo nappiali pole anjo tallua aganna.
2Mingka anjoreng nia’ sitau niareng Elihu, ana’na Barakheel, turungang Bus battu ri golongang Ram. Tanakulleai natahang larrona, lanri Ayub nasalakangi Allata’ala nampa napattojeng kalenna.
3Larro tongi mae ri anjo tallua aganna Ayub, lanri tenana nakkulle nageakki kana-kananna Ayub, manna pole nasalakanja ke’nanga anjo Ayub.
4Anjo Elihu, iami kaminang lolo ri ke’nanga, lanri kammana attayammi sa’genna le’ba’ ngaseng taua a’bicara.
5Nacini’namo angkana takkulleami appiali anjo tau tallua, larromi,
6na nakana, "Inakke rungka ija’, ikatte ngaseng toa maki’, lanri kammana anjo, mallaka’ na kuranggasela ampaui panggappaku.
7Kupikkiriki, ikatteji musti a’bicara, ia la’bi toaya musti ambagei kacara’dekanna.
8Mingka assarea kacara’dekang mae ri rupataua, RohNa bawang Allata’ala Kaminang Koasaya.
9Na’jari cara’de’ taua, teai lanri toana umuru’na; na napahang taua annabaya, teai lanri tinggina umuru’na.
10Lanri kammana anjo, kipilangngeri sai kanangku; kilappassanga’ ampaui panggappaku.
11Sa’barakka’ ampilangngeri ngasengki’ ri wattunta a’bicara, na kuattayang ri wattunta a’boya kana-kana cara’de’.
12Kuparhatikang bajiki; kulangngereki tena kikullei. Takkulleai kipa’nyata kasalang niaka lalang ri kana-kananna Ayub.
13Antekamma bateta langkana ngaseng angkana kigappami kacara’dekanga? Lanri tarpassa nibeta ngaseng maki’, akkullea ampiali Ayub, Allata’ala bawang.
14Ikatte napa’bicarai Ayub, teai inakke, mingka tena kulappiali kamma ikatte ngaseng.
15O, Ayub, lingui ke’nanga, takkulleai ke’nanga appiali; tena akkulle napau ke’nanga.
16Ammenteng mami ke’nanga, takkulleami a’bicara. Maka musti attayanga’ manna na’merekimo ke’nanga?
17Tena, kamma-kamma anne lappialia’; lakupasuluki panggappaku.
18Tenamo kusa’bara’ attayang. Tenamo nakkulle kutahang bicarangku.
19Punna a’mereki bawanja’, lareppeka’ kusa’ring, sanrapang pammoneang rassia siagang anggoro’.
20Musti a’bicara’, sollanna sannang pa’maikku; musti appaua’ na kuappiali.
21Tena lakualleangang lalang ri anne pa’geakkanga siagang tena manna sitau lakupuji-puji.
22Manna appalecea, tena todong nakuassengi, na ebara’ angkana kuassengi kugaukang anjo kammaya, laNahukkung silalonna’ Allata’ala."