Dual Panel1"Kamma-kamma anne Ayub, pilangngeri bajiki anne kana-kana eroka kupabattu.
2Sadiama’ ero’ a’bicara.
3La’bicara’ silambusu’na pa’maikku; kana sitojenna lakupau.
4RohNa Allata’ala ampa’jaria’ siagang assarea’ tallasa’.
5Jari, punna akkullei pialia’ sinampe’. Pasadia memammi pappialinnu.
6Mae ri Allata’ala, ikau siagang inakke tena sisalata battu ri butta pi’ ngaseng jaki’ nipa’jari.
7Jari, tea’ mako mallaki ri nakke; tena ri atingku ero’ ambetako.
8Le’ba’mi kulangngere’ apa nupaua, siagang kupahammi apa nupakkanaya.
9Nukana, ‘Tangkasakka’, tena kasalang kugaukang. Tena callangku siagang tena kodi gaukku.
10Mingka a’boya-boyai alasang Allata’ala ambalianga’, siagang Napasangkamma’ musu.
11Narantei bangkengku; siagang Najannangngi gio’-giokku.’
12He Ayub, sala sikali antu panggappanu! Saba’ lompoangangi Allata’ala na rupataua.
13Angngapa nanusalakang Allata’ala angkanaya taNajampangiai kunrarenna rupataua?
14A’rupa-rupai bateNa Allata’ala a’bicara, mingka manna sitau tania’ amparhatikangi kana-kananNa.
15Kamanna nyamang tinrona taua ri wattu bangngia, A’bicarai Allata’ala lalang so’na siagang paccini’.
16Nasuroi Allata’ala taua mappilangngeri; Napata’bangkai taua siagang pappasaile.
17PattujunNa, sollanna ammari taua a’gau’ dosa na napammari ke’nanga nikanaya borro.
18TaNapa’biangngai ke’nanga ancuru’; Najagai ke’nanga battu ri kamateang.
19Napasailei Allata’ala taua nappabattu garring sa’genna pa’risi’ sibatu kalenna.
20Anjo lapung tau garring tena pattujunna angnganre, manna kanre kaminang nyamang kodi ngaseng.
21A’jari roso’ tena pamangeanna tubuna, buku-bukunna kacinikang ngaseng.
22La’birimmi ammotere’ ri anja a’reppese’mi lino kamateanga ri kalenna.
23Nakulle kapang kalase’renna sisa’bua malaeka’Na Allata’ala ampakaingakai rupataua ri tugasa’na, labattu antulungi.
24Tu’guru’ pangngamaseammi anjo malaekaka, nalanakana, ‘Kilappassangi, takkulleai naung ri linona tau matea. Apanne doe’ pappasulu’na, sollanna bebasa’ ammotere’.’
25La’jari sanna’ kassa’na kalenna akkamale kamma tau rungka.
26Punna appala’ doangi, lanikamaseangi ri Allata’ala, na lamammujimo mae ri Allata’ala siagang rannu pa’mai’ siagang lanipoterammi a’jari baji’ tallasa’na ri Allata’ala.
27Na lanakanamo ri dallekanna tau jaia, ‘Lompoi dosaku, lanri ja’dalaka kukana baji’, mingka tena Nahukkunga’ Allata’ala.’
28Natahamma’ Allata’ala sollanna tena kumange ri linona tau matea, sa’gengku nia’ ija attallasa’ kamma-kamma anne.
29A’mole-molemi Nagaukang Allata’ala yangasenna anne kammaya,
30sollanna akkulle Napasalama’ rupataua siagang Nasare mate’ne lalang tallasa’na.
31Jari pilangngeri Ayub, tannangi tolinnu a’merekiko, kamma-kamma anne inakke a’bicara.
32Mingka punna nia’ ero’ nupau, a’bicara mako; na punna ma’nassa annabako, inakke rella’ mangaku.
33Mingka punna tena, a’merekiko siagang pilangngeria’, erokka’ ampangngajarrangi kacara’dekanga mae ri kau."