Dual Panel1Ammarrangko, he Ayub, maka nia’ pappialinnu? Malaeka’ battu kemae nupappalakki bantuang?
2Tau toloaji bawang matea lanri pa’risi’ nyawana.
3Le’baka’ accini’ tau tolo; teai sipato’ baji’na tallasa’na nicini’. Mingka ti’ring mami kutunrai tampa’ pammantanganna.
4Jari tale’bakami ana’-ana’na anggappa pangngatutui; taniakka ero’ angngallei ke’nanga ri pangadelang.
5Apa nakattoa ke’nanga ri kokonna, la’busuki nikanre ri tau tenaya bone batanna. Ba’lalo gandung niaka ri tangnga rompo’ la’busu’ ngaseng napattasa’ tau cipuru’. Apa napatanga siagang kakalumanynyangnganna ke’nanga, tuli niodo’mi ri tau angngoaya ri barang-barang.
6Tena nabattu ri buttaya ammumba kaja’dallanga; tena nabattu ri buttaya ammumba kasusaanga.
7Tena! Passangalinna battu ri kalenna rupataua ampabattui cilakaya mae ri kalenna, sanrapang racci’ bunga pepe’ ammumba battu ri pepe’ kalenna.
8Ebara’ inakke natuju antu apa nukasiaka, lakkioka’ mae ri Allata’ala. Lama’rikonga’ mae ri Ia, na kuerang mae ri Ia parkaraku.
9Yangaseng bate pare’Na Allata’ala tamaka heba’na; takkulleai nipahang. Gau’-gau’ appakalannasa’ Napareka, takkulleai nibilang na tena la’busu’na.
10Appaturungi bosi ri buttaya, sa’genna nabasai kokoa siagang paranga.
11Iami Allata’ala ampakatinggi tau tunaya, ampakate’nei tau susaya.
12Napassalasai rancana akkala’ kodia, Napiallei sikko’ na Najakkala’ tau cara’de’ salaya, sa’genna tajaria sikontu usahana ke’nanga, na nitipumo ke’nanga ri akkala’ salana tonji.
13(5:12)
14Ri wattu singara’na alloa nitujui ke’nanga ri sassang, angngosala’ sangkamma ri wattu bangngi.
15Mingka Napasalamaki Allata’ala: tu kasi-asia battu ri kamateang, tu tuna pa’maika battu panjallakkang.
16Anne kamma nia’ pole pa’minasang mae ri tau tenaya pa’minasana. Na’mereki tamakkana-kana tau ja’dalaka, lanri nitongko’ bawana ri Allata’ala.
17Upakko punna Napasaileko Allata’ala! Teako la’ba pa’mai’nu punna Nacallako.
18Saba’ Allata’ala amma’risi, Ia todong ammallei. LimanNa annunrung, limanNa todong appakabaji’ ammotere’.
19Punna a’reppese’ bahayaya, tuli Napasalamakko.
20Punna battu kacipuranga, tena nulamate cipuru’. Punna kajariang bundu’ appakamallaka, amangko battu ri kamateanga.
21Najagaiko battu ri pitina siagang pangngompa salaya; tena numalla’ andallekangi balaya.
22Punna battu kapallakkanga siagang kacipuranga, lasa’barakko, ba’lalo ammakkalakko. Tena nulussa’ yareka malla’ nusa’ring, andallekangi olo’-olo’ sekkeka siagang pallaka.
23Tena batunna koko nupa’jekoa; tanabakkaiako olo’-olo’ liara’.
24Laamangko ammantang ri kemanu; na punna nuparessa sikamma gimbala’nu, salama’ ngasengi, tena kakuranganna.
25Ana’-cucunnu takkulleai lanibilang jaina, sanrapangi ruku’ ri parang jaina ke’nanga.
26Sanrapang gandung toa, nikattoi ri wattunna, ikau pole labajiki tallasa’nu sa’gennu toa.
27O, Ayub, yangasenna anjo kammaya le’baki naparessa ikambe. Annabai anne kana-kanaya, jari tarima mami."