Dual Panel1Naparentakangi Batara mae ri Musa siagang Harun
2untu’ ampassareangi anne paratorang-paratoranga mae ri bansa Israel: Angngalleko sikayu sapi gana, ia sikolaka tanja’na siagang tenaya callanna kammayatompa tenayapa nale’ba’ nipake untu’ atteke’ apa-apa.
3Passareangi anjo sapia mae ri Imang Eleazar. Anjo olo’-oloka musti nierangi assulu’ ri pantaranganna pakkemaanga, nampa nisamballe ri dallekanna imanga.
4Nampa musti angngalle Eleazar sike’de’ cera’na anjo olo’-oloka siagang naparacci’ pintuju mae ri KemaNa Batara.
5Sikontu anjo olo’-oloka, kammayami kukkulu’na, dagenna, cera’na siagang bone parru’na, musti nitunui ri dallekanna imanga.
6Nampa imanga musti angngallei sike’de’ kayu arasa’, sitangke hisop siagang otere’ eja, nampa napasambila antama’ ri pepeka, ia a’rinraya antunui anjo sapi sikolaka.
7Nampa musti nasassai pakeanna siagang a’je’neki imanga. Le’baki anjo akkullemi antama’ ri pakkemaanga, mingka tuli ra’masa’na ija sa’genna labu alloa.
8Anjo tau antunuai anjo sapia musti nasassa tongi pakeanna siagang musti a’je’neki; ia ra’masa’ tongiji sa’genna labu alloa.
9Nampa se’reang tau ra’masaka ampasse’rei auna anjo sapia siagang napadongkoki ri tampa’ tangkasaka ri pantaranganna pakkemaanga. Anjo aua niboliki anjoreng sollanna akkulle napake tu Israel untu’ appare’ je’ne’ upacara pannangkasi mae ri dosaya.
10Anjo tau ampasse’reai anjo auna sapia musti nasassai pakeanna, mingka ra’masa’ iji sa’genna labu alloa. Anne paratoranga nipakei sa’genna satunggu-tungguna, baji’ mae ri tu Israel kammayatompa mae ri bansa maraeng ammantang tulia ri tangnga-tangngana ke’nanga.
11Tau niseroa ri maya’ a’jari ra’masaki sa’genna tuju allo.
12Ri allo makatallua siagang makatujua musti natangkasi kalenna siagang je’ne’ upacara; punna le’baki, nampami a’jari tangkasa’. Mingka punna ri makatalluna alloa siagang ri makatujuna alloa tena natangkasi kalenna, tuli ra’masa’na.
13Tau naseroa maya’ siagang tenaya natangkasi kalenna anjari ra’masaki, lanri tenanapa nanitiriki siagang je’ne’ upacara. Nara’massi KemaNa Batara siagang lanri kammana anjo tenamo nanibilangi anggota umma’Na Allata’ala.
14Punna nia’ tau mate lalang ri se’reang kema, manna inai antama’ yareka nia’ lalang ri anjo kemaya, a’jari ra’masaki lalang tuju allo.
15Sikontu bongkia siagang uring tenaya pattongko’na a’jari ra’masa’ ngaseng tongi.
16Sikamma tau niseroa ri maya’na tau mate nibunoa, yareka mate kalenna ri kokoa, a’jari ra’masaki lalang tuju allo. Kamma tomminjo tau anseroai jera’na yareka bukunna tau matea.
17Untu’ pannangkasinna anjo tau ra’masaka, musti niallei sike’de’ au battua ri sapi sikola’ le’baka nitunu untu’ pannangkasi dosaya. Anjo aua musti nipantamaki ri se’reang uring, nampa nisare je’ne’ assolonga.
18Lalang ri anjo passala’ makase’rea, iamintu punna nia’ tau mate lalang ri kemaya, tau tenaya nara’masa’ musti angngallei sitangke hisop, nampa najallakkang antama’ ri anjo je’neka, nampa napiracciki anjo kemaya siagang sikontu apa-apa niaka lalang, kammayatompa sikamma tau niaka anjoreng. Lalang ri passala’ makaruaya, iamintu punna nia’ tau nisero ri maya’, jera’ yareka buku tumate, tau tenaya nara’masa’ musti napiracciki anjo tau ra’masaka kamma sumpaeng.
19Musti napiracciki ri allo makatallua siagang ri allo makatujua. Ri anjo allo makatujua le’ba’mi anjo allo pannangkasinna anjo tau ra’masaka. Anjo taua musti nasassai pakeanna siagang musti a’je’neki. Appakkaramula ri wattu labuna alloa a’jari tangkasa’mi.
20Tau a’jari ra’masaka siagang tena nagaukangi upacara pannangkasia ri kalenna, tuli ra’masa’na lanri tenapa nanitiriki siagang je’ne’ upacara. Nara’massi KemaNa Batara, siagang tenamo nanibilangi anggota umma’Na Allata’ala.
21Anjo paratoranga nipakei untu’ satunggu-tungguna. Anjo tau ampiraccikiai anjo je’ne’ upacaraya musti nasassa tongi pakeanna, siagang anjo tau natabaya anjo je’neka a’jari ra’masaki sa’genna labu alloa.
22Barang naseroa anjo tau ra’masaka a’jari ra’masaki, siagang tau maraeng asseroai a’jari ra’masa’ tongi sa’genna labu alloa.