Alkitab Mobile SABDA
[VER] : [MAKASAR]     [PL]  [PB] 
 <<  Bilangan 23 >> 

1Nakanamo Bileam mae ri Balak, "Ambangung mako ri anne tampaka tuju tampa’ pakkoro’bangngang untu’ inakke, siagang appasadia mako anrinni tuju kayu sapi laki siagang tuju kayu gimbala’ laki."

2Nagaukammi Balak anjo apa nakananga Bileam ri ia. Irateanganna sikontu anjo tampa’ pakkoro’bangnganga assaremi ke’nanga tassikayu sapi laki siagang sikayu gimbala’ laki.

3Nampa nakana Bileam mae ri Balak, "Ammenteng maki’ ri ampi’na koro’bang nitununa karaengku. Lalang kammana anjo a’lampa’ mange anciniki apaka ero’ji Batara angngaganga’ sibuntulu’ yareka tena. Sallang lakupaui mae ri kau sikontu apa Napaua Batara mae ri nakke." Jari a’lampami Bileam kale-kalenna mange ri coppo’na se’reang bulu’,

4nampa anjoreng nia’mi Allata’ala battu mae ri ia. Nakanamo Bileam mae ri Allata’ala, "Le’bakka’ ambangung tuju tampa’ pakkoro’bangngang siagang assare sikayu sapi laki kammayatompa sikayu gimbala’ laki irate ri massing anjo tampa’ pakkoro’bangnganga."

5Nampa Napabattumo Batara mae ri Bileam apa musti napau, siagang Nasuromi ammotere’ mange ri Balak untu’ ampabattui pasanNa Batara mae ri ia.

6Ammotere’mi Bileam siagang narapikammi Balak nia’ ija ammenteng ri ampi’na koro’bang nitununa, siagang sikamma pamimpinna tu Moab.

7Nampa napaumo Bileam anne botoa angkana, "Battu ri Aram, ri moncong niaka iraya, nakioka’ Balak, karaenna tu Moab, angkana, ‘Battuko mae, a’bicara untu’ inakke. Tunrai anjo bansa Israel.’

8Maka akkullea’ attunra, punna tena Nattunra Allata’ala? Maka akkullea’ anghukkungi taua, punna tena naKalenNa Batara anghukkung?

9Battu irate ri coppo’-coppo’na monconga kucini’ ke’nanga; battu ri bulu’-buluka kuparhatikang ke’nanga. Ciniki, nia’ se’re bansa akkale-kale tenaya nantama’ ri golonganna bansa-bansa maraenga.

10Jari-jarina Yakub rapangi au takkulleai nibilang; bansa Israel teai sipato’ jaina. Dasi-dasi nakumate salaku tau lambusu’ poro anjo a’jalakku sangkamma a’jala’na anjo tau kammaya."

11Nampa nakanamo Balak mae ri Bileam, "Apa kutadeng anne nugaukang mae ri nakke? Kuerangko mae anrinni untu’ antunrai musu-musungku. Mingka ikau ba’lalo battu jako untu’ ambarakkaki ke’nanga."

12Appialimi Bileam angkana, "Inakke iaji bawang akkulle kupau apa Nasuro paua Batara."

13Nampa nakana Balak ri Bileam, "Umba ki’lampa siagang mange ri tampa’ maraenga; battu anjoreng akkullei nucini’ poro sipa’gang bawang bansa Israelka. Tunrami ke’nanga battu anjoreng."

14Jari nierammi Bileam ri Balak mange ri parang Zofim, ri coppo’na Moncong Pisga. Anjoreng appaenteng tommi tuju tampa’ pakkoro’bangngang siagang assare tommi sikayu sapi laki siagang sikayu gimbala’ laki irate ri anjo massing tampa’ pakkoro’bangnganga.

15Nakanamo Bileam ri Balak, "Ammantang mako anrinni ri ampi’na tampa’ koro’banna karaengku, nampa ku’lampa assibuntulu’ siagang Batara anjoreng."

16Battumi Batara angngagangi assibuntulu’ Bileam nampa Napauang apa mustia napau, nampa Nasuro ammotere’ mange ri Balak untu’ ampabattui anjo pasanNa Batara.

17Jari ammotere’mi Bileam. Narapikammi nia’ iji Balak ammenteng ri ampi’na koro’bang nitununa, siagang ngaseng sikamma pamimpinna tu Moab. Napakkuta’nangngammi Balak apa le’baka Napau Batara,

18nampa napaumo Bileam anne boto kammaya, "He, Balak, ana’na Zipor, battu mako mae, pilangngeri apa eroka kupau.

19Anjo Allata’ala tena nasangkamma rupataua gampanga assesse’ lalang siagang nangaia a’balle-balle. Punna a’janji Allata’ala, mattantu laNarupai! Punna a’bicarai, tena taNagaukanNa!

20Nisuroa’ assare barakka’; siagang punna Allata’ala assare barakka’, takkulleai kubeso’ ammotere’.

21Tena kaja’dallang nicini’ ri kalenna Yakub; tena kasukkarrang nicini’ ri tu Israel. Batara, Allata’alana ke’nanga, anrurungangi ke’nanga. Akkio’ rannui ke’nanga angkana: Iami Karaeng!

22Allata’ala angngerangi ke’nanga assulu’ battu ri butta Mesir; rapang tedong romang liara’ a’bundu’ ansambeangi ke’nanga.

23Tena pangngissengang akkulle andallekangi Yakub tena baca-baca makoasa mae ri tu Israel. Ri passala’na anjo bansaya nakana taua, ‘Ciniki gau’ malompo Nagaukanga Allata’ala!’

24Ambangungi anjo bansaya rapang singa gana, nampa ammenteng kassa’ rapang singa laki. Tanra’bayai punna tenapa nakanrei musunna siagang tanainunga cera’na koro’bang le’baka nakokko’."

25Nampa nakanamo Balak mae ri Bileam, "Sikamma monjo, punna taerokako antunrai bansa Israel; mingka tea sikali-kaliko barakkaki ke’nanga!"

26Appialimi Bileam angkana, "Sai le’ba’mi kupau mae ri katte karaeng angkanaya lakugaukangi sikontu apa Naparentakanga Batara?"

27Nakana Balak, "Umba ki’lampa mange ri tampa’ maraenga. Inai angngassengi gassingka napa’biang jako Allata’ala antunrai bansa Israel untu’ inakke ri anjo tampaka."

28Jari naerammi Bileam mange ri coppo’na Moncong Peor assidallekanga siagang parang lompoa.

29Nakanamo Bileam mae ri Balak, "Appaentengko tuju tampa’ pakkoro’bangngang ri anne tampaka siagang appasadiako anrinni tuju kayu sapi laki siagang tuju kayu gimbala’ laki."

30Nagaukammi Balak anjo apa nakananga Bileam. Nakoro’bangkammi sikayu sapi laki siagang sikayu gimbala’ laki irate ri tunggala’ anjo tampa’ pakkoro’bangnganga.


  Share Facebook  |  Share Twitter

 <<  Bilangan 23 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel