Dual Panel1Sikamma kapala kaluargaya lalang ri Golongang Gilead, ana’na Makhir, iamintu cucunna Manasye, ana’na Yusuf, a’lampai mange andallekang ri Musa siagang sikamma pamimping maraenganga.
2Nakana ke’nanga, "Nasuro ngasengki’ Batara ambagei anjo buttaya mae ri tu Israel, iamintu nigoccangi na niloterei. Nasuro tongki’ ampassareangi butta pisakana sari’battanna ikambe iamintu Zelafehad mae ri ana’-ana’na bainea.
3Mingka parallui niu’rangi angkanaya anjo ke’nanga punna a’buntingi siagang bura’ne battu ri suku maraenga, anjo buttaya tu’guru’ mangemi ri anjo sukua. Jari pila’ kurammi anjo butta le’baka nipattantu untu’ a’jari daerana ikambe.
4Punna wattu Taung Pammoterang, ri wattunna nipoterang ngaseng barang-barang le’baka nibalukang mae ri uru patannaya, anjo buttana ana’-ana’ bainena Zelafehad tuli lanakammaina bura’nenna ke’nanga, sa’genna tappela’mi anjo buttana sukuna ikambe."
5Nampa napabattumo Musa anne parentaNa Batara mae ri bansa Israel, angkanaya, "Annabai anjo apa napaua jari-jarina Yusuf,
6na lanri kammana anjo Napaumi Batara angkanaya sikamma ana’-ana’ bainena Zelafehad akkullei a’bunting manna pole siagang inai, ia nangaia ke’nanga, assala’ a’julu sukui siagang ke’nanga.
7Sikontu butta pisakana tu Israel latuli tassikkoki mae ri sukuna.
8Sikamma baine annarimaya warisi’ butta pisaka lalang kalase’renna suku bansa Israel, musti tau lalanga todong anjo sukua naagang a’bunting. Jari kammaminjo namassing nawarisi’mo sikamma tu Israel butta pisakana massing boe-boena,
9sa’genna tena na’lette’-lette’ anjo butta pisakaya mae ri suku maraenga. Massing-massing suku Israel latuli napatangi butta pisaka kalenna."
10Jari, situru’ parentaNa Batara mae ri Musa, anjo limaya ana’ bainena Zelafehad, iamintu Mahla, Tirza, Hogla, Milka, siagang Noa, a’buntingi siagang ana’-ana’ bura’nena sari’battanna manggena ke’nanga.
11(36:10)
12A’buntingi ke’nanga siagang golongang-golongang niaka lalang ri suku bansa Manasye, ana’na Yusuf. Jari anjo butta pisakana ke’nanga tuli napatangi suku bansana manggena ke’nanga.
13Iaminjo paratorang-paratorang siagang katantuang-katantuang Napassareanga Batara mae ri bansa Israel tete ri Musa, wattunna nia’ bansa Israel ri lappara’ Moab ri biring Binanga Yordan, ri ampi’na kota Yerikho.