Dual Panel1Ri se’reang bangngi, ri taung makase’re Belsyazar a’jari karaeng ri Babel, inakke, Daniel, asso’na’ siagang anggappa’ paccini’. Anjo so’naya kucataki siagang anjo apa kucinika kamma minne caritana: Anging sarroa ammiriki battu kere-keremae, sa’genna appabattu bombang lompo ri tamparang lompoa.
2(7:1)
3Nampa nia’mo appa’ olo’-olo’ sannaka lompona ammumba battu lalang ri je’neka, tenaya nasangkamma-kamma.
4Makase’rea sangkammai tanja’na singa, mingka nia’ ka’nyi’na iamintu ka’nyi’ jangang-jangang garuda. Ri wattunna kuciniki, ti’ring ta’bi’bu’mi ka’nyi’na nampa ta’lappasa’; ta’angkaki battu ri buttaya nampa nipaenteng lambusu’ ri ruaya bangkeng sangkamma tau, nampa nisare akkala’ rupatau.
5Olo’-olo’ makaruaya sangkammai tanja’na beruang. Ammentengi siagang bangkeng ri bokoa, siagang angngerangi tallumpolong buku rusu’ ri gigi-giginna. Nia’ sa’ra kulangngere’ angkana ri ia, "Angnganre mako dageng siapa-siapa jaina nungaia!"
6Ri wattunna kuparhatikang, nia’mo olo’-olo’ maraeng ammumba. Tanja’na sangkammai macang, mingka ri dongko’na nia’ appa’ ka’nyi’ jangang-jangang, siagang appaki ulunna. Kammai nicini’ apa nipangngaliki.
7Lalang kuparhatikanna anjo, nia’mo ammumba olo’-olo’ makaappa’. Sanna’ kassa’na siagang heba’na, kammayatompa appakamalla’-mallaki nicini’. Gigi-giginna lompoi siagang kassaki kamma bassi; iaminjo napake angkokkoki siagang allicaki apa-apaya, nampa naonjo’-onjokang sesanna. Sisalai siagang anjo olo’-olo’ rioloangannaya, nasaba’ ia sampuloi tanru’na.
8Lalang kuparhatikanna tanru’-tanru’na, ti’ring nia’mo se’re tanru’ maraeng attimbo ri alla’-alla’na. Anjo tanruka ca’di, mingka akkullei nasorongang siagang nabi’bu’ tallu battu ri anjo tanru’ rioloangannaya. Anjo tanru’ ca’dia nia’ matanna sangkamma mata tau siagang nia’ bawana accarita tampoa.
9Lalang tulusu’ kuparhatikanna, nia’mo siapa are empoang karaeng nipadongko’. Nampa Ia mattallasaka satunggu-tungguna niaki ammempo irate ri kalase’renna anjo empoang kakaraenganga. PakeanNa siagang uu’Na sanna’ kebo’na rapang kapasa’. Empoang kakaraenganNa siagang roda-rodana a’rinra-rinrai lanri pepe’ lompo,
10kammayatompa nia’ pepe’ a’lo’loro’ battu ri anjo empoang kakaraenganga. Assa’bui tau allayani, siagang a’juta-jutai tau ammenteng ri dallekanNa. Nampa nipakaramulamo sidang pangadelanga, siagang nisungkemi kitta’-kittaka.
11Lalang kuparhatikanna, tuli kulangngere’na ija anjo tanru’ ca’dia a’bicara kosong siagang tampo. Nampa nibuno anjo olo’-olo’ makaappaka, siagang nipasambilai maya’na antama’ ri pepeka sa’genna ancuru’ taba sikali.
12Olo’-olo’ maraengannaya le’ba’mi nialle koasana, mingka nipa’biangi ke’nanga attallasa’ sa’genna wattu le’baka nipattantu.
13Lalang paccinikku ri anjo bangngia, nia’ kucini’ sangkamma rupatau. Battui na nikulilingi ri rammang, nampa a’lampa mange ri Ia anjo mattallasaka satunggu-tungguna siagang nipappiassengang mae ri ia.
14Nisarei kalompoang siagang kakoasanga salaku karaeng, sa’genna sikamma tau battua ri sikontu bansaya, suku bansaya siagang bahasaya napare’ atai kalenna mae ri ia. Lattahangi kakoasanna satunggu-tungguna, siagang pamarentahanna tena nalanigulung.
15Sikamma anjo apa kucinika napakalingui siagang napakalussaki pa’maikku.
16Nampa kureppesi kalase’renna tau niaka ammenteng anjoreng siagang appalakka’ kasingarang ri passala’na yangasenna anjo kammaya. Jari napauamma’.
17Nakana, "Anjo appaka olo’-olo’ sanna’ lompona, iamintu appa’ kakaraengang lammumba ri lino.
18Mingka umma’Na Allata’ala Kaminang Tinggia lannarimai ha’ untu’ ammarenta siagang anjo pamarentahanna lattahangi satunggu-tungguna."
19Nampa erokka’ angngassengi battuanna anjo olo’-olo’ makaappaka, tenaya nasangkamma maraenga; appakamalla’-mallaki tanja’na siagang naancuruki nanaa’lu’ apa-apa nakanrea siagang kanuku tambagana kammayatompa gigi bassina, nampa naonjo’-onjokang sesa-sesanna.
20Ero’ tongi kuasseng battuanna anjo sampuloa tanru’ ri ulunna siagang anjo tanru’ ca’di ammumbaya ri boko nampa nabi’bu’ tallua tanru’ rioloangannaya. Anjo tanru’ ca’dia nia’ matanna siagang bawana a’bicara kosonga siagang tampoa. La’bi appakamalla’-mallakkangngangi naanjo tanru’-tanru’ maraenganga.
21Ri wattunna kuparhatikang, a’bunduki anjo tanruka siagang umma’Na Allata’ala siagang nabetai ke’nanga.
22Nampa Ia anjo mattallasaka satunggu-tungguna battui nampa assare kaputusang Napattojeng umma’Na Allata’ala Kaminang Tinggia. Narapi’mi wattunna ke’nanga annarima koasa untu’ ammarenta.
23Iaminne kasingarang kugappaya, "Anjo olo’-olo’ makaappaka iamintu kakaraengang makaappa’ lania’ ammenteng ri lino, siagang tena nasangkamma kakaraengang maraenganga. Anjo kakaraenganga lanaancuruki siagang lanaa’luki sikontu buttaya nampa naonjo’-onjokang sesanna.
24Anjo sampuloa tanru’ iamintu sampuloa karaeng lammarentaya ri anjo kakaraenganga. Nampa nia’ sitau karaeng maraeng lammumba; tena nasangkamma siagang karaeng-karaeng rioloangannaya, siagang lanabetai tallua karaeng.
25Bicaranna langngewai ri Allata’ala Kaminang Tinggia siagang lanajallakkangi umma’Na Allata’ala. Eroki napinra sikamma hukkung-hukkung siagang allo lompona agamana umma’Na Allata’ala, siagang lanikoasai ke’nanga lalang tallu assitangnga taung.
26Nampa lassidangi pangadelanga ri suruga siagang lanabi’buki kakoasanna kammayatompa lanaancuru’ taba sikali.
27Koasana siagang kalompoanna sikontu kakaraenganga ri buttaya lanipassareangi mae ri umma’Na Allata’ala Kaminang Tinggia. Koasana ke’nanga untu’ ammarenta tena kala’busanna siagang sikontu pamarentaya ri buttaya lanapa’jari atai kalenna mae ri ke’nanga, siagang lamannuruki ri ke’nanga."
28Sikammami anne carita kupabattua. Sanna’ lussakku sa’genna pi’lasa’ tanjakku, mingka tena manna sitau kupauang anne passalaka ngaseng.