Dual Panel1Ri taung makase’re pamarentahanna Darius tu Media, ana’ bura’nena Ahasyweros, mae ri kakaraengang Babel, inakke Daniel, ammaca-maca’ kitta’-kitta’ agama. Kunawa-nawai angkanaya turu’ kananNa Batara mae ri Na’bi Yeremia, kota Yerusalem tuli runtunna lalang tujupulo taung sallona.
2(9:1)
3Nampa attojeng-tojemma’ appala’ doang mae ri Karaeng Allata’ala, na kupala’ pangngamaseanNa. Appuasama’ siagang ammakema’ pakeang karung nampa ammempo irate ri aua.
4Sikontu dosana bansaku kuakui mae ri Karaeng Allata’alaku. Kukana, "O Karaeng Allata’ala, iKatte malompo, na ikambe mappakalompo ri Katte. Tuli Kirupai janjinTa siagang Kipa’nyatai pangngamaseang tamattapputTa mae ri ke’nanga mangngamaseanga ri Katte siagang anggaukangai apa Kiparentakanga.
5Dorakami ikambe, a’gau’ ja’dala’mi ikambe, siagang nagaukammi ikambe kasalanga. Pabali-balimi ikambe siagang nadakkai ikambe parentaTa, kammayatompa ammengkai ikambe battu ri paratorang-paratoranTa.
6Tena namappilangngeri ikambe mae ri na’bi-na’bia, iamintu ata-atanTa, le’baka a’bicara lalang arenTa mae ri sikamma karaenna ikambe, mae ri sikamma pamimpinna ikambe, mae ri boe-boena ikambe kammayatompa mae ri sikontu bansana ikambe.
7O Batara, tindakanTa tuli annabai siagang adeleki, mingka ikambe tonji tuli ampakasiriki kalenna ikambe, iamintu ikambe ngaseng ammantanga ri Yudea siagang ri Yerusalem, siagang sikontu julu bansana ikambe le’baka Kipasiara’ mange ri pa’rasangang-pa’rasangang bellaya siagang ambania, lanri tenana namajarre’ tappa’na mae ri Katte.
8Sikamma karaenna ikambe, pamimpinna ikambe siagang boe-boena ikambe, nagaukammi apa-apa appakasirika siagang dorakami mae ri Katte, o Batara.
9Lammoro’ pangngamaseangKi’ siagang laboKi’ ri pammopporo’, manna pole nanangai ikambe angngewaya.
10Tena nappilangngeri ikambe mae ri kananTa, o Karaeng Allata’alana ikambe; ri wattunna Kisuro ikambe tallasa’ situru’ hukkung-hukkung Kipassareanga mae ri kambe tete ri anjo atanTa na’bi-na’bia.
11Sikontu tu Israel nadakkaimi hukkung-hukkunTa siagang taerokami ampilangngeri kananTa. Dorakami ikambe mae ri Katte. Lanri kammanami anjo naKipabattu mae ri kambe pangngalarroinTa, ia niaka tattulisi’ lalang ri kitta’na Musa, atanTa.
12TindakanTa sicoco’ le’baki apa le’baka Kipa’janjiang mae ri kambe siagang mae ri pamarentana ikambe. Le’ba’mi Kihukkung kota Yerusalem la’bi sannakkangngang nakota maraenga ri anne linoa.
13Sikontu anjo bala niaka tattulisi’ lalang ri Hukkung napabattua Musa le’ba’mi Kipitujui ikambe. Mingka manna nakamma mamo, o Karaeng Allata’alana ikambe, tuli teana ija ikambe ampakasannangi atinTa. Tuli tenana naero’ ikambe ambokoi dosa-dosana ikambe siagang taerokai ikambe amparhatikangi ajarang-ajaranTa.
14IKatte, o Karaeng Allata’alana ikambe, le’ba’ anghukkungi ikambe iamintu bala le’baka Kipasadia; tindakanTa tuli annabai siagang adeleki, mingka ikambe tamappilangngeria ri kananTa.
15O Batara, Allata’alana ikambe, iKatte le’ba’ ampa’nyatai kakoasanTa. Iamintu Kieranna ummatTa assulu’ battu ri Mesir, siagang anjo kakoasanTa tuli niu’ranginna. Dorakami ikambe siagang nagaukammi ikambe kasalanga.
16Le’ba’mi Kiallei ikambe ri jammang riolo, lanri kammana anjo tea maKi’ larroi pole mae ri Yerusalem, kota KalenTa, bulu’ matangkasatTa. Lanri dosana ikambe siagang kaja’dallanna boe-boena ikambe, nasikontu tau niaka ri tammulilina ikambe nacini’ tunami kota Yerusalem siagang ummatTa.
17O Allata’alana ikambe, Kipilangngeri laloi pappala’ doangku siagang sambayangku. Kipakabajiki ammotere’ anjo ballatTa le’baka niancuru’; Kipakabajiki sollanna sikontu taua akkullei naasseng angkanaya iKatte Allata’ala.
18Kipilangngeri laloi ikambe, o Allata’ala, Kiciniki siagang Kiparhatikangi kasessanna ikambe kammayatompa kapanrakanna kota nigallaraka situru’ arenTa. Appala’ doangi ikambe mae ri Katte teai lanri jasa-jasana ikambe, passangalinna lanri lompo pangngamaseanTa.
19O Batara, Kiparhatikang laloi ikambe siagang linta’ maKi’ angngalle tindakang! TeaKi’ sallo-salloi, sollanna naasseng sikontu taua angkanaya iKatte Allata’ala. Nasaba’ Yerusalem siagang ummatTa iKatte ampatangi, le’baka Kisa’la’ untu’ iKatte."
20Tulusu’ appala’ doamma’ siagang kuanimi dosaku kammayatompa dosana bansaku Israel. Appala’ doang tonga’ mae ri Karaeng Allata’alaku sollanna Napakabaji’ ammotere’ balla’ matangkasa’Na.
21Lalang appala’ doangku, anjo Gabriel, le’baka kucini’ lalang paccinikku riolo, nia’mi anri’ba’ a’lampa mae ri nakke. Anjo wattua narapi’mi wattunna taua assare koro’bang karueng.
22Nampa napakasingara’mo Gabriel kamma anne, "O Daniel, battua’ anne untu’ ambantuko ampahangi anjo botoa.
23Ri wattunnu appakkaramula appala’ mae ri Allata’ala, appialimi. Battua’ anne ampabattuangko lanri Nakamaseangko Allata’ala. Jari pilangngerimi baji’-baji’ nakupakasingara’ battuanna anjo apa nucinika.
24Pintuju tattujupulo taung iamintu wattu le’baka Napattantu Allata’ala untu’ ampakabebasaki bansanu siagang anjo kota matangkasa’nu battu ri dosa-dosaya siagang kaja’dallanga. Sikontu dosaya lanipammopporangi siagang lanipaentengi kaadelang tamattappuka, sa’genna a’rupa anjo paccinika siagang botoa, kammayatompa anjo Balla’ Matangkasa’Na Batara lanipangngadakkangi ammotere’ mae ri Batara.
25Cataki siagang pahangi anne: Lallaloi pintuju tattuju taung, appakkaramula ri wattu nipasulu’na parentaya untu’ ambangungi ammotere’ Yerusalem, sa’genna battu sitau pamimping Napilea Allata’ala. Lalang pintuju ta’annampulo anrua taung, lanibangungi ammotere’ agang-aganga siagang pa’balla’-ballakanna Yerusalem, mingka anjo wattua teai sipato’ sukkara’na.
26Ri kala’busanna anjo jammanga lanibunoi pamimping Napilea Allata’ala, padahala’ tena salana. Nampa battumo tantarana sitau karaeng kassaka, na naancuru’ kota Yerusalem siagang Balla’Na Batara. Anjo kala’busang jammanga labattui rapang a’ba angngeranga pa’bundukang siagang kaancurang, situru’ le’baka Napattantu Allata’ala.
27Anjo karaenga lappareki parjanjiang majarre’ siagang tau jaia lalang tuju taung. Ri attangngana anjo jammanga lanasuro pamarimi nikanaya assare koro’bang siagang passare. Nampa nia’ apa appakamalla’ iamintu niarenga Kaja’dallang angngancuruka, laniboli’ ri Balla’Na Batara siagang latuli nia’na anjoreng sa’genna anjo tau ambolikai anjoreng nitujumi kapanrakang le’baka Napattantu Allata’ala untu’ anjo taua."