Dual Panel1Nalangngere’na Mordekhai anjo apa kajarianga, nakekke’mi pakeanna, nampa ammake kaeng karung, a’jari pammatei angkana si’nai. Nakiorimi au ulunna, nampa a’jappa ri kotaya angngarru’ lompo appakadinging-dinging pa’mai’.
2Battuna mae ri dallekang pakke’bu’ lompona balla’ karaenga ammantammi, nasaba’ tanipa’biangngai antama’ tau ammakea kaeng karung.
3Kammayatompa ri sikontu daera propinsia, appiraung ngasemmi nalangngere’na nipa’la’bang parentana karaenga. Appuasami ke’nanga, angngarru’ siagang akkunrareng, siagang jaimi ri ke’nanga ammake kaeng karung siagang attinro rate ri aua.
4Ri wattunna napabattu sikamma tuloloa siagang palayang allayaniai Ester mae ri ia anjo apa nagaukanga Mordekhai, a’jari si’na sikalimi pa’mai’na Ester. Akkirimmi pakeang mae ri Mordekhai untu’ ansambei kaeng karunna, mingka taerokai Mordekhai antarimai.
5Nampa nakio’ Ester tu niarenga Hatah, kalase’renna tunisuroa ri karaenga allayani Ester. Nasuroi Hatah mange ampakkuta’nangngangi ri Mordekhai angkana apamo kajariang siagang angngapa na’gau’ kamma anjo.
6Jari a’lampami Hatah mange ri Mordekhai niaka ri paranna kotaya, ri dallekang pakke’bu’ lompona balla’ karaenga.
7Nacaritami Mordekhai ri ia apa kajarianga siagang angkana siapa jaina doe’ pera’ le’baka napa’janjiang untu’ napantama’ ri pammolikang doe’na karaenga, punna le’ba’mo naputta sikontu tu Yahudia.
8Napassareang tommi Mordekhai mae ri Hatah salinanna anjo sura’ le’baka napasulu’ karaenga ri kota Susan, iamintu parenta untu’ amputtai nisuro buno tu Yahudia. Nasuromi Hatah ampassareangi anjo suraka mae ri Ester siagang napakasingara’ anjo passalaka mae ri ia. Nasuro pala’ tommi sollanna mange Ester andallekang ri karaenga untu’ ampappalakkangi pangngamaseang bansana.
9A’lampami Hatah mange ri Ester nampa napabattu anjo pasanna Mordekhai mae ri ia.
10Mingka nisuromi ammotere’ ri Ester mange ri Mordekhai, ansuro pabattui anne pasanga angkana,
11"Sikamma taua, baji’ nabura’ne yareka baine, ia tenaya nanisuro kioki nampa mange andallekang ri karaenga lalang ri parang lakkenna balla’ karaenga, musti nihukkung matei. Anjo undang-undang, siagang sikontu taua appakkaramula battu ri tumailalanna karaenga sa’genna mae ri ra’yaka ri sikontu propinsia, naasseng ngasengi anjo passalaka. Se’reji bawang cara nakkulle ta’lappasa’ taua battu ri anjo undang-undanga, iamintu punna napajonjo takkang bulaenna karaenga mae ri anjo taua. Punna kamma anjo, lasalamaki. Mingka nia’ma’ sibulang anne tale’baka nakio’ karaenga."
12Napabattumi Hatah anjo pasanna Ester mae ri Mordekhai.
13Jari akkirimmi pappakainga’ Mordekhai mae ri Ester angkana, "Teako pikkiriki angkana lala’bi amangko na tu Yahudi maraenga lanri nukanana kaikau ammantangko ri balla’ karaenga!
14Manna antekamma carana mattantu langgappai pannulung tu Yahudia, sa’genna salama’ ke’nanga. Mingka punna tuli ammantangko tena apa-apa nugaukang ri kamma-kammaya anne, ikau kalennu lamate tongko siagang lapuppusu’mi riwaya’na kaluargana manggenu. Inai angngassengi, gassingka untu’ ri wattu-wattu kammayami anne naniangkakko a’jari ratu!"
15Jari akkirimmi kabara’ Ester mae ri Mordekhai angkana,
16"Passe’rei sikontu tu Yahudi niaka ri kota Susan untu’ ampappala’ doanganga’. Teako angnganrei siagang teako angnginungi lalang tallungallo tallumbangngi. Inakke kalengku siagang sikamma tulolo palayangku lappuasa ngaseng tonga’. Le’baki anjo, erokka’ mange andallekang ri karaenga, manna nakudakkai undang-undanga. Punna padeng musti matea’ passabakkang anjo, boli’mi kamma nakumate!"
17Nampa a’lampamo Mordekhai anggaukangi anjo apa napappasangnganga Ester ri ia.