Alkitab Mobile SABDA
[VER] : [MAKASAR]     [PL]  [PB] 
 <<  Ester 5 >> 

1Ri makatalluna allo puasana, napakemi Ester pakeang ratuna, nampa a’lampa mange ri paranglakkeng lalanna balla’ karaenga. Ammentengi ri dallekang pakke’bu’na balla’ luara’ passe’reang taua ri dallekanna karaenga. Anjo wattua sitabangi ammempo karaenga irate ri empoang kala’biranna, a’dalle’ mange ri anjo pakke’buka.

2Ri wattunna nacini’ Ratu Ester ammenteng pantarang, tu’guru’mi pangngamaseanna ri ia. Napajonjomi takkang bulaenna mae ri ia. Jari majumi Ester mae ri dallekang, nampa najama cappa’na anjo takkang bulaenga.

3Akkuta’nammi karaenga nakana, "Apa kutadeng ratuku? Apa nukaeroki? Manna nupala’ bageruanna kakaraengangku, lakusare tonjako."

4Appialimi Ester angkana, "Punna kierokangi karaeng, kuminasai kibattu anne bangngia siagang Haman, mae ri parjamuang napareka atanta untu’ ikatte."

5Nasuromi karaenga battu Haman linta’, sollanna mange ke’nanga anghaderi anjo undanganna Ester. Battumi ke’nanga ri anjo parjamuang napareka Ester.

6Ri wattunna angnginung anggoro’, akkuta’nammi karaenga angkana, "Kamma-kamma anne paumi apa nukaerokia. Manna apa nupala’ tena takusarenu, manna pole nabageruanna anne kakaraengangku!"

7Appialimi Ester angkana,

8"Punna kierokangi karaeng anturukiangi pappala’na atanta, kuminasai nakibattu pole siagang Haman ri parjamuang lakupareka pole ammuko ri bangngia. Lalampi ri anjo parjamuanga nakupauangki’ pappalakku ri katte."

9Ammotereki Haman battu ri parjamuang napareka Ester. Sannang sikali pa’mai’na siagang sanna’ rannuna anjo ammotere’na. Mingka ri wattunna nacini’ Mordekhai ri pakke’bu’ lompona balla’ karaenga nataeroka ammenteng untu’ ansombai, a’jarimi sanna’ larrona.

10Mingka naparrangngi anjo larrona nampa ammotere’ ri balla’na. Battui mange ri balla’na, nasuromi battu sikamma agang-aganna. Nakio’mi bainenna, iamintu Zeres, battu ammempo siagang ke’nanga.

11Nampa akkana borromo Haman ri ke’nanga siagang napattampo-tampoammi kakalumanynyangnganna, jaina ana’ bura’nena, porena empoang natarimaya battu ri karaenga, kammayatompa bellana tinggina pangka’na napagawe-pagawe maraengannaya.

12Nakanamo pole, "Ba’lalo manna Ratu Ester, inakkeji bawang siagang karaenga naundang mange ri parjamuang napareka untu’ ikambe. Nampa naundang maki’ pole untu’ ammuko ri bangngia.

13Mingka yangasenna anjo tena matu-matunna punna kucini’ ija Mordekhai, anjo tu Yahudi niaka ammempo ri pakke’bu’ lompona balla’ karaenga."

14Nalangngereki bainenna siagang sikamma agang-aganna akkana kamma anjo Haman, nakanamo ke’nanga, "Assuro pare’ mamako tampa’ pa’gentungang ruampuloa metere’ tinggina. Nampa ammukona, ri bari’basaka, appala’ isingko mae ri karaenga untu’ anggentungi Mordekhai ri anjo tampa’ panggentunganga. Lanri kammana anjo akkulle mako mange ri anjo parjamuanga siagang sannang pa’mai’." Baji’ sikali panggappana anjo ke’nanga turu’ ri panggappana Haman. Jari nasuromi linta’ taua ampareki anjo tampa’ panggentunganga.


  Share Facebook  |  Share Twitter

 <<  Ester 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel