Alkitab Mobile SABDA
[VER] : [MAKASAR]     [PL]  [PB] 
 <<  Ester 9 >> 

1Kale’bakkanna narapi’mi tanggala’ sampulo antallu bulang Adar, iamintu allo le’baka nipattantu untu’ anggaukangi parentana karaenga mae ri tu Yahudia. Anjo alloa sallomi natayang-tayang sikamma musu-musunna tu Yahudia untu’ angkoasai anjo bansaya. Mingka kajarianna ba’lalo tu Yahudia ambetai ke’nanga.

2Ri sikamma kotaya, asse’re ngasemmi tu Yahudia untu’ ambunduki sikamma tau eroka a’gau’ ja’dala’ mae ri ke’nanga. Kemae-kemae sikontu bansaya a’jari malla’ ngasemmi ri ke’nanga, sa’genna manna sitau tania’ barani andallekangi ke’nanga.

3Ba’lalo manna sikontu tumalompoa ri propinsia, sikamma guburnur, bupati, siagang sikamma tau anna’galaka jama-jamang ri kakaraenganga, naalle-alleang ngasengi tu Yahudia, lanri malla’na ngaseng ri Mordekhai.

4Ri sikontu kakaraenganga naasseng ngasengi taua angkana anjo Mordekhai sanna’ lompona pangaruna ri balla’ karaenga siagang pila’ lompomi koasana.

5Kammaminjo nakkullemo tu Yahudia a’gau’ paero’-ero’na ke’nanga mange ri musunna. Nabundukimi ke’nanga siagang pa’dang nampa nabuno.

6Ri kota Susan, iamintu ibukotana pa’rasanganga, nia’ 500 tau nabuno tu Yahudia.

7Ri yangasenna anjo ke’nanga nia’ tommi sampuloa ana’ bura’nena Haman, ana’naya Hamedata, musu lompona tu Yahudia. Ia ke’nanga iamintu: Parsandata, Dalfon, Aspata, Porata, Adalya, Aridata, Parmasta, Arisai, Aridai siagang Waizata. Mingka tena nangngella’ tu Yahudia.

8(9:7)

9(9:7)

10(9:7)

11Anjo memang alloa nalaporo’mi taua ri karaenga siapa jaina tunibunoa ri Susan.

12Nakanamo karaenga ri Ratu Ester, "Ri Susan bawang nania’ 500 tau nabuno tu Yahudia, antama’ tommi sampuloa anrua ana’na Haman. La’biangampa ri propinsi-propinsia! Apa aremi kutadeng nagaukang ke’nanga anjoreng! Jari, kamma-kamma anne, apa pole nupala’? Pau mami, mattantu lanugappai!"

13Appialimi Ester angkana, "Punna kikaerokangi karaeng, poro kisare laloi ising tu Yahudia ammantanga anrinni ri Susan untu’ anggaukang poleangi apa le’baka nagaukang anne alloa. Nampa pole poro anjo maya’na ngaseng ana’na Haman, nigentungi ri anjo tampa’ pa’gentunganga."

14Nampa appasulu’mo parenta karaenga untu’ anggaukangi anjo pappala’na Ester. Nipasulu’mi sura’ parentaya untu’ kota Susan, nampa nigentummi anjo sampuloa maya’na ana’na Haman.

15Jari ri tanggala’ sampulo angngappa’ bulang Adar, asse’remi pole tu Yahudia ri kota Susan, nampa nabuno nia’ 300 pole tau ri anjo kotaya. Na anjo wattua tena tommo nagaukangi ke’nanga angngellaka.

16Sikamma tu Yahudi ammantanga ri propinsi-propinsia asse’re tommi untu’ anjagai kalenna. Nabetami musunna ke’nanga siagang nia’ 75.000 tau birisika ri ke’nanga nabuno. Mingka tena nagaukangi ke’nanga angngellaka.

17Anjo kajarianga tanggala’ sampulo antallu bulang Adar. Allo ammukona, iamintu tanggala’ sampulo angngappa, tenamo nammuno ke’nanga manna pole inai. Mingka napakalompomi ke’nanga anjo alloa siagang a’rannu-rannu.

18Mingka tu Yahudi niaka ri kota Susan, tanggala’ sampulo allima napakalompo a’jari allo lompo, nasaba’ nabunoi musua ri tanggala’ sampulo antallu siagang tanggala’ sampulo angngappa, nampa ammari ri tanggala’ sampulo allima.

19Iaminjo saba’na nasikamma tu Yahudi niaka ammantang ri kota-kota ca’dia tanggala’ sampulo angngappa’ bulang Adar napakalompo ke’nanga untu’ a’rannu-rannu. Anjo alloa assua’-suara’ lompoi ke’nanga siagang massing sisarei hadia kanre-kanreang.

20Le’baki anjo nacata’mi Mordekhai sikamma anjo apa kajarianga, nampa akkiring sura’ mange ri sikontu tu Yahudia ri kakaraengang Persia, baji’ nabellaya, kammayatompa ambania.

21Bonena anjo suraka iamintu parenta, sollanna napakalompoi ke’nanga tanggala’ sampulo angngappa’ siagang tanggala’ sampulo allima bulang Adar ri taung-taunna.

22Nasaba’ ri wattu iaminjo alloa nanabeta musu-musunna ke’nanga, sa’genna anjo si’nana siagang paccena ke’nanga amminrami a’jari karannuang siagang kasungguang. Lanri kammanami anjo namusti napakalompo ke’nanga anjo allo-alloa, iamintu assua’-suara’, appare’ parjamuang, kammayatompa massing sisarei ke’nanga kanre-kanreang siagang assarei ke’nanga passidakka ri tu kasi-asia.

23Naturukimi tu Yahudia anjo parentana Mordekhai, siagang kammami anjo na’jarimo ada’ kabiasang nipakalompo taung-taung anjo alloa.

24Haman, ana’na Hamedata, turungang battu ri Agag, musu lompona tu Yahudia. Assuro ciniki allo, iamintu a’goccangi anjo nikanaya "purim" untu’ ampattantui allonna nanibuno ngaseng tu Yahudia. Appareki rancana untu’ amputtai ke’nanga.

25Mingka andallekangi Ester ri karaenga, nampa appasulu’mo sura’ parenta, sa’genna a’jarimo anjo rancana ja’dalaka Haman nataba kalenna. Sa’genna iami siagang sikamma ana’ bura’nena nigentung ri pa’gentunganga.

26Iaminjo saba’na naniareng Purim anjo allo-allo nipakalompoa. Sura’na Mordekhai siagang sikontu apa napisa’ringia tu Yahudia,

27a’jari passabakkang nappare’mo ke’nanga paratorang untu’ kalenna tonji ke’nanga, untu’ turunganna ke’nanga, kammayatompa untu’ sikamma tau lantamaya bansa Yahudi. Manuru’ anjo paratoranga, tunggala’ taungi musti napakalompo anjo ruaya allo le’baka napattantu Mordekhai.

28Napattantu tommi angkanaya untu’ satunggu-tungguna anjo allo Purim musti niu’rangi siagang nipakalompoi lalang ri sikontu kaluarga Yahudi siagang lalang ri sikontu turunganna, ri sikontu propinsi siagang sikontu kotaya.

29Pantaranganna anjo, siagang anjo sura’na Mordekhai, Ratu Ester, ana’na Abihail, annulisi’ tommi sura’ makarua, untu’ ampakajarreki bonena sura’na Mordekhai ri passala’na anjo allo Puringa.

30Anjo suraka nikiringi mange ri sikontu tu Yahudi, kammayatompa sikamma le’baka nipalemba nikiring tongi mange ri 127 propinsi niaka lalang ri kakaraengang Persia. Anjo suraka nirurungammi siagang pappala’ doang naporo tuli amang siagang salewangang bansa Yahudia.

31Lalang ri anjo suraka nikellai tongi ke’nanga sollanna ia ke’nanga kammayatompa turunganna ke’nanga, nau’rangi bajiki anjo allo-allo Purim siagang napakalompoi punna narapi’ wattunna, sangkamma todong napakalompona wattu puasaya siagang wattu kasusaanga. Iaminjo bonena sura’na Mordekhai siagang Ratu Ester.

32Anjo parentana Ester, ampattantuai paratorang-paratorang Puringa, niaki nicata’ lalang ri kittaka.


  Share Facebook  |  Share Twitter

 <<  Ester 9 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran