Dual Panel1Ri tanggala’ ruampulo asse’re bulang tuju lalang anjo taunga, a’bicarami pole Batara tete ri Na’bi Hagai.
2Nasuroi Batara anjo Hagai a’bicara ri Guburnur Zerubabel, Imang Lompo Yosua, kammayatompa sikontu ra’yaka untu’ ampabattui anne pasanga angkana,
3"Nia’ ijaka ri alla’nu angngu’rangi antekamma la’biri’na anne BallakKu pirangalloang? Kamma-kamma anne antekamma kaadaanna, turu’ panggappanu? Sai tena sikali nabaji’ pakkasiaka anciniki?
4Mingka teako tappu’ panrannuangngi, he ikau ngaseng! Patulusuki anjo jama-jamanga, nasaba’ iNakke tuli lambantu ngasengko.
5Ri wattunnu assulu’ battu ri Mesir, le’ba’Ma’ a’janji tuli lanjagaiko. Na kamma-kamma anne pole tuli Kujagainu ngaseng. Jari tena nuparallu lussa’ ri pa’mai’nu.
6Lalang ri anne wattu ambania laKupa’goccangi langika siagang buttaya, bontoa siagang tamparanga.
7Sikontu bansaya laKupata’bangkai siagang pa’barang-baranganna ke’nanga lanierangi mae, sa’genna larassi BallakKu battu ri kakalumanynyangnganna ke’nanga.
8Sikontu bulaenga siagang peraka ri anne linoa, iNakke kabusu’ pata.
9BallakKu berua lala’bi la’birangngangi narioloa, siagang anrinniA’ lassare kaamangngang siagang kasalewangang mae ri bansaKu." Batara Kaminang Koasaya anne akkana.
10Ri tanggala’ ruampulo angngappa’ bulang salapang, lalang ri taung makarua ri pamarentahanna Karaeng Darius, a’bicarami pole Batara Kaminang Koasaya mae ri Na’bi Hagai.
11Nakana, "Appalakko kaputusang battu ri sikamma imanga ri anne passalaka:
12Ebara’ angkana nia’ tau angngalle sikere’ dageng battu ri koro’bang nipassareanga mae ri Batara, nampa naerang ammotere’ lalang ri lappakkang jubana, nampa napake anjo jubana anna’gala’ roti yareka palluang maraeng, yareka anggoro’, yareka minynya’ zaitun, yareka kanre-kanreang apa mamo, maka kabusu’na anjo la’jari matangkasa’ tongi?" Ri wattunna napabattu Hagai anjo pakkuta’nanga, appialimi sikamma imanga angkana, "Tena."
13Nampa akkuta’nang pole Hagai angkana, "Ebara’ angkana nia’ tau a’jari ra’masa’ lanri anna’galaki maya’, nampa nata’gala’ kalase’renna anjo kanre-kanreanga, apaka anjo kanrea a’jari ra’masa’ tongi?" Appialimi sikamma imanga angkana, "Iyo, tantumi!"
14Nampa akkuta’nang pole Hagai angkana, "Napaui Batara angkanaya anjo paratoranga tappake tongi mae ri umma’ Israel anrinni ri pa’rasanganga siagang mae ri kabusu’na alle polena ke’nanga. Jari, apa napassareanga ke’nanga ri anne tampa’ pakkoro’bangnganga ra’masaki."
15Nakana Batara, "Cobasai parhatikang apa le’baka kajariang rioloanganna anne alloa, iamintu ri tenanapa nanibajiki anne BallakKu! Antekamma pattallassannu anjo wattua?
16Battumi nucini’ pattambungang gandunga, na nurannuang angkanaya langgappako 200 kilo gandung, mingka kale’bakkanna 100 kilo bawang nugappa. A’lampako anynye’ro’ 100 litere’ anggoro’ battu ri gumbang anggoroka, mingka 40 bawang litere’ nugappa.
17AppaturungA’ anging bambang siagang bosi batu untu’ angngancuruki sikontu wassele’ kokonnu, mingka tena tongijapa nuero’ ammotere’ mae ri Nakke.
18Anne alloa, tanggala’ ruampulo angngappa’ bulang salapang, le’ba’mi nitannang pundasi ballakKu! Parhatikangi apa lakajarianga appakkaramula anne wattua.
19Manna pole natenamo gandung ammantang, siagang poko’ anggoro’, poko’ ara, poko’ delima siagang poko’ zaitunga tenapa kabusuppa na’rappo, mingka appakkaramula anne wattua laKubarakkaki ngaseng mako!"
20Ri anjo memang alloa, iamintu ri tanggala’ ruampulo angngappa’ bulang salapang, assaremi Batara pasang makarua mae ri Hagai,
21untu’ nipabattu mae ri Guburnur Zerubabel. Nakana Batara, "Tasalloami nalaKugoccang langika siagang buttaya,
22sikamma kakaraenganga laKurumbangi siagang Kuancuru’ kakoasanna ke’nanga. Kareta-kareta bundu’na siagang paeranna laKuparateangi bangkenna; sikontu jaranga lamate kabusuki siagang pabaena lamassing sibuno-bunoi.
23Ri anjo alloa, ikau Zerubabel, atangKu, laKuangkakko untu’ ammarenta lalang arengKu. Nasaba’ ikaumi le’ba’ Kupile." Batara Kaminang Koasaya anne akkana.