Dual Panel1Anjo Yefta iami tantara sanna’ baranina. Anjorengi ri Gilead ammantang. Manggena niarenga Gilead. Mingka anjo amma’na baine pagau’ sala.
2Anjo manggena nia’ todong ana’-ana’ bura’ne maraenna, iamintu battua ri baine sitojennaya. Ri wattunna lompomo anjo ana’-anaka, nabongkami Yefta assulu’ battu ri balla’. Nakana ke’nanga, "Ikau tena nunggappa manna apa-apa battu ri manggena ikambe, nasaba’ ikau ana’ battuko ri baine maraeng."
3Lanri kammana anjo, assisa’la’mi Yefta siagang anjo sikamma sari’battanna. Nampa mange ammantang ri daera Tob. Anjoreng a’rappungammi siagang garombolang ja’dala’. Nampa a’lampa ke’nanga mange anrampo’!
4Tena siapa sallona, nibundu’mi tu Israelka ri tu Amon.
5Ri wattunna kajariang anjo kammaya, a’lampami sikamma pamimpinna Israel, mange angkioki Yefta na nabokoi daera Tob.
6Nakanamo ke’nanga, "Pimpingi ikambe angngewai tu Amon."
7Mingka appialimi Yefta angkana, "Sai sanna’ ngaseng nukabirisingku? Le’ba’ma’ nubongka assulu’ battu ri balla’na manggeku. Angngapa na nubattu mae ri nakke ri wattunnu nataba kasukkarang?"
8Appialimi ke’nanga angkana, "Battui ikambe, lanri eroki ikambe angngangkakko untu’ ampimpingi sikontu taua ri Gilead untu’ ambunduki bansa Amon ri kamma-kammaya memang anne."
9Appialimi Yefta angkana, "Punna niakko ammotere’ mange ri Gilead untu’ ambunduki bansa Amon, siagang Nasareki pammetang Batara, inakke sallang la’jari tukoasa mae ri kau ngaseng."
10Appialimi ke’nanga angkana, "Situju ngasengi kambe. Batara a’jari sa’bi."
11Jari a’lampami Yefta siagang pamimping-pamimpinna Gilead. Nampa niangka’mo ri ke’nanga a’jari pamarenta siagang pamimping. Na ri dallekanNa Batara ri Mizpa, napaumi Yefta sikamma apa nakaerokia mae tuniaka ri Gilead.
12Le’baki anjo nia’mo tau nasuro Yefta mange ri karaeng Amon, untu’ ampabattui papasanna angkana, "Apa kasalanna ikambe sa’genna nubunduki pa’rasanganna ikambe?"
13Appialimi karaenna bansa Amon mae ri sikamma tunisuroa angkana, "Ri wattunna nia’ umma’ Israel battu ri Mesir, naallei ke’nanga buttana ikambe, appakkaramula battu ri Binanga Arnon sa’genna mange ri Binanga Yabok siagang Binanga Yordan. Kamma-kamma anne poterang ngasemmi anjo siagang baji’."
14Nasuromi pole Yefta mange ri karaeng Amon,
15untu’ angngerangi pappiali kammaya anne, "Tena sikali nanarampasaki umma’ Israel buttana tu Moab yareka buttana tu Amon.
16Ri wattunna nabokoi tu Israel butta Mesir, angngolo mangei ke’nanga ri Teluk Akaba, ammalo ri parang kassi’ nampa sa’genna ri Kades.
17Nampa assuro ke’nanga mange ri karaeng Edom untu’ appala’ paramisi allalo ri pa’rasanganna. Mingka tanapa’biangi ke’nanga. Nampa kamma todong anjo papala’na mae ri karaeng Moab, mingka tena todong nanipa’biangi. Sa’genna ammantammo tu Israel ri Kades.
18Nampa napannarrusu’ jappana ke’nanga angngolo ri parang kassi’. Mingka tena nanioloi daera Edom siagang Moab, passangalinna angngalleki’ agang akkuliling sa’genna battu ri rayanganna Moab, ri ba’leanna Binanga Arnon. Akkemami ke’nanga anjoreng, mingka tena nalimbangi anjo binangaya, lanri anjo daeraya antamaki ri daera Moab.
19Le’baki anjo nia’mo tau nisuro ri umma’ Israel mange ri Sihon, karaeng Amori ri Hesybon, untu’ appala’ paramisi, allalo ri daera Amori, lanri eroki ke’nanga mange ri pa’rasangang kalenna.
20Mingka tena nikellai ri Sihon lanri tena natappa’ angkana poro laallalonaja bawang ke’nanga. Ba’lalo napaturungi sikontu tantarana mange angngalle tampa’ ri Yahas, nampa nabunduki umma’ Israel.
21Mingka nisarei pammetang umma’ Israel ri Batara, Allata’alana Israel, mae ri Sihon siagang tantarana. Kammaminjo na nagappa ngasemmo umma’ Israel sikontu buttana tu Amori niaka ammantang ri anjo pa’rasanganga.
22Naempoimi ke’nanga anjo daera Amori appakkaramula battu ri Arnon bageang timboro’, sa’genna bageang wara’na Binanga Yabok, kammayatompa appakkaramula battu ri parang kassika bageang iraya, sa’genna mae ri Binanga Yordan bageang ilau’.
23Jari Batara, Allata’alana Israel, iaminjo ambongkai tu Amoria untu’ kaparalluanna umma’Na Batara.
24Na kamma-kamma anne apaka erokko angngallei ammotere’? Anjo butta nasareangko rewatanu Kamos, akkullei tuli nupatang. Mingka apa le’bakamo Napassareang Batara, Allata’alana ikambe mae ri kambe, lanapartahangkangi ikambe.
25Maka nukana bajikangngangko na Balak ana’na Zipor, karaenna Moab? Tena le’bakai Barak angngewai ikambe siagang a’bundu’ siagang ikambe.
26Tallum bilangngang taung sallona tu Israel angngempoi Hesybon, Aroër siagang sikamma desa-desa niaka ri tammulilina, kammayatompa sikontu kota niaka ri birinna Binanga Arnon. Angngapa nasiapa sallona anjo tanuallea ammotere’?
27Tena, tena na sala ikambe mae ri kau. Ikau sala nasaba’ nubunduki ikambe. Anne alloa Batarami haking untu’ antappuki anne parkarana bansa Israel siagang bansa Amon."
28Mingka tena najampangi karaeng Amon anjo pappasanna Yefta.
29Nipimpimmi Yefta ri RohNa Batara. Jari a’lampami Yefta mange angkunjungi daera Gilead siagang Manasye. Nampa ammotere’ mange ri Mizpa ri Gilead. Battu anjorengi napannarrusu’ jappana mange ri daera bansa Amon.
30A’janjimi Yefta mae ri Batara angkana, "Punna nasarea’ pangngellai Batara nakubeta tu Amon,
31siagang nakusalama’ ammotere’, jari inai-nai mamo uru assulu’ battu ri ballakku untu’ anruppaia’, iami lakupassareang anjari koro’bang tunuang mae ri Batara."
32A’limbammi Yefta ri Binanga Yordan untu’ ambunduki tu Amon. Na nisaremo pammetang ri Batara.
33Na’bundu’ Yefta sipacappu’-cappu’na ke’nanga. Appakkaramulai battu ri Aroër sa’genna mae ri daera a’biringa ri Minit, nia’ ruampulo kota yangasenna. Kammayatompa narapiki sa’genna Abel-Keramim bellana. Sanna’ jaina tu Amon mate. Sa’genna nibetamo ke’nanga ri tu Israel.
34Ammotere’na Yefta battu ri Mizpa, battumi ana’ tulolonna anruppai na’joge’-joge’ siagang appasa’ra rebana. Iaminjo ana’ sitau-tauna.
35Kamma nacini’na Yefta anjo ana’na, sanna’mi si’nana nyawana. Nakkeke’-kekke’mi bajunna, na nakana, "O Anakku, panra’mi atingku! Le’ba’ma’ assumpa ri Batara, na takkulleamo kupinra!"
36Nakanamo anjo ana’ tuloloa ri Yefta, "Le’ba’ maki’ assumpa mae ri Batara, bapa’. Na nasare maki’ pangngellai Batara, untu’ ambalasaki kaja’dallanna tu Amon, musunta. Jari anjo apa le’ba’ kipanjanjianga musti kirupai.
37Mingka nia’ se’re kupala’. Kisarea’ wattu ruam bulang untu’ a’jappa-jappa siagang agang-agangku ri buluka. Anjorengi lakukarruki sarengku, lanri lamatea’ ri wattu tulolongku ija."
38Nikellaimi ri manggena, na nalappassang a’lampa. A’lampami anjo tuloloa siagang agang-aganna untu’ angngerangi si’nana anjoreng, nasaba’ lamatei lalang tenanapa na’bura’ne siagang tenapa ana’na.
39Allalonamo ruam bulang, ammotere’mi mae ri manggena. Nampa nagaukammo manggena apa anjo le’baka napa’janjiang mae ri Batara. Jari matemi anjo anaka lalang tulolona ija. Iaminjo pakkaramula passabakkanna ri tu Israel,
40angngapa nabiasa a’lampa ana’-ana’ tuloloa patampulo allo lalang taung-taunga, mange angngerangi si’nana ri Gilead, untu’ angngu’rangi ana’na Yefta.