Dual Panel1Anjo alloa akkelong-kelommi Debora siagang Barak ana’naya Abinoam. Kammaminne kelong-kelonna:
2Pujimi Batara pahlawang-pahlawanna tu Israel, nasaba’ assumanga’mi untu’ barjuang, na rellamo ra’yaka mange a’bundu’.
3Pilangngerimi ikau karaenga siagang ana’ karaenga kumakkelong ri Batara, Allata’alana tu Israel.
4Ri wattu a’lampanu battu ri Seir, o Batara, na Kibokoi daera Edom, ma’gioki buttaya, tassungkei passolongang langika, na natu’gurammo je’ne’na rammanga.
5Ta’ge’goso’mi moncong-monconga ri dallekanNa makoasaya ri Sinai Ri dallekanNa Batara, Allata’alana Israel.
6Ri rewasa’na Samgar, ana’naya Anat, na ri rewasa’na pole Yael, tamania’ tuma’dongko’ jarang ri pa’rasangang tamania’ tu ma’lampa ri agang malompo.
7Tamania’ bonena kota-kotana Israel sino sikali sa’genna battu Debora; battuko rapang nikarimangngia.
8Ri rewasa’ pakaramulana Israel manynyomba ri rewata, reppe’mi bunduka ri pa’rasanganna, ri 40.000 pahlawanna bansaya manna se’re tamangangka’ sanjata.
9Ri sikamma panglimana Israel, ia arrellakangai kalenna, kuparapiki pappakala’birikku sitojeng-tojennaya. Pujimi Batara!
10Ikau ma’dongko’ keledai kebo’ ikau ammempoa ri tappere’ malompoa, na ikau ngaseng ma’jappa bangkenga kabarrangi anne carita pammetanga!
11Ri sa’rinna sikamma bungung-bungunga, suara’mi nilangngere’ tu makkelonga, ancaritai pammeta ma’mole-molena Batara, pammetanna Israel, umma’Na Batara. Na a’barrisi’mo ke’nanga mange ri pakke’bu’ lompona kotaya.
12Debora ammentemmako nai’, numakkelong-kelong. Barak, ammentengmako nai’, nanuerang sikamma musu nitahanga!
13Tubarani niaka ammantang battua mange ri pamimpinna, battumi ke’nanga sadia untu’ ero’ barjuang.
14Battu ri Efraim a’jappa ke’nanga nanaung parang lappara’ amminawang ri tantara Benyamin a’barrisika ri dallekanna ke’nanga. Nia’mi sikamma panglimana, battu ri Makhir nammentemmo sikamma perwiraya battu ri Zebulon.
15Nia’mi sikamma pangngulunna Isakhar siagang Debora, battumi Isakhar, kammayatompa Barak, amminawammi naung ke’nanga ri parang lappara’, amminawang ri ia. Mingka tamattantuai ero’na suku Ruben, lanri tena passamaturukang ri ke’nanga.
16Angngapa nammantang ke’nanga ri alla’na gimbalaka? Apaka untu’ mappilangngeri pakalawaki makkio’ gimbala’? Tena memang namakkulle suku Ruben mappattantu apa ero’na lanri tenana passamaturukang ri ke’nanga.
17Ri wattu a’bundu’ lompona Zebulon siagang Naftali ri pa’bundukanga ammantangi suku Dan ri kappala’, suku Gad tuli nia’na ri timboranna Yordan nampa sannang-sannang suku Asyer tamaero’ a’lette’ ri tampa’na ri biring tamparang.
18(5:17)
19Ri Taanakh ri ampi’na Binanga Megido a’bundu’ sikamma karaenga, barjuang sikamma karaeng Kanaan mingka manna pera’ tamania’ naerang ke’nanga battu ri pa’bundukang.
20Manna olo’-olo’ amminawang ngaseng barjuang angngewai Sisera, irate ri panri’bakanna ri alla’na langika.
21Allumpami je’ne’na Binanga Kison allo’lorangi musua. Maju, majumako tubarani, ikau nyawaku!
22Gassingi larinu ikau jarang nibaea ri taunna.
23"Tunrai Meros, nabonena, nasaba’ battuna ke’nanga teai untu’ ambantu a’jari pahlawang barjuanga untu’ Batara, kammanjo kananna Malaeka’Na Batara."
24Upaki Yael bainenna Heber, tu Keni; ri sikontu bonena kemaya, iami kaminang nibarakkaki.
25Appalaki je’ne’ Sisera, mingka dadi’ nisareangi nasarei dadi’ lalang pangnginungang karaeng.
26Palu-palu napatto’ napake ambunoi Sisera sa’genna ancuru’ ulunna.
27Anra’bai Sisera ri dallekanna Yael ammonrangi ri butta antarimai a’jala’na.
28Battu ri jandelana na mattayang amma’na Sisera, nanakanamo, "Angngapai natena memampa nabattu karetana, angngapa natakalangngerang sa’ra bangkeng jaranna?"
29Appialimi dayang-dayang cara’de’na lalang ri pa’mai’ kalenna angkana:
30"Sitabangi ke’nanga a’bage-bage barang rampasang se’re tantara anggappa se’re yareka rua tulolo bageanna Sisera iamintu parekang baju kaminang ka’jalaka anggaranna, untu’ karaeng bainea bongong a’rupa-rupaya sulanna."
31Poro mate ngasengi musu-musunTa, o Batara, kamma matena Sisera, mingka sikontu sahabatTa poro a’jari pore ngasengi sanrapang alloa ri langika! Le’baki anjo amammi anjo pa’rasanganga patampulo taung sallona.