Dual Panel1Ri se’reang allo a’lampami Abimelekh, iamintu ana’na Gideon, mange ri kota Sikhem, napammantangia bijanna amma’na. A’bicarami anjoreng mae ri ke’nanga angkana,
2"Pakkuta’nangang sai mae ri sikontu tau ammantanga ri Sikhem, kereanga la’bi baji’: Niparentaya ri tujupuloa ana’na Gideon, yareka ri se’rea bawang tau? Piu’rangiang tongi ke’nanga angkana nia’ ija passisambungang cerakku siagang ke’nanga."
3Jari a’lampami anjo bija-bijanna amma’na Abimelekh mange ri tau niaka ri Sikhem. Nampa napabattuang pappasanna Abimelekh mae ri ke’nanga. Na natappukimo tau ammantanga ri Sikhem untu’ amminawang ri Abimelekh. Nasaba’ nakana ke’nanga memang anjo Abimelekh nia’ ija passisambungang cera’na siagang ke’nanga.
4Nampa assaremi ke’nanga tujupulo doe’ pera’, naallea battu ri balla’ panynyombanga ri Baal-Berit. Iaminjo doeka napake Abimelekh anggaji siapa are jaina tu ja’dala’ untu’ amminawang ri ia.
5Nampa mange ri kamponna manggena ri Ofra. Anjoreng nabuno ngasemmi anjo tujupuloa sari’battanna irate ri se’reang batu. Mingka anjo ana’ bungkona Gideon, niarenga Yotam, tena namminawang nibuno, lanri accokkoi.
6A’rappungammi sikontu tau ammantanga ri Sikhem siagang Bet-Milo. Nampa a’lampa ke’nanga mange ri poko’ terpentin karamaka ri Sikhem. Anjoremmi niangka’ Abimelekh ri ke’nanga a’jari karaeng.
7Nalangngere’na Yotam anjo passalaka, mangemi ammenteng ri cappa’na Moncong Gerizim. Nampa akkio’ mange ri yangaseng anjo taua, angkana, "Pilangngeria’ ikau ngaseng tuniaka ri Sikhem, sollanna napilangngeri todong Allata’ala.
8Nia’ se’re wattu na’rappungang poko’-pokoka untu’ ampilei karaenna. Nakanamo ke’nanga ri poko’ zaitun, ‘A’jarimako karaenna ikambe.’
9Appialimi poko’ zaitunga angkana, ‘Tena kuero’ nasaba’ punna a’jaria’ karaennu, musti ammarima’ assare wassele’ minynya’ zaitun, biasaya nipake untu’ ampakalompoi rewata-rewataya siagang rupataua.’
10Nampa nakanamo anjo poko’-pokoka mae ri poko’ araya, ‘Ikau a’jari karaenna ikambe.’
11Mingka appialimi anjo poko’ araya angkana, ‘Teaja’. Nasaba’ punna a’jarima’ karaennu, musti ammarima’ assare wassele’ rappo ara te’ne-te’nea’.’
12Le’baki anjo nakanamo poko’-pokoka ri poko’ anggoroka, ‘Jari ikaumo a’jari karaenna ikambe.’
13Mingka appialimi poko’ anggoroka angkana, ‘Masakang musti lakupammari assare wassele’ anggoro’ ampakasannangai pa’mai’na rewata-rewataya siagang rupataua, lanri poro la’jari karaennu!’
14Lanri kammana nakanamo sikontu poko’-pokoka ri rompo’ akkatintinga, ‘Ikaumo a’jari karaenna ikambe.’
15Appialimi anjo rompo’ akkatintinga, ‘Punna attojeng-tojeng ngasengko ero’ ampa’jaria karaennu, maeko a’la’lang irawangangku. Punna tena nuero’ lassuluki pepeka battu ri anne tangke-tangke akkatintingku na natunu ngaseng sa’genna la’busu’ sikontu poko’-poko’ arasa’ niaka ri Libanon.’"
16Nampa nakanamo pole Yotam, "Jari, maka situlusu’naji pa’mai’nu angngangkaki Abimelekh a’jari karaeng? Maka le’ba’mi nugaukang apa siratanga nugaukang mange ri Gideon manggeku, siagang bija pammanakanna? Maka le’ba’mi nubalasa’ jasa-jasana manggeku,
17le’baka barjuang untu’ ikau ngaseng? U’rangi angkanaya le’ba’mi nasaung nyawana untu’ allappassang ngasengko battu ri kakoasanna tu Midian.
18Mingka kamma-kamma anne nupassalasai bija pammanakanna manggeku. Nubuno ngasengi ana’na tujupulo sikali irate ri tompo’ serea batu. Na Abimelekh ana’na manggeku battu ri baine atana. Mingka nuangka’mi a’jari karaeng ri Sikhem, kalanri nia’na passisambungang cera’na siagang ikau ngaseng.
19Punna tulusuki pa’mai’nu anne alloa appanggaukang kamma mae ri manggeku siagang bija pammanakanna, boli’mi kamma assannang-sannang mako siagang Abimelekh. Siagang boli’mi kamma assanang-sannang Abimelekh siagang ikau ngaseng.
20Mingka punna tena nakamma, poro assulu’ laloi pepeka battu ri Abimelekh, na natunu ngaseng sa’genna la’busu’ nakanre tau ammantanga ri Sikhem siagang Bet-Milo. Kammayatompa poro assulu’ lalo tongi pepeka battu ri tau ammantanga ri Sikhem siagang Bet-Milo na nakanre sa’genna la’busu’ Abimelekh."
21Le’baki anjo larimi Yotam, nampa mange ammantang ri Beer, lanri malla’na ri Abimelekh, anjo sari’battanna.
22Tallun taungi sallona Abimelekh ammantang ri Israel.
23Nampa Napasimusumo Batara anjo Abimelekh siagang taua ri Sikhem. Sa’genna niewamo Abimelekh ri ke’nanga.
24Kammaminjo kajarianga, sollanna nibalasa’mo kaja’dallanna Abimelekh siagang nikompa salami ri tau niaka ri Sikhem na nabuno anjo tujupuloa ana’na Gideon.
25Appania’mi pajaga ri coppo’-coppo’ buluka a’boya akkala taua ri Sikhem untu’ anjakkalaki Abimelekh. Sikamma tau niaka ammalo anjoreng nirampo’ ngasengi ri anjo pajaga-pajagaya. Na nipabattumo mae ri Abimelekh anjo apa kajarianga.
26Anjo wattua battumi Gaal, ana’na Ebed, ero’ ammantang ri Sikhem siagang sikamma sari’battanna, na nipatappa’mo ke’nanga ri tau niaka ri Sikhem.
27A’lampami ke’nanga angngalle rappo anggoro’, ri koko-koko anggoroka, nampa napare’ je’ne’ anggoro’. Nampa appare’ ke’nanga passua’-suarrang. Angnganre-nganremi ke’nanga ri tampa’ panynyombang rewataya, nasumpa-sumpai tojeng Abimelekh.
28"Inaiki’ anne nakimusti tundu’ mae ri Abimelekh?" Nakanamo Gaal, "Inai tau anjo sitojenna? Sai ana’na Gideon, siaganga Zebul a’jari atai mae ri Hemor, manggena Sikhem, boe-boeta!"
29"Ebara’ inakke ampimpingi taua anrinni ri Sikhem, ma’nassa narapi’mi a’jala’ anjo Abimelekh! Lakukana ri ia, ‘Umba kimaju. Pagio’ ngasengi tantaranu, siagang maeko nakissulu’ a’bundu’!’"
30Nasanna’mo larrona Zebul, ammarentaya ri kota Sikhem allangngereki anjo kananna Gaal.
31Nia’mo tau nasuro mae ri Abimelekh ri Aruma, angngerang pappasang angkanaya, "Niaki Gaal ana’na Ebed siagang ngaseng sari’battanna battu mange ri Sikhem. Na nakompa sala ngasemmo taua untu’ angngewako.
32Jari paralluko mange accokko ri kokoa punna bangngi siagang taunnu.
33Ammuko bari’basa’ punna ammumbami alloa, pata’bangkami nanubunduki anjo kotaya. Na punna assulu’ Gaal siagang taunna ero’ angngewako iamintu kasampatang baji mae ri ikau untu’ ambunduki’."
34Jari a’gio’mi Abimelekh siagang taunna ri wattunna bangngi. Nabage appa’mi kalenna ke’nanga accokko ri tammulilina kota Sikhem.
35Tena nasallo nacini’na Abimelekh siagang taunna angkana niaki Gaal assulu’ ammenteng ri pakke’bu’ lompona kotaya, assulu’ ngasemmi ke’nanga ri paccokkoanna.
36Nacini’na Gaal ke’nanga, nakanamo ri Zebul, "Cini’ sai! Nia’ tau jai naung battu ri coppo’-coppo’ monconga!" Appialimi Zebul angkana, "Ha, teai tau anjo. Anjo tau-taunna monconga."
37Nakanamo pole Gaal, "Tojeng! Nia’ tau naung mae ri buluka. Na nia’ todong se’re rombongang battu ri poko’ terpentin karamaka!"
38Nakanamo Zebul ri Gaal, "Jari kemaemi kamma-kamma anne sa’ra lomponu? Riolo nukana apa saba’na kimusti amminawang turu’ mae ri anjo Abimelekh? Iaminne anjo sikamma tau nuhinaya. Kamma-kamma anne maju mako ambunduki ke’nanga!"
39Nampa naerammo Gaal assulu’ taua ri Sikhem angngewai Abimelekh.
40Mingka nibundukimi ri Abimelekh, sa’genna lari. Sanna’mi jaina tu mate ri pakke’bu’ lompona kotaya.
41Le’baki anjo ammotere’mi Abimelekh mae ri Aruma, nampa ammantang anjoreng. Nabongkami Zebul anjo Gaal siagang sikamma sari’battanna assulu’ battu ri Sikhem. Sa’genna takkulleami ke’nanga ammantang anjoreng.
42Ammukona, appakkaramulami taua ri Sikhem ambokoi kotaya, ero’ mae ri kokoa. Na nipabattuammo anjo kabaraka mae ri Abimelekh.
43Napa’rappungammi taunna Abimelekh, nampa napa’jari tallu pasukang. Le’baki anjo a’lampami ke’nanga mange ri koko-kokoa accokko. Ri wattunna nacini’ tau niaka ri kotaya lamange ri kokoa assulu’mi ri paccokoanna nampa nabuno ke’nanga.
44Lalang akkaro-karona Abimelekh siagang pasukanna ambunduki pakke’bu’ lompona kotaya, anjo ruaya pasukanna maraenga naondang tommi nampa nabuno tau laria mae ri koko-kokoa.
45A’bundu’mi Abimelekh sikabusu’na alloa, na naalle anjo kotaya, nabunomi tau niaka ilalang, nampa naancuru’ anjo kotaya, na kiori ce’la.
46Nalangngere’na tau niaka lalang ri benteng Sikhem anjo kabaraka, antama’mi ke’nanga ri kali’bong rawanganna balla’ panynyombang El-Berit untu’ accokko.
47Na nipauammo Abimelekh angkana nia’mi taua a’rappungang anjoreng.
48Jari a’lampami Abimelekh siagang taunna, nai’ ri Moncong Zalmon. Nampa ammolong tangke-tangke kayu siagang pangkulu’. Massing nasompomi ke’nanga anjo tangke-tangke kayua, na nasuro todong taunna akkaro-karo anggaukangi apa nagaukanga.
49Massing ammolommi ke’nanga tangke-tangke kayu, nampa a’jappa amminawang ri Abimelekh. Sikontu anjo tangke kayua natambungi ri bawana anjo kali’bonna panynyombanga nampa natunu, sitabanna nia’ ngasengija anjo tu Sikhem ilalang. Jari mate ngasemmi anjo sikontu tau niaka ri Sikhem, kira-kira nia’ sisa’bu tau, bura’ne siagang baine.
50Le’baki anjo a’lampami Abimelekh mange ri Tebes. Nakurummi anjo kotaya nampa naalle.
51Ri tangnga-tangngana anjo kotaya nia’ se’re menara kassa’. Lari ngasemmi mange anjoreng sikontu tau niaka anjoreng ri kotaya. Antama’mi ke’nanga ri anjo menaraya nampa nakonci pakke’bu’na, nampa nai’ ke’nanga.
52Nabattumo Abimelekh mange anjoreng, untu’ ambunduki anjo menaraya. Ri wattunna battu mange ri pakke’bu’na anjo menaraya naero’ natunu,
53nia’mo sitau baine ampitu’guri ulunna Abimelekh siagang se’re batu pa’gilingang. Nareppe’mo ka’daro ulunna.
54Akkaro-karomi Abimelekh angkioki turungka papisang sanjatana na nakana, "Bi’buki pa’dannu nampa nubunoa’, tena kuero’ nipakkanai nibuno ri tu baine." Jari nitobo’mi ri anjo tu rungkaya sa’genna mate.
55Nacini’na tu Israelka angkana matemi Abimelekh, ammotere’ ngasemmi ke’nanga.
56Kammaminjo bateNa Allata’ala ambalasaki kaja’dallang nagaukanga Abimelekh mange ri manggena, ri wattu nabunona tuju puloa sari’battanna.
57Na Nahukkung tommo taua ri Sikhem lanri kaja’dallanna ke’nanga. Yangasenna anjo kajarianga sicoco’ le’baki apa le’baka napau Yotam, ana’na Gideon, ri wattunna nasumpai ke’nanga.