Dual Panel1He bansa Israel, tea’ mako pakalompoi pole allo-allo lomponu sangkamma bansa-bansa maraenga. Nubokoimi Allata’alanu siagang tenamo namajarre’ pa’mai’nu mae ri Ia. Ri tampa’-tampa’ panggilingang gandunga nubalukangi kalennu a’jari rapang pasundala’ mae ri Rewata Baal, siagang sannangi nyawanu antarimai gandung nukanaya sawala’ nugappa battu ri anjo rewataya!
2Mingka tasalloami nulakakurangang ngaseng ri gandung siagang minynya’ zaitun, kammayatompa anggoroka lala’busu’ tongi.
3Ikau ngaseng, he bansa Israel, tena nulammantang tuli ri butta Napassareanga Batara mae ri kau. Musti ammoterekko mange ri Mesir, siagang musti angnganreko kanre harang ri Asyur.
4Ri sikamma anjo pa’rasanganga tena nulakkulle assare anggoro’ siagang koro’bang olo’-olo’ untu’ ampakasannangi atinNa Batara. Anjo kanrenu lanapa’jari ra’masa’ kabusuki sikamma tau angkanreai, sangkamma kanre nikanrea ri wattunna upacara nitarawanna tau matea. Anjo kanrea poro battannuji bawang angkasiaki matu-matunna; manna sike’de’ tena nalanierangi mae ri Balla’Na Batara untu’ a’jari passare anjoreng.
5Ri allo-allo lompo agamaya untu’ ampakala’biriki Batara, tena apa-apa lakkulle nugaukang untu’ ansuarri.
6Punna battui balaya, siagang nierang ngasengko mange ri pa’rasangang maraeng, anjo niaka tassesa ammantang battu ri kau ngaseng lanipasse’rei ri tu Mesir untu’ nabuno siagang natarawang ri Memfis! Lattimboi rukuka siagang katintinga antongkoki tampa’-tampa’ bate balla’nu siagang barang-barang pera’nu tinggia anggaranna.
7Narapi’mi wattu panghukkunganga, wattu annarimaya pa’balasa’ mae ri sikontu panggaukanga. Lanakasia’mi Israel! Nukana ngaseng, "Anne na’bi nikoasaia ri roh toloi! Pongoroki!" Nukkana kamma anjo lanri birisi’ duduko mae ri Nakke siagang lompo duduna dosanu.
8Nasuroa’ Allata’ala salaku na’bi untu’ ampakainga’ ngasengko ikau umma’Na, mingka manna kemae lampaku tuli appattujuangko antannangngia’ sikko’ rapang jangang. Ri pa’rasangang KalenNa Allata’ala inakke ngaseng na’bi-na’bia nimusuki’ ri ra’yaka.
9Teai sipato’ ja’dala’na panggaukannu sangkamma le’baka nagaukang taua ri Gibea. LaNau’rangi Allata’ala kasalannu, siagang Nahukkungko lanri dosanu.
10Nakana Batara, "Ri wattu uru Kubuntulu’na Israel, rannuA’ rapang tau anggappaya rappo anggoro’ ri parang lompoa. Ri wattu uru Kucini’na boe-boenu sanna’ sannanna nyawaKu, rapang tau uru ancinikai rappo bungasa’na rappo araya. Mingka, ri wattunna a’lampa ke’nanga mange ri Bulu’ Peor, appakkaramulami ke’nanga anynyomba ri Baal, sa’genna a’jari ra’masa’ ke’nanga sangkamma ra’masa’na anjo rewata nangaia ke’nanga.
11Lanri’baki natappela’ kalompoanna Israel rapang jangang-jangang lanynyaka anri’ba’; tenamo tubaine latianang siagang tenamo ana’-ana’ lanilassukang.
12Mingka manna pole nania’ ana’-ana’ nilassukang siagang nipakalompo, laKuallei ke’nanga; tena manna sitau laKulappassang attallasa’. Cilaka ngaseng mako ikau, he bansa Israel, punna Kubokoi ngaseng mako!"
13O Batara, kuciniki ana’-ana’na ke’nanga niondang-ondang siagang nibuno.
14Apami musti kupala’ ri Katte untu’ sikamma anjo taua? Pa’jari tamanang ngasengi sikamma tubai’-bainena ke’nanga! Pa’jari ke’nanga takkullea ampasusui ana’ lolona ke’nanga!
15Nakana Batara, "Sikontu kaja’dallanna ke’nanga appakkaramulai ri Gilgal. AnjoremMa’ appakkaramula birisi’ mae ri ke’nanga. Lanri panggaukanna ke’nanga ja’dalaka, laKubongkai ke’nanga battu ri anne pa’rasangangKu. Tenamo nalaKukamaseangi ke’nanga; sikontu pamimpinna ke’nanga angngewa ngasemmi ri Nakke.
16LaKuhukkungi tu Israel. La’jari ke’nanga sanrapang lamung-lamung tenaya na’rappo, siagang kalotorokamo aka’-aka’na. Takkulleai ke’nanga nia’ ana’na; mingka manna pole nania’ ana’na ke’nanga, laKubunoi anjo ana’-ana’ nakamaseanga."
17Anjo Allata’ala kulayania laNatollaki umma’Na, lanri teai ke’nanga mappilangngeri ri Ia. La’lampai ke’nanga mange-mange ri alla’na bansa-bansaya.