Dual Panel1Nasuroi Batara anjo Musa
2ampabattui mae ri bansa Israel anne parentaya angkana, "INakke Karaeng Allata’alanu.
3Tea’ laloko turuki panggaukanna bansa Mesirka, iamintu pammantangannu le’ba’ka, yareka tau niaka ri Kanaan iamintu tampa’ lanumangeia Kupimping kamma-kamma anne.
4Turuki laloi hukkung-hukkungKu siagang gaukangi apa Kuparentakanga. INakke Karaeng Allata’alanu.
5Turuki paratorang-paratoranga siagang hukkung-hukkung Kupassareanga mae ri kau. Punna nugaukangi kammaya anjo, lasalamakko lalang tallasa’nu. INakkemi Batara."
6Napassareangi Batara anne paratorang-paratoranga. Teako assikatinroangngi siagang kalase’renna bija pammanakannu.
7Teako assikatinroangngi siagang amma’nu, bainenna manggenu, nasaba’ anjo manggenu pata.
8Teako hinai manggenu lanri assikatinroannu siagang kalase’renna bainenna maraenga.
9Teako assikatinroangngi siagang sari’battang bainenu yareka sari’battang aonu, baji’ nipakalompoa lalang julu balla’nu kammayatompa nipakalompoa ri balla’ maraenga.
10Teako assikantinroangngi siagang cucunnu; anjo kammaya lanapakasirikko.
11Teako assikatinroangngi siagang sari’battang bainenu a’julu manggea siagang ikau namaraeng amma’na yareka nuaganga a’julu amma’ namaraeng manggena, nasaba’ anjo assari’battangko.
12Teako assikatinroangngi siagang purinannu bainea, baji’ nasari’battanna manggenu yareka sari’battanna amma’nu.
13(18:12)
14Teako assikatinroangngi siagang bainenna purinannu, nasaba’ anjo purinannu tongi.
15Teako assikatinroangngi siagang ana’ mintunnu
16yareka siagang bainenna daennu.
17Teako assikatinroangngi siagang ana’na yareka cucunna baine le’baka nuagang sikatinroang. Gassingka anjo ke’nanga bija pammanakannu, nampa anjo panggaukang kammaya tena nabaji’.
18Teako a’buntingi siagang sari’battanna bainennu lalang attallasa’na ija anjo bainennu.
19Teako assikatinroangngi siagang se’rea baine lalang battuna bulanna, lanri ra’masaki anjo wattua.
20Teako assikatinroangngi siagang bainenna tau maraenga; anjo panggaukang kammaya napa’jari ra’masakko.
21Teako passareangngi kalase’renna ana’nu untu’ nikoro’bangkang lalang ri panynyombanga mae ri Rewata Molokh, lanri anjo panggaukang kammaya nahinai arenNa Allata’ala, Bataranu.
22Tu bura’nea tena nakkulle assikatinroang siagang paranna bura’ne; Nakabirisi Allata’ala panggaukang kammaya anjo.
23Baji’ tu bura’nea kammayatompa tubainea tena sikali nakkulle assikatinroang siagang olo’-oloka; panggaukang ja’dala’ kammaya nara’massiko.
24Teako ra’massi kalennu siagang panggaukang-panggaukang kammaya anjo nasaba’ kammaminjo panggaukanna bansa-bansa le’baka ammantang ri Kanaan rioloangnganga anra’massi kalenna ke’nanga. Lanri kammana minjo nanibongka ke’nanga ri Batara, sollannu akkulle ampammantangngi anjo pa’rasanganga.
25Le’baki nagaukang ngaseng ke’nanga panggaukang appakaringi’-ringi’ kammaya anjo, sa’genna a’jari ra’masa’ pa’rasanganna ke’nanga. Jari nihukkummi ke’nanga ri Batara siagang tenamo nanipa’biang ke’nanga ammantang anjoreng. Mingka ikau ngaseng, tea’ laloko gaukangngi panggaukang-panggaukang kammaya anjo. Ikau ngaseng tu Israelka siagang bansa maraeng ammantang tulia siagang ikau, musti nuturuki paratoranNa siagang parentaNa Batara,
26(18:25)
27(18:25)
28sollanna tena nihukkungko siagang tena nibongkako ri Batara battu ri anjo pa’rasanganga sangkamma tau tenaya namangngasseng ri Batara, ammantanga anjoreng rioloangnganga naikau.
29Nuassengi angkanaya inai-nai anggaukangi panggaukang ra’masa’ kammaya anjo tenamo nanibilangi anggota umma’Na Allata’ala.
30Jari Nakanamo Batara, "Turuki parenta-parenta Kupassareanga siagang teako palembai panggaukanna sikamma tau ammantanga ri Kanaan rioloangngannu. Teako ra’massi kalennu lanri nugaukanna anjo panggaukang-panggaukang kammaya. INakkemi Karaeng Allata’alanu."