Alkitab Mobile SABDA
[VER] : [MAKASAR]     [PL]  [PB] 
 <<  Imamat 24 >> 

1Nasuroi Batara anjo Musa

2ampassareangi anne parenta-parentaya mae ri bansa Israel: angngerangko minynya’ zaitun tenaya bengkoranna siagang kaminang bajika untu’ lampu lalanga ri KemaNa Batara, sollanna akkulle niparinra, nampa a’rinra turus.

3Harun musti naatoroki anjo lampu-lampua battu ri karueng sa’genna bari’basa’ ri tampa’ kahaderanNa Batara, ri pantaranna gordeng antongkokai Patti Parjanjianga ri Kamara’ Kaminang Matangkasaka. Anjo parentaya musti nigaukangi sa’genna satunggu-tungguna.

4Harun musti naurusuki lampu-lampua ri bangkeng lampu bulaeng ti’noka sollanna tuli a’rinra lalang ri KemaNa Batara.

5Angngalleko sampulo anrua kilo labu’ kaminang baji’ nampa apparekko sampulo anrua roti a’bo’dong, massing tasse’rei kilo labu’ lalanna sibatua.

6Padongkoki anjo rotia na nupa’lonjo’ rua, annang roti massing tasse’re susung, irate ri meja nilapisika bulaeng ti’no’, ia niaka lalang ri KemaNa Batara.

7Boliki kamanynyang kaminang bajika ri tassisusunga roti untu’ a’jari pammatei angkanaya anjo rotia iamintu koro’bang kanre-kanreang mae ri Batara.

8Ri tunggala’ allo Pammari-marianga musti nia’ roti nipatala lalang ri KemaNa Batara. Iaminjo kawajibanna bansa Israel sa’genna satunggu-tungguna.

9Anjo rotia iami untu’ bageanna Harun siagang jari-jarina. Musti nakanrei ke’nanga ri tampa’ matangkasaka, nasaba’ anjo rotia iamintu bageang sannaka tangkasa’na battu ri koro’bang nipassareanga mae ri Batara untu’ sikamma imanga.

10Ri pakkemaanna tu Israel nia’ se’re bura’ne. Manggena anjo taua iamintu tu Mesir nampa amma’na iamintu tu Israel niarenga Selomit, ana’na Dibri battu ri suku Dan. Ri se’reang allo a’besereki anjo taua siagang sitau tu Israel ri pakkemaanga. Ri wattunna a’besere’, natunrai Allata’ala. Lanri kammana anjo nierammi anjo taua ri tu Israel mange andallekang ri Musa,

11(24:10)

12na natahang anjo taua siagang natayang kaputusanna battu ri Batara angkanaya apa musti nagaukang ke’nanga mae ri anjo taua.

13Nakana Batara mae ri Musa,

14"Erangi anjo taua assulu’ ri pantaranganna kemaya. Sikamma tau le’baka allangngereki attunra anjo taua, musti napadongkoki limanna ri tompo’ ulunna anjo taua nampa anjari sa’bi angkanaya salai anjo taua. Nampa sikontu ummaka musti nasambilai batu anjo taua sa’genna mate.

15Le’baki anjo pa’la’bangi pau anne mae ri bansa Israel: Inai-nai antunrai Allata’ala musti natanggongi kodina kale’bakkanna

16siagang nihukkung matei. Inai-nai mamo antunrai Batara musti nisambilai siagang batu ri sikontu jama’aka. Anjo hukkunga tappakei untu’ tu Israel kammayatompa untu’ bansa maraeng ammantang tuliamo ri tangnga-tangngana tu Israel.

17Inai-nai ambunoi paranna tau musti nihukkung matei.

18Inai-nai ambunoi olo’-olo’na paranna tau, musti nasambei anjo olo’-oloka. Dasara’na anne hukkunga iamintu ‘nyawa nisambei nyawa’.

19Punna nia’ tau ampanraki paranna tau, manna pole apa anjo nagaukanga, anjo apa nagaukanga musti nigaukang tongi mae ri anjo taua.

20Punna annepoki buku, musti nitepo’ tongi bukunna. Punna napa’jari buta siali paranna tau, musti nipa’jari buta siali tongi anjo taua. Punna natunrungi paranna tau sa’genna runtung giginna, musti niparuntung tongi giginna anjo taua. Apa-apa mamo nagaukang sa’genna a’jari caca’ paranna tau, anjo panggaukang kammaya musti nigaukang tongi mae ri anjo taua salaku pambalasang.

21Inai-nai ammuno olo’-olo’na paranna tau, musti nasambei; mingka inai-nai ambunoi paranna tau musti nihukkung matei.

22Anjo hukkunga tappakei untu’ ikau ngaseng, kammayatompa mae ri bansa maraeng niaka ammantang tuli ri alla’nu ngaseng, lanri iNakkemi Batara, Allata’alanu."

23Le’baki napabattu Musa sikamma anjo kana-kanaya mae ri bansa Israel, naerammi ke’nanga anjo tau le’baka antunrai Allata’ala assulukang ri pantaranganna pakkemaanga nampa nisambila siagang batu sa’genna mate. Kammaminjo carana tu Israel anggaukangi apa le’baka Naparentakang Batara mae ri Musa.


  Share Facebook  |  Share Twitter

 <<  Imamat 24 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel