Alkitab Mobile SABDA
[VER] : [MAKASAR]     [PL]  [PB] 
 <<  Kejadian 1 >> 

1Uru-uruna, ri wattu Napa’jarina Allata’ala sikontu apa-apaya,

2tenapa panrala’na buttaya, siagang tenapa apa-apa silolongang. Sikontu apa-apaya nitongkoki ri tamparang luara’ siagang lompoa bombanna, naniaki sassang makkapuka. Mingka niaki koasa malompoNa Allata’ala a’gio’ irate ri tompo’na je’neka.

3Nakanamo Allata’ala, "A’jariko singaraka!" Nampa nia’mo singaraka.

4Sannammi nyawaNa Allata’ala anciniki anjo passalaka. Na Nasa’la’mo singaraka battu ri sassanga,

5nampa Naareng anjo singaraka "Singara’" na anjo sassanga "Bangngi". Allalomi bangngia, battumi bari’basaka. Iaminjo allo makase’rea.

6Nampa Nakanamo Allata’ala, "A’jariko se’re pannahang untu’ ansa’laki anjo je’neka a’jari ruang pammantangang, siagang nanatahang lalang ri tampa’ tassa’laka." Nakajariammo anjo passalaka. Kammaminjo Napare’na Allata’ala pannahang ampasisa’lakai je’ne’ niaka irawanganna anjo pannahanga siagang niaka irateanganna.

7(1:6)

8Naaremmi anjo pannahanga "Langi’". Allalomi bangngia nabattumo bari’basaka. Iaminjo allo makaruaya.

9Nampa Nakana Allata’ala, "Kuerokangi na’lo’loro’ je’ne’ niaka irawanganna langika mange ri se’reang tampa’, sollanna kacinikang buttaya." Nakajariammo anjo passalaka.

10Naaremmi Allata’ala anjo buttaya "Bonto," naanjo je’ne’ asse’rea "Tamparang". Nasannammo nyawaNa Allata’ala anciniki anjo passalaka.

11Nakanamo pole Allata’ala, "Kuerokangi anjo buttaya appatimboi sangka’ rupa poko’-poko’, iamintu appa’niaka wassele’ rappo-rappoang a’lisereka siagang rappo-rappoang maraengannaya." Kajariammi anjo passalaka.

12Kammaminjo nappatimbomo buttaya sangka’ rupa poko’-poko’. Nasannammo nyawaNa Allata’ala anciniki anjo passalaka.

13Allalomi bangngia nabattumo bari’basaka. Iaminjo allo makatallua.

14Nampa Nakana Allata’ala, "Kuerokangi nia’ apa-apa singara’ ri langika untu’ ansingari buttaya, untu’ ampasisa’laki singaraka siagang bangngia, siagang untu’ ampa’nassai wattu pakaramulana alloa, taunga, siagang allo lompona agamaya." Nakajariammo anjo passalaka.

15(1:14)

16Kammaminjo Napa’jarina Allata’ala ruaya apa assarea singara’ lompo, iamintu mataallo untu’ koasa ri singaraka, siagang bulang untu’ koasa ri bangngia; pantaranganna anjo Napare’ tommi sikamma bintoenga.

17Naboli’mi Allata’ala anjo barang-barang singaraka ri langi’ untu’ ansingari buttaya,

18untu’ koasa ri singaraka siagang ri bangngia, siagang untu’ ansa’laki singaraka battu ri sassanga. Na sannammo nyawaNa Allata’ala anciniki anjo passalaka.

19Allalomi bangngia nabattumo bari’basaka. Iaminjo allo makaappaka.

20Nampa Nakana Allata’ala, "Kuerokangi nia’ apa-apa attallasa’ a’lange-lange lalang ri je’neka, siagang jai jangang-jangang anri’ba’ rate ri allaka."

21Na Napa’jarimo Allata’ala olo’-olo’ lompoa lalang ri tamparanga siagang sikamma apa-apa attallasaka ilalang je’ne’, kammayatompa sangka’ rupaya jangang-jangang. Nasannammo nyawaNa Allata’ala anciniki anjo passalaka.

22Yangasenna anjo sikammaya Nabarakkakimi Allata’ala. Siagang Nasaremi parenta sikamma olo’-olo’ attallasaka lalang je’ne’ sollanna a’bija-bija siagang napirassi tamparanga, kammayatompa jangang-janganga sollanna pila’ katambang.

23Allalomi bangngia nabattumo bari’basaka. Iaminjo allo makalimaya.

24Nampa Nakana Allata’ala, "Kuerokangi nia’ ri buttaya sangka’ rupa olo’-olo’ ri bontoa, ia annabaya siagang liaraka, ia lompoa siagang ca’dia." Nakajariammo anjo passalaka.

25Kammaminjo Napare’na Allata’ala sikontu anjo apa-apa niaka siagang sannammi nyawaNa ancini’ ngasengi anjo passalaka.

26Nampa Nakana Allata’ala, "Kamma-kamma anne lapparekKi’ tau lasanrapanga iKatte siagang lasantanjaka iKatte. Lakoasai ke’nanga mae ri sikamma juku’-jukuka, jangang-janganga, siagang sikontu olo’-olo’ maraengannaya, kammaya olo’-olo’ annabaya siagang liaraka, kammaya lompoa siagang ca’dia."

27Kammaminjo bateNa Allata’ala ampa’jari rupataua, na Napa’jari ke’nanga sanrapang KalenNa. Napa’jarimi ke’nanga bura’ne siagang baine.

28Nampa Nabarakkaki ke’nanga angkana, "Ammana’-mana’ mako siagang accucu-cucu mako nu’jari jai, sollanna napammantangngi sossorannu sikontu buttaya siagang nanakoasai. Kusareko tugasa’ untu’ amparakai sikamma juku’-jukuka, jangang-janganga, siagang sikontu olo’-olo’ maraenganga ia liaraka.

29Kusareangko sikontu poko’-poko’ kayu a’lisereka rapponna siagang rappo-rappoang maraenganga untu’ a’jari kanrenu.

30Mingka sikontu jangang-janganga siagang olo’-olo’ liara’ maraengannaya, Kusareangi ruku’ siagang lamungang leko’-lekoka a’jari kanrena." Nakajariammo anjo passalaka.

31Naciniki ngasemmi Allata’ala sikontu anjo apa le’baka Napa’jari, siagang sannang sikalimi nyawaNa. Allalomi bangngia siagang battumi bari’basaka. Iaminjo allo makaannanga.


  Share Facebook  |  Share Twitter

 <<  Kejadian 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran