Alkitab Mobile SABDA
[VER] : [MAKASAR]     [PL]  [PB] 
 <<  Kejadian 13 >> 

1Nabokoimi Abram Mesir nampa a’lampa wara’, mange ri bageang timboranna Kanaan, a’lampa siagang bainenna kammayatompa sikamma barang-baranna. Namminawang todong Lot.

2A’jari kalumanynyang sikalimi Abram; jaimi gimbala’na, bembena, sapina, kammayatompa jaimi pera’na siagang bulaenna.

3A’lampami mange-mange, battu ri se’reang tampa’ mange ri tampa’ maraengannaya, sa’genna mange ri Betel. Battu mange ri daera niaka ri alla’na Betel siagang Ai, ri tampa’ karama’, iamintu tampa’ le’baka napakkemai pirangalloang,

4siagang ambangung tampa’ pakkoro’bangngang. Anjoremmi anynyomba mae ri Batara.

5Lot nia’ tommo kaluargana siagang ata-atanna kammayatompa nia’ tommo gimbala’na, bembena siagang sapina.

6Jari tenamo nangganna’ anjo ruku’ niaka anjoreng ri tampaka, lanri jai dudunamo olo’-olo’ katuona ke’nanga.

7A’besere’mi sikamma pakalawakinna Abram siagang sikamma pakalawakinna Lot. (Anjo wattua nia’ iji tu Kanaan siagang tu Feris ammantang anjoreng ri pa’rasanganga.)

8Nakanamo Abram ri Lot, "Ikatte anne tau sibijaki’. Tabajikai punna a’besere’ taunnu siagang taungku.

9Jari bajikangngangi punna assisa’lakki’. Pileimi bageang kereanga anne tampaka nungai. Punna a’lampa mangeko anjoreng, inakke a’lampa mangea’ ri maraengannaya."

10Nacinikimi Lot anjo daeraya na nacini’mo angkanaya sikontu Lappara’na Yordan sa’genna mange ri kota Zoar jai je’ne’na, sangkamma kokona Batara, yareka sangkamma butta Mesir. (Kammaminjo kaadaanna ri wattu tenanapa niancuruki kota-kota Sodom siagang Gomora ri Batara.)

11Kale’bakkanna iaminjo sikontu Lappara’na Yordan napilei Lot. Jari a’lampami mange ri bageang iraya. Kammaminjo nasisa’la’mo anjo tau ruaya.

12Tuli ammantammi Abram ri butta Kanaan, nampa Lot akkemami ri kota-kota ri lapparaka sa’genna ri ampi’na Sodom.

13Anjo kota Sodom sangnging tau sanna’ ja’dala’na siagang tau doraka ngaseng ri Batara ammantang anjoreng.

14A’lampanamo Lot, Nakanamo Batara ri Abram, "Battu ri antu tampa’ nupammentengia, cinikimi baji’-baji’ sikontu niaka attammulili;

15Sikontu anjo butta nucinika laKupassareangi mae ri kau siagang mae ri sossorannu, sollanna nukammai satunggu-tungguna.

16LaKusareko turungang sannaka jaina, sa’genna manna sitau tania’ akkulle ambilangi siapa jaina ke’nanga. Antekamma takkullena taua ambilangi siapa jaina kassi’na buttaya, sangkamma tomminjo takkullena lanibilang siapa jaina turungannu sallang.

17Kamma-kamma anne, jappaimi anne sikontu pa’rasanganga, nasaba’ laKupassareangi anne mae ri kau."

18Le’baki anjo napalette’mi kema pa’ballakkanna Abram, nampa mange ammantang ri ampi’na poko’-poko’ kayu karamaka, iamintu tampa’ passambayangang ri Mamre ri ampi’na Hebron. Nampa ambangummo anjoreng tampa’ pakkoro’bangngang untu’ Batara.


  Share Facebook  |  Share Twitter

 <<  Kejadian 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel