Dual Panel1Nia’ appa’ karaeng, iamintu: Amrafel battu ri Babilonia, Ariokh battu ri Elasar, Kedorlaomer battu ri Elam, siagang Tideal battu ri Goyim.
2A’bunduki anne ke’nanga siagang lima karaeng maraeng, iamintu: Bera battu ri Sodom, Birsya battu ri Gomora, Syinab battu ri Adma, Semeber battu ri Zeboim, siagang Karaeng Bela ia niarenga todong Zoar.
3Anjo limaya karaenga a’jari agangi siagang napasse’rei tantarana ke’nanga ri Lappara’na Sidim, ia niarenga kamma-kamma anne Tamparang Mate.
4Niaki sampulo anrua taung sallona ke’nanga nikoasai ri Karaeng Kedorlaomer, mingka lalang ri makasampulona antallu taung, angngewami ke’nanga ri anjo karaenga.
5Ri taung makasampulona angngappa’, battumi Karaeng Kedorlaomer siagang aganna ngaseng angngerangi tantarana ke’nanga. Nampa nabetamo ke’nanga tu Refaim ri Asyterot-Karnaim, tu Zuzim ri Ham, tu Emim ri Syawe-Kiryataim,
6siagang tu Hori ri pa’monconganna Edom, nampa naondang ke’nanga mange ri El-Paran ri biring parang lompoa.
7Le’baki anjo ammotere’mi pole anjo tau angngondanga mange ri En-Mispat, ia niarenga Kades kamma-kamma anne. Nakoasaimi ke’nanga sikontu butta Amalek, kammayatompa nabetami ke’nanga tu Amori niaka ammantang ri Hazezon-Tamar.
8Nampa karaeng-karaeng battua ri Sodom, Gomora, Adma, Zeboim siagang Bela, naatoro’mi barisang tantarana ke’nanga ri Lappara’na Sidim untu’ a’bundu’
9angngewai karaeng-karaeng battua ri Elam, Goyim, Babilonia, siagang Elasar; jari lima karaeng a’bali appa’ karaeng.
10Anjo lapparaka rassi siagang bungung tere’. Na ri wattunna lari karaeng-karaeng battua ri Sodom siagang Gomora ambokoi anjo pa’bundukanga, tu’guru’mi ke’nanga naung ri anjo sikamma bungunga. Anjo tallua karaeng maraenga, lappasaki ke’nanga nampa lari nai’ ri monconga.
11Anjo appaka karaeng ammetaya, narampasa’mi sikamma apa-apa niaka ri Sodom siagang Gomora, kammayatompa kanre-kanreanga, nampa a’lampa ke’nanga.
12Na ia Lot, iamintu kamanakanna Abram, nia’ tongi ammantang ri Sodom. Jari nierang ngaseng tongi ri musua siagang sikamma barang-baranna.
13Mingka nia’mo sitau ta’lappasa’ battu ampabattuangi Abram anjo tu Ibrania, sikamma anjo apa kajarianga. Anjo Abram niaki ammantang ri ampi’na poko’-poko’ kayu karama’ ri tampa’ passambayanganna niarenga Mamre, sitau tu Amori. Na anjo Mamre siagang sikamma sari’battanna, iamintu Eskol siagang Aner, agannai Abram.
14Nalangngere’na Abram angkanaya niallei kamanakanna, napasse’remi sikamma tau niaka ri kemana, iamintu sikamma tu cara’deka a’bundu’, nia’ 318 jaina tau. Nampa naondang ke’nanga anjo appaka karaeng sa’genna mange ri kota Dan.
15Anjoreng nabagei taunna Abram a’jari siapa are pa’rappungang, nampa nabunduki anjo musua ri wattunna bangngi. Na nabetamo ke’nanga anjo musua. Naondammi ke’nanga anjo musua sa’genna mange ri Hoba, ri warakkanna kota Damsyik.
16Naallemi ammotere’ Abram sikamma anjo apa-apa le’baka narampasa’ musua, kammayatompa Lot siagang sikamma barang-baranna, siagang sikamma bai’-bainea siagang tunialle maraengannaya.
17Le’baki nabeta Karaeng Kedorlaomer siagang sikamma karaeng agannaya, ammotere’mi Abram. Na battumo karaeng Sodom anruppai ri Parang Sawe ia niarenga todong Lappara’ Karaeng.
18Melkisedek, iamintu karaeng Salem, a’jari imanNa todong Allata’ala Kaminang Tinggia, battui angngerang roti siagang anggoro’ untu’ Abram,
19nampa nabarakkaki Abram nakana, "Poro Allata’ala Kaminang Tinggia, ampa’jariai langika siagang buttaya, ambarakkakiko Abram!
20Nipujimi Allata’ala Kaminang Tinggia, assareako pammetang mae ri musunnu." Le’baki anjo napassareammi Abram mange ri Melkisedek bage sampulona sikontu anjo barang le’baka nirampasa’ nanaalle naerang ammotere’.
21Nampa nakanamo karaeng Sodom mae ri Abram, "Allemi anjo barang-barang le’baka nirampasa’, mingka kupalaki nakipoterang mae ri nakke sikamma taungku."
22Mingka appialimi Abram nakana, "Assumpa’ ri dallekanNa Batara, Allata’ala Kaminang Tinggia, ampa’jariai langika siagang buttaya,
23angkanaya talakualleai apa-apannu, ba’lalo manna silawara’ bannang yareka manna pole sipolong otere’ sandala’nu. Sollanna tena nalanukana sallang, ‘Inakke ampa’jari kalumanynyangi Abram.’
24Tena kuero’ angngalle apa-apa untu’ kalengku. Iaji bawang ero’ kutarima apa le’baka napake sikamma taungku. Mingka lappassammi agang-agangku, iamintu Aner, Eskol siagang Mamre, massing naalle bageanna ke’nanga."