Dual Panel1Nampa Nakanamo Batara ri Musa,
2"Suroi tu Israel ammotere’ nampa appare’ kema ri dallekanna kota Pi-Hahirot, ri alla’na kota Migdol siagang Tamparang Alara’, ri ampi’na kota Baal-Zefon.
3Lanakapangi Karaeng Mesir angkanaya a’deteki tu Israel ri anne pa’rasanganga nampa lingu ri parang lompoa.
4LaKupa’jari kapala batui anjo karaenga sa’genna amminawang angngondangko. Mingka laKupappicinikangi kakoasangKu mae ri anjo karaenga siagang tantarana, na lanaasseng ke’nanga angkanaya iNakkemi Batara." Nampa nagaukammo tu Israel situru’ anjo apa Naparentakanga Batara mae ri ke’nanga.
5Nalangngere’na Karaeng Mesir angkana larimi bansa Israel, assesse’lalammi siagang sikamma pagawena. Nakanamo, "Apa musti nigaukang? Angngapa nanilappassang anjo tu Israelka a’lampa sa’genna tenamo atanta?"
6Nampa appasadiami karaenga kareta pa’bundukang siagang sikamma tantarana.
7A’lampami siagang sikontu kareta bundu’na, kammayatompa annambilangngang kareta kaminang porea, nibaea ri sikamma perwira tantarana.
8Memang Batara ampa’jari kapala batui anjo karaenga, sa’genna naondang tu Israel niaka sitabang a’jappa ambokoi anjo pa’rasanganga nipimpinga ri Batara.
9Amminawammi tantara Mesir siagang sikontu jaranna, kareta bunduka siagang taunna, mange angngondangi tu Israel; napinawammi ke’nanga mange ri tampa’ pakkemaanna ke’nanga ri biring tamparang ri ampi’na Pi-Hahirot.
10Nacini’na tu Israel anjo Karaeng Mesir siagang tantarana battu, teaimi sipato’ malla’na ke’nanga. Nammarrammo ke’nanga appala’ tulung ri Batara.
11Nampa nakanamo ke’nanga ri Musa, "Tenaka jera’ ri Mesir, sa’genna nuerang ikambe sollanna anrinni ri tampaka mate ngaseng ikambe? Cini’mi apa kajarianna anjo panggaukannu!
12Nakana memang ikambe riolo angkanaya lakammai anne kajarianna! Nipauang memang jako angkanaya tea’ mako ganggui ikambe; lappassang tommi ikambe a’jari ata ri Mesir. Bajikangngangi a’jari ataya anjoreng kala matea anrinni ri parang lompoa!"
13Appialimi Musa angkana, "Teako mallakki! Attahangko! Lanuciniki apa Nagaukanga Batara untu’ ampasalamakko. Anjo tu Mesir niaka nucini’ kamma-kamma anne, tenamo nalanucini’ pole.
14KalenNa Batara la’bundu’ untu’ ikau, na ikau tena apa-apa parallu lanugaukang."
15Nakana Batara ri Musa, "Angngapa nummarrang appala’ tulung? Suroi anjo tu Israel a’jappa tulusu’!
16Angkaki takkannu nanupajonjo ri tompo’na tamparanga. Na lata’bage rua anjo je’neka sa’genna akkulle a’limbang tu Israel, a’jappa irawa ri dapara’na tamparanga, ia kalotoroka.
17LaKupa’jari kapala batui tu Mesir sa’genna naondang tulusu’ tu Israel, nampa Kupappicinikang kakoasangKu mae ri Karaeng Mesir, mae ri pasukanna, sikamma karetana siagang sikamma tau niaka rate.
18Lanaassengi tu Mesir angkanaya iNakke Batara."
19Nampa malaeka’Na Allata’ala, ia niaka ri dallekanna pasukang Israel, a’letteki mae ri bageang ri boko. A’lette’ tommi anjo benteng rammanga,
20sa’genna nia’ ri alla’na pasukang Mesir siagang pasukang Israel. Angngerammi sassang anjo rammanga, sa’genna sikabusu’na bangngia takkulleai sireppesi anjo ruaya pasukang.
21Nampa napajonjomo limanna Musa ri tompo’na tamparanga, nampa appabattumo Batara anging battu raya ammiri’ sanna’ kancanna, sa’genna ammunduru’mo je’ne’ tamparanga. La’busu’ bangngi ammiri’ anjo anginga, siagang napinrami anjo tamparanga a’jari butta kalotoro’.
22Ta’bage ruami je’neka, siagang ri wattunna a’limbang tu Israel ri anjo tamparanga, a’jappami ke’nanga ri butta kalotoroka, nampa anjo je’ne’ niaka ri sa’ri kananna siagang kairinna rapangi tembo’ ammenteng nai’.
23Tu Mesirka siagang sikontu jaranna, karetana siagang tau niaka irate, angngondang tulusu’mi ampinawangi tu Israel antama’ ri tangngana tamparanga.
24A’biringi bari’basa’, attoa’mi Batara battu ri benteng pepeka siagang rammanga mae ri tantara Mesir nampa Napa’jari sikaco-kaco ke’nanga.
25Napassala-salangi rodana karetaya sa’genna takkullea tapputara’, sa’genna sanna’ susana ke’nanga lamaju. Nakanamo tu Mesirka, "KalenNa Batara a’bundu’ untu’ tu Israel na nabaliangki’. Umba kilari battu anrinni!"
26Nakana Batara ri Musa, "Pajonjoi limannu ri tompo’na tamparanga, sollanna ammotere’ je’neka, na natallangngang tu Mesirka, sikamma karetana siagang sikamma tau niaka irate ri anjo karetaya."
27Nampa napajonjomo limanna Musa ri tompo’na tamparanga; na ri wattunna ammumbamo alloa, ammotere’mi je’neka sangkamma riolo. Ero’mi tu Mesirka lari ampasalamaki kalenna, mingka nitallangngammi ke’nanga ri Batara antama’ ri tamparanga.
28Ammotereki je’ne’ tamparanga siagang natongko’mi naung sikamma karetaya, sikamma tau niaka andongkoki, kammayatompa sikontu tantara Mesir niaka angngondangi tu Israel antama’ ri tangngana tamparanga, sa’genna mate kabusu’mo ke’nanga.
29Mingka ri wattunna a’limbang tamparang tu Israelka, a’jappai ke’nanga lalang ri butta kalotoro’na tamparanga, siagang je’ne’ niaka ri kananna siagang ri kairinna a’jari kammai tembo’ nai’.
30Anjo alloa Napasalamaki Batara tu Israel battu ri pa’bakkana tu Mesir, siagang nacini’mi ke’nanga sikamma maya’na tu Mesir nierang ri bombang mae ri biring tamparanga.
31Nacini’na tu Israel antekamma lompona kakoasanNa Batara ambetai tu Mesir, lannasa’ sikalimi ke’nanga, siagang tappa’mi ke’nanga ri Batara siagang ri Musa atanNa.