Dual Panel1Nampa nakelongammo Musa siagang tu Israel anne kelonga untu’ mammuji mae ri Batara, "Eroka’ mammuji mae ri Batara, saba’ le’ba’mi ammeta lompo. Sikontu jaranga siagang tu’baena nipasambilai antama’ ri tamparang.
2Batara angngalleia’, Ia makkassa’; Iami ampasalamakka’. Ia Allata’alaku, erokka’ mammuji mae ri Ia, Allata’alana boe-boeku, kupakkelongangi kala’biranNa.
3Batara tubarani makassaka, Batara, iaminjo arenNa.
4Tantara Mesir siagang sikontu karetana nipasambilai antama’ ri tamparang. Perwira-perwira tantarana kaminang gammaraka tallangi naung ri Tamparang Alara’.
5Nia’luki ke’nanga ri tamparang lantang, rapangi batu naunga ri dapara’na.
6Tamaka mappakalannasa’na kagassinganTa, o Batara, Kipaccappuki musunTa tasimbung-simbung.
7Lanri kala’birang malompoTa Kipanraki sikontu angngewaya ri Katte. A’rinrai larroTa rapang pepe’, na natunu ke’nanga rapang rarame.
8Kituiki tamparanga, ta’gulung tinggi je’neka, ammenteng kassa’ rapang tembo’, sa’genna akkulle niolo dapara’na tamparanga.
9Nakana musua, ‘Lakuondangi ke’nanga nampa kujakkala’, kubi’buki pa’dangku, nampa kutumpasa’ ke’nanga. Nampa kurampasa’ sikamma barang-baranna ke’nanga, kubage-bage siagang kukasia’ baji’na sa’genna sukku’ kusa’ring.’
10Mingka sikaliji a’mai’ Batara na Napabattu balaya mae ri tu Mesir. Tallangi ke’nanga rapang tima battala’ lalang ri gamarrunna je’ne’ lompoa.
11Kereangami Allata’ala sangkammanTa, o Batara Kaminang Tinggia siagang matangkasaka? Inai akkulle appare’ gau’ malompo siagang gau’ appakalannasa’ kamma Batara?
12Kiangkaki lima kananTa, nalanynya’mo musua nia’lu’ ri butta.
13Kipimpingi anne bansa le’baka Kipasalama’, lanri majarrekKi’ mae ri janjinTa. Lanri koasa malompoTa naKila’langi, siagang Kirurungang mae ri butta matangkasatTa.
14Sikamma bansa mallangngereka annekkere’mi; gegere’mi tu Filistin siagang sikamma pamimpinna Edom.
15Annekkere’mi tu baranina Moab, ca’dimi pa’mai’na tu Kanaan.
16Tamaka malla’na ke’nanga ansa’bikangi kagassinganNa Batara. Ammalona ummatTa, takkulleai musua antahangi; ta’lappasa’mi bansa le’baka Kilappassang.
17Nampa Kiantara’ tu Israel mange ri tampa’ Kipilea untu’ pammantanganTa. Ammantang tulimi ke’nanga ri bulu’ matangkasatTa, ri Balla’ Kibangunga KalenTa.
18IKattemi Batara, Karaeng, ammarentaya satunggu-tungguna."
19Ri wattunna a’limbang ri tamparanga tu Israel, a’jappai ke’nanga ri dapara’ kalotoro’na tamparanga. Mingka sikamma karetana tu Mesir siagang jaranna kammayatompa tuma’baena, ri wattunna antama’ ngaseng ke’nanga ri je’neka, Napa’lo’loro’mi Batara ammotere’ anjo je’neka assialle ammotere’ sa’genna tallang ngaseng ke’nanga.
20Nampa anjo Miryam, sitau na’bi baine, daenna Harun, angngallemi rabana, kammayatompa sikontu bainea annunrung ngasemmi rabana nampa a’joge’.
21Akkelommi Miryam, nirurungang ri rabana; na nakana kelong-kelonna, "Akkelongko mae ri Batara, saba’ le’ba’mi ammeta lompo. Sikontu jaranga siagang tu’baena nipasambila ngaseng antama’ ri tamparang."
22Nampa naerammo Musa anjo bansa Israel battu ri Tamparang Alara’ mange ri parang lompo niarenga Syur. Tallungalloi ke’nanga a’jappa allalo ri parang lompoa, natale’baka ammuntulu’ je’ne’.
23Nampa battumo ke’nanga ri se’reang tampa’ niarenga Mara, mingka paiki anjoreng je’neka, sa’genna takkullea niinung. Lanri kammana minjo naniaremmo anjo tampaka Mara, battuanna pai’.
24A’moro-moromi anjo taua mae ri Musa siagang akkuta’nammi ke’nanga ri ia angkana, "Apamo laniinung?"
25Appala’ doang dudumi Musa mae ri Batara. Nampa nipicinikiammo ri Batara sipolong kayu. Naallemi Musa anjo kayua nampa napasambila antama’ ri je’neka, sa’genna a’jari la’ba anjo je’neka, nakkullemo niinung. Anjoremmi ri tampaka assare Batara paratorang-paratorang mae ri ke’nanga, siagang anjoreng tommi Naso’ri ke’nanga.
26Nakana Batara, "Mannuruki tojeng-tojeng mako mae ri Nakke, siagang gaukangi apa Kukanaya baji’; turuki sikamma parentaKu. Punna nugaukang anjo kammaya, tena nulaKuhukkung sangkamma garring le’baka Kupabattu mae ri tu Mesirka. INakkemi Batara ampamolleako."
27Le’baki anjo battumi ke’nanga mange ri se’reang tampa’ niarenga Elim. Anjoreng nia’ sampulo anrua timbuseng je’ne’ siagang tujupulo poko’ korma. Appare’mi ke’nanga kema ri ampi’na anjo je’neka.