Alkitab Mobile SABDA
[VER] : [MAKASAR]     [PL]  [PB] 
 <<  Keluaran 17 >> 

1Nampa a’lampamo bansa Israel ambokoi parang lompo Sin, nampa a’lette’-lette’ battu ri se’reang tampa’ mange ri tampa’ maraenga situru’ Naparentakanga Batara. Ri se’reang wattu akkemami ke’nanga ri Rafidim, mingka tena je’ne’ inung anjoreng.

2Jari a’moro-moromi ke’nanga ri Musa nakana, "Sarei ikambe je’ne’ inung." Appialimi Musa angkana, "Angngapa nu’moro-moro anso’ri Batara?"

3Mingka sanna’ ngaseng turerena ke’nanga siagang tuli a’moro’-moromi ke’nanga ri Musa. Nakana ke’nanga, "Angngapa nuerangi ikambe assulu’ ri butta Mesir? Nukellai ikambe siagang ana’-ana’na ikambe kammayatompa olo’-olo’na ikambe mate napakamma turere?"

4Jari akkio’mi Musa mae ri Batara, angkana, "Apa musti kugaukang mae ri anne taua? Ciniki, eroki ke’nanga ansambila’ batu."

5Nakanamo Batara ri Musa, "Kioki siapa are pamimpinga siagang a’jappa mako siagang ke’nanga, a’jappa riolo ri dallekanna anjo bansaya. Erang tongi takkannu le’baka nupake untu’ antunrungi Binanga Nil.

6LammentengA’ ri dallekannu irate ri se’reang batu lompo ri Moncong Sinai. Tunrungi anjo batua, nampa lassulu’ je’neka battu ri anjo batua sollanna akkulle anjo taua angnginung." Nagaukammi Musa anjo kammaya nisa’bi ri sikamma pamimpinna tu Israel.

7Anjo tampaka niarengi Masa, lanri anjorengi ri tampaka tu Israel naso’ri Batara wattunna akkuta’nang ke’nanga angkana, "Apaka Narurungangki’ Batara yareka tena?" Anjo tampaka niareng tongi Meriba, lanri anjoremmi ri tampaka akkunrareng tu Israel.

8Nampa battumo tu Amalek ambunduki tu Israel ri Rafidim.

9Nakanamo Musa ri Yosua, "Pilei siapa are jaina tau untu’ ambunduki anjo tu Amalek. Ammuko lammentenga’ irate ri coppo’na buluka anta’galaki takkang Nasuro eranga Allata’ala."

10Nagaukammi Yosua anjo apa naparentakanga Musa mae ri ia. A’lampami mange ambunduki tu Amalek, nampa Musa, Harun siagang Hur nai’mi ri buluka sa’genna ri coppo’na.

11Lalang naangka’na limanna Musa, ammetai tu Israel. Mingka punna napanaung limanna Musa, tu Amalek ammeta.

12Ri wattunna mangngammo Musa, angngallemi Harun siagang Hur se’re batu sollanna akkulle Musa ammempo; ammentemmi Harun siagang Hur ri sa’ri kairinna siagang ri sa’ri kananna Musa untu’ antumpaki limanna sollanna tuli ta’angka’na nai’ sa’genna labu alloa.

13Kale’bakkanna nibetami tu Amalek ri Yosua.

14Nakanamo Batara ri Musa, "Tulisiki anne passala’ pammetanga sollanna tuli niu’rangi. Paui mae ri Yosua angkanaya iNakke ampanraki anjo tu Amalek."

15Nampa appaentemmo Musa se’re tampa’ pakkoro’bangngang na naareng "Batarami Banderaku".

16Nakana Musa, "Ta’galaki tinggi-tinggi banderaNa Batara! KalenNa Batara a’bundu’ angngewai tu Amalek sa’genna satunggu-tungguna!"


  Share Facebook  |  Share Twitter

 <<  Keluaran 17 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel