Dual Panel1Nampa Nakanamo Batara mae ri Musa, "Passareangi anne sikammaya paratoranga mae ri tu Israel:
2Punna ammalliko sitau ata nabansanu tonji, musti napanjamangko annang taung sallona. Ri makatujuna taung, musti nilappassangi anjo taua siagang tena naparallu a’bayara’ apa-apa.
3Ebara’ angkana tenapa na’bunting ri wattunna a’jari ata mae ri kau, anjo bainenna takkulleai amminawang punna assuluki. Mingka ebara’ angkana a’bunting memammi ri wattunna a’jari ata mae ri kau, anjo bainenna akkullei amminawang siagang ia.
4Punna nipa’bunting ri pinggawana siagang sitau baine, nampa anggappa ana’, anjo bainenna siagang ana’na pinggawana pata, siagang takkulleai amminawang ri anjo ataya punna nilappassangi.
5Mingka punna nakana anjo ataya angkana nangai bainenna, ana’-ana’na, siagang pinggawana, na taerokaja nilappassang,
6musti nierangi ri pinggawana mae ri tampa’ ibadaya. Anjoreng musti nisuroi ammenteng siagang ammanjeng anjo ataya ri pakke’buka yareka ri benteng pakke’bu’na tampa’ ibadaya, nampa anjo pinggawana musti natintingi tolinna anjo ataya. Nampa la’jarimi anjo ataya salaku ata mae pinggawana sa’genna mate.
7Punna sitau baine tu Ibrani nibalukang ri manggena na’jari ata, anjo bainea takkulleai nilappassang punna narapi’ annang taung. Jari tena nasangkamma siagang bura’nea.
8Punna tena ningai ri pinggawana ia eroka ambuntingi, musti nibalukangi ammotere’ mae ri tau toana. Anjo bainea takkulleai nibalukang mae ri bansa maraeng, saba’ le’ba’mi nigau’ taadele’ ri pinggawana tenaya narupai janjinna.
9Punna nia’ tau ammalli ata baine untu’ napa’bunting siagang ana’na, anjo ata bainea musti nugau’ kammai ana’ kalenna.
10Punna a’bunting poleang anjo ana’ bura’nea, musti natanggongi tulusuki kanrena siagang care-carena kammayatompa sikontu ha’na kamma biasa anjo baine makase’rena.
11Punna tena nagaukangi anjo kammaya, musti nalappassangi anjo bainenna na tena nannarima doe’ pappasulu’."
12"Inai-nai amba’ji paranna tau sa’genna mate, musti nihukkung matei.
13Mingka punna tena nakunjungi natunrung siagang tena pattujunna lammuno, akkullei lari mange ri se’reang tampa’ eroka Kupicinikiangko sallang, siagang anjoremmi lanila’langngi.
14Mingka punna nia’ tau nabattui bambang nyawana siagang nakunjungi memang tongi ambunoi paranna tau, nampa lari mange ri tampa’ pakkoro’bangngangKu untu’ a’boya pa’la’langngang, anjo tau kammaya musti niallei battu ri tampa’ pakkoro’bangngangKu nampa nihukkung matei.
15Inai-nai amba’ji manggena yareka amma’na musti nihukkung matei.
16Inai-nai a’llukka’ tau, musti nihukkung matei, apaka le’ba’mi nabalukang anjo taua yareka nania’ ija ri balla’na.
17Inai-nai antunrai manggena yareka amma’na musti nihukkung matei.
18Punna nia’ tau assiba’ji nanatunrung taua siagang batu yareka siagang panja’guru’na, mingka tena nabunoi, tena nalanihukkung. Punna anjo tau nitunrunga an’ra’bai naung napakamma anjo pattunrunga,
19mingka akkulleji ambangung poleang siagang a’jappa ammake takkang, anjo tau amba’jiai musti naparakai sa’genna baji’, siagang musti nasambei karugianna anjo taua lalang garrinna.
20Inai-nai amba’ji atanna bainea yareka bura’nea sa’genna mate silalonna anjo ataya, musti nihukkungi.
21Mingka punna tenaja namate anjo ataya lalang siallo yareka ruangallo, tena nanihukkungi anjo pinggawana. Anjo karugiang nakasiaka lanri tappela’namo atanna, iaminjo a’jari hukkungang mae ri ia.
22Punna nia’ siapa are tu bura’ne assiba’ji nampa kalase’renna ri ke’nanga napa’risi se’rea baine sitabanga attianang sa’genna nalari cera’, mingka tenaja nakapanrakangi ri bageang maraenga ri kalenna anjo taua musti a’bayaraki doe’ passala situru’ pappala’na bura’nenna anjo bainea siagang nisitujui ri haking-hakinga.
23Mingka punna la’bi battala’ pa’risi’na anjo bainea, hukkungana anjo kaja’dallang kammaya iamintu nyawa nisambei nyawa,
24mata nisambei mata, gigi nisambei gigi, lima nisambei lima, bangkeng nisambei bangkeng,
25bokka’ nisambei bokka’, bokka’ bo’loso’ nisambei bokka’ bo’loso’, akkambang nisambei akkambang.
26Inai-nai antunrungi matanna atanna sa’genna buta, musti nalappassangi anjo ataya a’jari pa’bayara’ mae ri matanna.
27Punna nia’ tau amba’ji atanna sa’genna tepo’ giginna, anjo ataya musti nilappassangi a’jari pa’bayara’ mae ri giginna."
28"Punna nia’ sikayu sapi laki antanruki taua sa’genna mate, anjo sapia musti nibunoi nisambila batu, nampa dagenna takkulleai nikanre, mingka talanihukkungai patanna sapi.
29Punna biasa anjo sapi lakia annanru’ tau, nampa le’ba’mo nipakainga’ patanna, mingka tena najagai anjo olo’-olo’na, nampa annanru’ tau anjo sapi lakina sa’genna mate anjo tau natanruka, anjo sapia musti nibunoi nisambilai batu, siagang patanna musti nihukkung mate tongi.
30Mingka puna akkullei anjo patanna sapi a’bayara’ doe’ passala, musti a’bayaraki situru’ jaina apa nituntuka untu’ ansambei nyawana.
31Punna anjo tau nibunoa bura’ne yareka baine, kamma tomminjo paratoranna.
32Punna anjo tau nibunoa ata bura’ne yareka baine, anjo patanna sapi musti a’bayaraki tallumpulo doe’ pera’ mae ri anjo patanna ata, siagang anjo sapi lakia musti nisambilai batu sa’genna mate.
33Inai-nai angngallei pattongko’na bungunga yareka angngekei bungung nampa tena natongkoki, nampa nia’ sikayu sapi laki yareka keledai tu’guru’ antama’,
34anjo patanna bungung musti a’bayaraki karugiang mae ri patanna anjo olo’-oloka, mingka akkullei naalle anjo olo’-olo’ mateamo untu’ kalenna.
35Punna nia’ sapi lakina se’reang tau ambunoi sapi lakina tau maraenga, anjo ruaya patanna sapi musti nabalukangi anjo sapi laki attallasaka nampa nabage rua ballinna. Musti nabage rua tongi ke’nanga dagenna anjo sapi matea.
36Mingka punna niasseng memammo angkanaya anjo sapi lakia nangai memangi annanruka, nampa tena nijagai ri patanna, musti nasambei siagang sapi laki attallasa’, nampa akkulle naalle anjo sapi mateamo untu’ kalenna."