Dual Panel1Anjo wattua nakalawaki Musa sikamma gimbala’na siagang bembena Yitro, iamintu matoanna, imanga ri butta Midian. Ri wattunna naemba anjo olo’-olo’ piaraya anta’leang ri parang lompoa, battumi mange ri Moncong Sinai, iamintu moncong matangkasaka.
2Anjoreng nia’mi malaeka’Na Batara ampappicinikangi KalenNa mae ri Musa, lalang pepe’ a’rinraya assulu’ battu ri tangnga-tangngana rompoka. Naciniki Musa a’rinra anjo rompoka, mingka tena nakkanre.
3Nakanamo pikkiranna Musa, "Heba’na! Tena nakkanre anjo rompoka. Erokka’ ambani-bani mange anciniki."
4Naciniki Batara a’reppese’ Musa ri anjo tampaka. Jari ammarrammi battu lalang ri tangnga-tangngana anjo rompoka angkana, "Musa, Musa!" Appialimi Musa angkana, "Niaka’ anrinni, Batara!"
5Nakanamo Allata’ala, "Teako a’reppesi. Sungkei pa’lapa’ bangkennu, lanri niakko ammenteng ri butta matangkasaka.
6INakke minne Allata’alana boe-boenu, Allata’alana Abraham, Ishak, siagang Yakub." Jari natongko’mi rupanna Musa, lanri malla’na anciniki Allata’ala.
7Nampa Nakanamo Batara, "Kucini’mi kasessanna ummakKu ri Mesir, siagang Kulangngere’mi pakkio’na ke’nanga, ampalaki nilappassang battu ri sikamma tau anjallakkangai ke’nanga. Sikontutojenna Kuasseng ngasengi kasessanna ke’nanga.
8Lanri kammana anjo, erokKa’ naung untu’ allappassangi ke’nanga battu ri limanna tu Mesirka, nampa Kuerang ke’nanga assulu’ battu ri anjo pa’rasanganga naKuerang mange ri pa’rasangang luaraka. Buttana coppongi siagang akkalumanynyangi. Kamma-kamma anne anjo pa’rasanganga napammantangi bansa Kanaan, bansa Het, Amori, Feris, Hewi siagang Yebus.
9Kulangngere’mi karru’na bansa Israel, siagang Kucini’ tommi antekamma batena nijallakkang ri bansa Mesir.
10Kamma-kamma anne Kusuroko untu’ mange andallekang ri Karaeng Mesir sollanna akkulle nupimping bansaKu assulu’ battu ri anjo pa’rasanganga."
11Mingka nakanamo Musa ri Allata’ala, "Inai tonga’ anne inakke, sa’gengku akkulle andallekang ri karaenga siagang angngerangi bansa Israel assulu’ battu ri Mesir?"
12Appialimi Allata’ala angkana, "INakke lantulungko. Napunna nuerammo assulu’ anjo bansaya battu ri Mesir, lanugaukang ngasemmi ibadaya mae ri Nakke ri anne monconga. Iaminjo a’jari butti angkana iNakke assuroko."
13Appialimi Musa angkana, "Mingka punna mangea’ ri tu Israel siagang kukana ri ke’nanga: ‘Allata’alana boe-boenu assuroa’ battu anne mae ri kau ngaseng,’ tantu lakkuta’nangi ke’nanga angkana, ‘Inai arenNa?’ Jari apa musti kupappialiang mae ri ke’nanga?"
14Nakanamo Allata’ala, "INakke iamintu INAKKE NIAKA. Iaminne musti nupau mae ri bansa Israel angkanaya, Ia niarenga INAKKE NIAKA, Iaminjo assuroa’ battu mae ri kau ngaseng.
15Kabarrang tongi angkanaya iNakke, Batara, Allata’alana boe-boena ke’nanga, Allata’alana Abraham, Ishak siagang Yakub, ansuroko mae ri ke’nanga. INakke Batara, iaminjo arengKu sa’genna satunggu-tungguna. Iaminjo nisa’bukanga’ ri sikontu bansaya sa’genna sikontu bija-bijanna.
16A’lampamako siagang passe’rei sikontu pamimpinna tu Israel. Pa’la’bangi pauang ke’nanga angkana iNakke, Batara, Allata’alana boe-boena ke’nanga, Allata’alana Abraham, Ishak siagang Yakub, le’ba’mi Kupappicinikang KalengKu mae ri kau. Pauangi ke’nanga angkanaya battuMa’ mae ri ke’nanga siagang Kucini’mi antekamma batena nigau’ ke’nanga ri bansa Mesir.
17Siagang le’ba’mi Kupattantu untu’ angngerangi ke’nanga assulu’ battu ri Mesir, tampa’na nijallakkang ke’nanga, siagang Kuantaraki ke’nanga mange ri se’reang pa’rasangang kalumanynyang siagang copponga buttana, iamintu pa’rasangang Kanaan, bansa Het, Amori, Feris, Hewi, siagang Yebus.
18Lanapilangngeri ummakKu kana-kanannu. Nampa musti siagangko sikamma pamimpinna tu Israel a’lampa mange andallekang ri Karaeng Mesir siagang angkana ri ia, ‘Batara, Allata’alana tu Ibrani, nia’mi battu ampappicinikangi KalenNa mae ri kambe. Kamma-kamma anne kisaremi ising ikambe a’lampa kira-kira tallungallo sallona nijappai battu anrinni, mange ri parang lompoa untu’ assare koro’bang mae ri Batara, Allata’alana ikambe.’"
19Nampa Nakana pole Allata’ala, "Kuassengi angkanaya taerokai Karaeng Mesir allappassangko a’lampa, pantaranganna punna nipassai.
20Mingka laKupakei kakoasangKu, siagang laKuhukkungi Mesir, iamintu Kupitujui siapa are bala lompo. Le’baki anjo, lanasare mako ising untu’ a’lampa.
21LaKupagioki pa’mai’na tu Mesir sa’genna lammoro’ pa’mai’ mae ri kau ngaseng; sa’genna ri wattunna a’lampa ummakKu, tena nala’lampa kosong limanna.
22Tunggala’ tu baine Israelka massing lappalaki battu ri siampi’ balla’na tu Mesirka kammayatompa battu ri tu baine naaganga siballa’, iamintu pakeang siagang belo-belo pera’ siagang bulaeng. Lanupakei anjo belo-beloa siagang ana’-ana’nu. Kammaminjo batenu langngalleangi apa-apanna tu Mesir."