Dual Panel1Nampa Nakana Batara ri Musa, "Bokoimi anne tampaka nampa a’lampako siagang anjo bansa nueranga battu ri Mesir mange ri pa’rasangang Kupa’janjianga ri Abraham, Ishak siagang Yakub kammayatompa jari-jarina ke’nanga.
2Nia’ sitau malaeka’ laKusuro battu anrurungang ngasengko. LaKubongkai bansa Kanaan, Amori, Het, Feris, Hewi siagang Yebus.
3Lamangeko ri butta kalumanynyanga siagang copponga. Mingka iNakke KalengKu tena Kula’lampa siagang ikau ngaseng, sollanna tena naKuancurukko ri tangngana aganga, lanri ikau bansa kapala batu ngasengko."
4Nampa Nasuro Batara anjo Musa ampaui mae ri bansa Israel angkana, "Ikau ngaseng bansa kapala batuko. Ebara’ angkana Kupinawangko manna poro sinampe’ bawang, mattantumi Kuancuru’nu taba sikali. La’gasa’ ngasengi sikontu belo-belonu, nampa laKupattantu apa eroka Kugaukang mae ri kau ngaseng." Nalangngere’na anjo pappakainga’Na Batara, si’na sikalimi pa’mai’na ke’nanga rapang tau susa kamateanga. Nampa nala’gasa’ ngasemmo belo-belona ke’nanga. Jari ri wattunna nabokoimo ke’nanga Moncong Sinai, tenamo nammake belo-belo bansa Israel.
5(33:4)
6(33:4)
7Kere-kere wattu, punna akkema bansa Israel, angngallei Musa Kema nampa nabangung bella-bella sike’de’ battu ri kemana ke’nanga. Anjo kemaya niarengi KemaNa Batara, nampa inai-inai ero’ appala’ pappasaile battu ri Batara, musti mangei anjoreng.
8Punna a’lampai Musa mange anjoreng ri anjo Kemaya, ammentengi tu Israel ri dallekang pakke’bu’ kemana ke’nanga nampa naparhatikang Musa sa’genna antama’mo.
9Punna antamamo Musa, naummi benteng rammanga nampa ammenteng ri pakke’bu’na Kemaya. Battu ri iaminjo rammanga a’bicara Batara siagang Musa.
10Ri wattunna nacini’ tu Israel benteng rammanga ri pakke’bu’ KemaNa Batara, ammentemmi nampa su’ju’ ngaseng ke’nanga massing ri pakke’bu’ kemana ke’nanga.
11Assidallekammi a’bicara Batara siagang Musa, rapang tau a’bicaraya siagang aganna. Le’baki anjo ammotere’mi Musa mae ri pakkemaanga. Mingka Yosua ana’na Nun, turungka pambantuna Musa, tuli ammantanna lalang ri anjo Kemaya.
12Ri se’reang allo nakana Musa mae ri Batara, "O, Batara, Kiparentakanga’ anrurungangi anne bansaya mange ri pa’rasangang Kipa’janjianga. Mingka taKipauai angkana inai laKisuro untu’ antulunga’. Kikana Kiassenga’, Batara, siagang mangngellaiKi’ ri nakke.
13Punna kamma, Kipauang laloma’ angkana apa rancanaTa, sollangku akkulle allayaniKi’ siagang tuli kupakasannang pa’maitTa. Kiu’rangi tongi angkanaya anne bansaya le’ba’mi Kipile a’jari iKatte ampatangi."
14Nakanamo Batara, "LaKujagaiko sollanna akkulle nupatang butta le’baka Kupa’janjiang."
15Appialimi Musa angkana, "Punna tena Kimminawang ri kambe o Batara, teaKi’ suroi ikambe ambokoi anne tampaka.
16Antekamma lakkulle naasseng taua angkana mangngellaiKi’ ri nakke siagang mae ri anne bansaya, punna tena Kitulungi ikambe? KahaderanTa o Batara, ri tangnga-tangngana ikambe iami la’jari pammatei angkanaya tena nasangkamma ikambe siagang bansa-bansa maraenga ri anne linoa."
17Nakanamo Batara ri Musa, "LaKuturukiangko pappala’nu, lanri Kuassengko siagang lanri nia’na pangngellaingKu mae ri kau."
18Nampa napala’mi Musa angkana, "O Batara, Kipicinikianga’ cayana kahaderanTa."
19Appialimi Batara angkana, "LanumaloA’ siagang sikontu kala’birangKu ri dallekannu, nampa Kupau areng matangkasakKu. INakkemi Batara, siagang laKupappicinikangi kalammoranna pa’maikKu siagang pangngamaseangKu mae ri sikamma tau le’baka Kupile.
20Tena nalaKupappicinikang rupangKu mae ri kau, lanri inai-nai anciniki rupangKu tena olona lakkulle tuli attallasa’.
21Ri ba’leangKu anne nia’ bulu’ batu; akkulleko ammenteng anjoreng.
22Ri wattu allalona caya kahaderangKu, laKupantamakko ri alla’na anjo bulu’ batua siagang Kutongkokko siagang pala’ limangKu sa’gengKu allalomo.
23Nampa laKubeso’ limangKu sollanna akkulleA’ nucini’ battu ri boko, mingka rupangKu takkulleai lanucini’."