Alkitab Mobile SABDA
[VER] : [MAKASAR]     [PL]  [PB] 
 <<  Keluaran 34 >> 

1Nampa Nakanamo Batara ri Musa, "Apparekko ruang la’ba’ batu nipa’ sangkamma rioloa. LaKutulisiki ri anjo batua kana-kana sangkammaya kana-kana niaka tattulisi’ ri anjo batu le’baka nureppe’.

2Apparuruko ammuko bari’basa’ untu’ nai’ ri Moncong Sinai nunampa andallekang ri Nakke rate ri coppo’na anjo monconga.

3Tena manna sitau akkulle amminawang ri kau yareka nia’ mange anjoreng ri anjo monconga. Sikamma sapia siagang gimbalaka teako lappassangngi a’ruku’ ri bangkenna anjo monconga."

4Nampa appare’mo pole Musa ruang la’ba’ batu nipa’. Ammukona ri bari’basa’ dudua naerammi nai’ ri Moncong Sinai situru’ apa Naparentakanga Batara mae ri ia.

5Na naummo Batara lalang ri rammanga; ammentengi siagang Musa ri anjo tampaka, nampa Napau areng matangkasa’Na, iamintu Batara.

6Nampa allalomo Batara ri dallekanna Musa na Nakana, "INakke Batara, iamintu Allata’ala malammoro’ pa’maika siagang mangngamaseanga. Anjo pangngamaseangKu alla’bi-la’bi; majarreKa’ siagang tena naKulinta’ larro.

7Tuli mangngamaseangKu mae ri assa’bu-sa’bu lapisi’na turunang siagang Kupammopporangi kasalanga siagang dosaya; mingka sikamma tau salaya tena sikali nakkulle ta’lappasa’ battu ri hukkungangKu, ba’lalo manna ana’ cucunna sa’genna lapisi’ makatallua siagang makaappaka anjo tau dorakaya takkulleai ta’lappasa’ battu ri hukkungangKu."

8Anjo wattua su’ju’ memammi Musa anynyomba.

9Nakana, "O Batara, punna ma’nassa nia’ tojeng pangngellainTa mae ri nakke, kupalaki, poro amminawang laloKi’ siagang ikambe. Anne bansaya memang kapala batui, mingka Kipammopporang laloi kaja’dallanna siagang dosana ikambe, siagang poro Kitarima laloi ikambe salaku umma’ kalenTa."

10Nakana Batara ri Musa, "Kamma-kamma anne apparekKa’ parjanjiang siagang bansa Israel. LapparekKa’ gau’ appakalannasa’ ri dallekang matanna ke’nanga, ia tenayapa nale’ba’ nigaukang ri alla’na bansaya ri lino. Sikontu bansaya lanacini’ ngasengi sikamma anjo gau’ appakalannasa’ Kugaukanga, lanri iNakke, Batara, lappa’jariA’ se’reang gau’ malompo untu’ ikau ngaseng.

11Mannurukiko ri hukkung-hukkung Kupassareanga mae ri kau anne alloa. LaKubongkai a’lampa bansa Amori, Kanaan, Het, Feris, Hewi siagang Yebus ri wattunnu maju mae ri ke’nanga.

12Teako appareki parjanjiang siagang sikamma tau niaka anjoreng ri pa’rasangang nubattuia, nasaba’ anjo kammaya akkullei a’jari sikko’ angngerangako mae ri kamateanga.

13Jari, tea’ laloko gaukangi kammaya; mingka rumbangi sikamma tampa’ pakkoro’bangnganna ke’nanga, ancuruki sikamma batu-batu karama’na ke’nanga, kammayatompa ta’bang ngasengi sikamma benteng-bentenna Asyera, iamintu barhalana ke’nanga.

14Tea’ laloko anynyombai rewata maraeng, nasaba’ iNakke Batara, iamintu Allata’ala tenaya naero’ nipasangkamma siagang apa-apa mamo.

15Teako appareki parjanjiang siagang bansa niaka anjoreng, nasaba’ ri wattunna anynyomba siagang assare koro’bang ke’nanga mae ri rewata-rewatana ke’nanga lanakio’ tongko, siagang lanupinawangi ke’nanga.

16Punna a’bunting ana’-ana’nu siagang bai’-baine bansa maraeng, laninyonyoki ke’nanga ri anjo bai’-bainea untu’ ambokoiA’ nampa anynyomba ri rewata-rewatana ke’nanga.

17Teako appareki siagang anynyombai ri rewata-rewata de’dekanga.

18Pakalompoi allo Passua’-suarranna Roti Tenaya Nammake Pa’gambang. Kamma le’baka Kuparentakang mae ri kau, musti angnganreko roti tenaya nammake pa’gambang lalang tuju allo sallona lalang ri bulang Abib, lanri lalang iaminjo bulanga nanubokoi butta Mesir.

19Sikontu ana’-ana’ bura’ne bungasaka siagang olo’-olo’ laki bungasa’ lassuka, iNakke pata,

20mingka ana’ keledai bungasa’ lassuka musti nupasuluki siagang sikayu ana’ gimbala’ nupassareang a’jari sambenna. Punna taerokako ampasuluki, musti nutepoki kallonna anjo keledaia. Sikamma ana’ bura’ne bungasaka musti nupasuluki. Tena manna sitau akkulle battu mae ri Nakke punna tena nangngerang passare.

21Nia’ annang allo untu’ wattu anjama; teako anjamai ri allo makatujua, manna pole nawattu pappa’jekoang yareka wattu pakkattoang.

22Pakalompoi Allo Lompo Pakkattoang ri wattunnu lappakkaramula angkattoi uru wassele’ gandunnu. Pakalompo tongi Allo Lompo Pa’ballakang Leko’-leko’ Kayua ri kala’busang taunga, ri wattunnu angngalle wassele’ rappo-rappoang.

23Lalanna sitaung musti battui pintallung sikamma tubura’-bura’nea anynyomba mae ri Nakke, Karaeng Allata’alana Israel.

24Punna le’ba’mo Kubongka sikamma bansa-bansaya battu ri dallekannu siagang Kupakaluara’ daeranu, tena manna sitau barani langngallei pa’rasangannu ri wattunnu a’lampa untu’ ampakalompoi Allo Lompo Passua’-suarrang Roti Tenaya Nammake Pa’gambang, Allo Lompo Pakkattoang, siagang Allo Lompo Pa’ballakang Leko’-leko’ Kayua.

25Ri wattunnu assare koro’bang olo’-olo’ polongang, teako assarei apa-apa ammakea pa’gambang. Olo’-olo’ nipolonga untu’ koro’bang ri passua’-suarrang Paska musti nipila’busi memangi anjo bangngia; takkulleai nia’ tassesa sa’genna ammuko.

26Tunggala’ taung musti angngerangko mae ri Balla’Na Karaeng Allata’alanu iamintu wassele’ bungasa’na buttanu. Dageng gimbalaka yareka dageng ana’ bembea takkulleai nipallu siagang je’ne’ susunna anronna."

27Nakana pole Batara ri Musa, "Tulisi’ ngasengi sikamma anjo kana-kanaya, lanri iaminjo kana-kanaya a’jari dasara’ naKuappare’ parjanjiang siagang ikau kammayatompa siagang bansa Israel."

28Patampulo allo patampulo bangngi ammantang Musa anjoreng siagang Batara; na lalanna anjo wattua tena nangnganre siagang tena nangnginung. Anjo kana-kana parjanjianga, iamintu Sampulo ParentaNa Allata’ala, nitulisiki ri anjo batua.

29Ri wattunna naung Musa battu ri Moncong Sinai angngerangi anjo Sampuloa Parenta, accayai rupanna lanri le’ba’na a’bicara siagang Batara; mingka tanaassengai kalenna Musa angkana accayai rupanna.

30Harun siagang sikontu ra’yaka naciniki angkanaya accayai rupanna Musa, siagang malla’mi ke’nanga anreppesi Musa.

31Mingka nakio’mi Musa ke’nanga. Jari battumi Harun siagang sikamma pamimpinna ke’nanga anreppesi, nampa a’bicaramo Musa mae ri ke’nanga.

32Le’baki anjo a’rappungang ngasemmi sikontu ra’ya’ Israel angkulilingi, nampa napabattumo Musa mae ri ke’nanga sikontu hukkung Napassareanga Batara mae ri ia irate ri Moncong Sinai.

33Le’baki a’bicara siagang ke’nanga, nabombo’mi rupanna Musa siagang kaeng.

34Sampang antama’ Musa ri KemaNa Batara untu’ a’bicara siagang Batara, nasungkei anjo kaenga sa’genna assulu’. Le’ba’na napabattu mae ri bansa Israel sikontu pasanNa Batara,

35accayami nacini’ ke’nanga rupanna Musa. Jari nabombo’mi pole rupanna sa’genna narapi’ wattunna a’bicara pole siagang Batara.


  Share Facebook  |  Share Twitter

 <<  Keluaran 34 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel