Dual Panel1Nakanamo Batara ri Musa,
2"Bangummi anjo KemaKu ri tanggala’ se’re bulang se’re.
3Pantamaki anjo Patti Parjanjiang napammantangia anjo Sampuloa Parenta nampa nusarei kaeng passimbang ri dallekanna.
4Boliki mejanga ri tampa’na siagang sikamma pakkakasa’na. Pantama tongi bangkeng lampua siagang patabai lampuna.
5Boliki tampa’ pattunuang dupa bulaenga ri dallekanna Patti Parjanjianga, siagang gentungi gordeng ri pakke’bu’ Kemaya.
6Boliki tampa’ pakkoro’bangngang untu’ koro’bang nitunua ri dallekang pakke’bu’na Kemaya.
7Boliki ba’ je’ne’ pa’bissa-bissanga ri alla’na Kemaya siagang anjo tampa’ pakkoro’bangnganga, nampa nubonei je’ne’.
8Nampa nupataba layaraka ri tammulilina paranglakkeng Kemaya, siagang gentungi gordeng pakke’bu’ lompona paranglakkenga.
9Nampa anjo Kemaya siagang sikontu pakkakasa’na musti nupassareangi mae ri Nakke; minynyaki ngasengi siagang minynya’ upacara sollanna a’jari matangkasa’ ngaseng siagang nisa’la’ untu’ iNakke.
10Kamma tongi anjo batenu ampassareangi ri Nakke tampa’ pakkoro’bangnganga siagang sikamma pakkakasa’na, sollanna nisa’la’ ngaseng untu’ iNakke.
11Kamma tongi anjo nugaukang mae ri ba’ je’neka siagang pa’lapa’na.
12Le’baki anjo, suroi Harun siagang ana’-ana’na battu ri pakke’bu’ Kemaya na nabissai kalenna.
13Pipakei Harun siagang pakeang imang, siagang minynyaki sollanna nisa’la’ untu’ allayaniA’ salaku imang.
14Nampa suroi ana’-ana’na a’reppese’, na nupipakei kameja ke’nanga.
15Nampa minynyaki ke’nanga sangkamma batenu amminynyaki manggena ke’nanga, sollanna akkulle todong ke’nanga allayaniA’ salaku imang. Lanri anjo upacara minynyaka, iami ke’nanga siagang jari-jarina anta’galaki jama-jamang kaimangnganga."
16Nagaukammi Musa sikontu anjo apa Naparentakanga Batara.
17Jari ri tanggala’ se’rena bulang se’re ri taung makaruana nabokoi bansa Israel pa’rasangang Mesir, nipatabami anjo KemaNa Batara.
18Napadongko’mi Musa sikamma pallanggana, napaentengi sikamma rangka-rangkana, napatabai kayu-kayu tappalanna, siagang napaentengi sikamma bentenna.
19Nampa naka’rang pattongko’na Kemaya siagang pa’rangka’ bageang pantara’na situru’ Naparentakanga Batara.
20Nampa nipantama’ anjo ruaya batu nipannulisi siagang Sampulo ParentaNa Allata’ala ri Patti Parjanjianga. Nampa napataba Musa pa’rangka’na anjo Pattia siagang napantama kayu pa’bulekanga ri pontona.
21Nampa naboli’ anjo Pattia lalang ri Kemaya siagang nagentungi gordeng passimbang ri dallekanna, situru’ parentaNa Batara mae ri ia.
22Nampa napadongko’ Musa mejanga lalang ri Kemaya, ri bageang wara’ pantaranganna kaenga,
23nampa napadongko’ roti nipatalaya irate ri anjo mejanga.
24Napadongko’mi bangkeng lampua lalang ri Kemaya, ri bageang timboro’, assidallekang siagang anjo mejanga,
25nampa naparinra anjo lampu-lampua ri dallekanNa Batara.
26Napadongkoki tampa’ pattunuang dupa bulaenga lalang ri Kemaya, ri dallekanna kaenga,
27nampa natunu dupa bauka situru’ le’baka Naparentakang Batara mae ri Musa.
28Nagentungi Musa gordenga ri pakke’bu’ Kemaya,
29nampa ri dallekanna pakke’buka napadongko’mi tampa’ pakkoro’bangngang untu’ koro’bang nitunua. Irate ri anjo tampa’ pakkoro’bangnganga napassareammi koro’bang nitunua siagang koro’bang pappatalaya.
30Ba’ je’ne’ tambagaya niboli’mi ri alla’na Kemaya siagang tampa’ pakkoro’bangnganga, nampa nabonei je’ne’.
31Musa, Harun siagang ana’-ana’na, nabissaimi limanna siagang bangkenna anjoreng,
32punna antama’ ke’nanga ri KemaNa Batara yareka punna a’reppese’ ke’nanga anjoreng ri tampa’ pakkoro’bangnganga.
33Ri tammulilina anjo Kemaya siagang tampa’ pakkoro’bangnganga napatabai Musa layara’ siagang nagentungi gordenga ri pakke’bu’ lompona paranglakkenga. Jari le’ba’ kabusu’mi anjo jama-jamanga.
34Nampa naummo rammanga antongkoki KemaNa Batara, siagang rassimi anjo Kemaya siagang caya kahaderanNa Batara.
35Lanri kammana anjo takkulleami antama’ Musa ri anjo Kemaya.
36Punna nai’ anjo rammanga battu ri KemaNa Batara, massing nabongkara’mi bansa Israel kemana untu’ a’lette’ mange ri tampa’ maraenga.
37Mingka punna tena nanai’ anjo rammanga, tena todong na’lampa ke’nanga battu ri anjo tampaka.
38Lalang a’la’ba’na a’jappa bansa Israel, tuli niaki Batara ri anjo Kemaya, a’rupa rammang punna allo siagang a’rupa pepe’ punna bangngi.