Alkitab Mobile SABDA
[VER] : [MAKASAR]     [PL]  [PB] 
 <<  Kisah Para Rasul 27 >> 

1Le’ba’mi nitappuki angkanaya musti a’lampa maki’ mange ri Italia. Jari nipassareammi Paulus siagang siapa are tahanang maraenga mae ri Yulius, iamintu perwira tantara Roma nigallaraka "Pasukanna Karaenga".

2Nai’ maki’ ri kappalaka ri Adramitium nampa a’lampa maki’ assombala’. Anjo kappalaka eroki assombala’ mange ri sikamma palabuhang niaka ri daera Asia. Nia’ tongi Aristarkhus angngagangki’ irate ri anjo kappalaka. Anne Aristarkhus tau battu ri Makedonia.

3Ammukona, battu maki’ mange ri Sidon. Anjo Paulus nikatutui bajiki ri Yulius. Nisarei kasampatang Paulus mange angkunjungi agang-aganna sollanna akkulle nisare ri ke’nanga apa-apa naparalluanga Paulus.

4Battu anjoreng ri Sidon nipatulusu’mi assombala’. Mingka lanri niruppaiki’ ri anging, anjoreng maki’ ri birinna pulo Siprus annarrusu’ assombala’, lanri ta’linrungi sike’de’ ri anging anjoreng.

5Le’baki anjo assombala’ maki’ ri tamparang sidallekanga siagang Kilikia na Pamfilia, sa’genta battu mange ri Mira, pa’rasangang Likia.

6Anggappami perwiraya kappala’ battu ri Aleksandria, eroka mange ri Italia. Jari nipalette’ maki’ ri anjo perwiraya mange anjoreng ri kappalaka.

7Pirangallo are sallota sanna’ lansanta assombala’. Sanna’ susata assombala’ nampa akkulle nirapi’ sa’genna kota Knidus. Nampa lanri kodina ija anginga, takkullea maki’ annarrusu’ assombala’ situru’ oloang nitujua uru-uruna. Jari a’lampa timboro’na maki’ Pulo Kreta assombala’, allalo ri Tanjung Salmone, sollanta ta’linrung ri anginga anjoreng.

8Sanna’mi susata assombala’ antulakkangi birinna anjo puloa; sa’genta anrapi’ mange ri se’reang tampa’ niareng Palabuhang Ga’ga, tenaya nabella battu ri kota Lasea.

9Anjo wattua allalomi Allo Lompo Passiamakkanna tu Yahudia. Jai sikalimi wattu tappela’, sa’genna tabajikami nisa’ring wattua assombala’. Jari nipakainga’mi ke’nanga ri Paulus, angkana,

10"Sikamma sari’battangku, turu’ ri panggappaku, lompo sikali bahayana punna annarrusu’ ijaki assombala’. Langgappaki’ karugiang lompo. Teai poro karugiang barang-barang siagang kappala’, mingka manna nyawata akkulle todong tappela’."

11Mingka tappakangangi anjo perwiraya mae ri jurumudia siagang kapiteng kappalaka, na mae ri kananna Paulus.

12Tena memang nabaji’ napammantangi kappala’ anjo palabuhanga punna wattu dinging. Iaminjo saba’na najaiangang ana’-ana’ kappalaka erokangang a’lampaya pole assombala’ ambokoi anjo palabuhanga. Eroki nausahai ke’nanga anrapi’ mange ri Feniks nampa ammantang anjoreng sa’genna allalo wattu dinginga. Feniks, iamintu palabuhang ri Pulo Kreta a’dalle’ mangei ri warakkanna sike’de’ ri tampa’ labuna alloa.

13Anjo wattua battu timboroki anginga siagang lammai nisa’ring battuna. Jari nakana ana’-ana’ kappalaka akkullemi ke’nanga assombala’ pole. Jari assombala’mi ke’nanga antulakkangi birinna Pulo Kreta.

14Mingka tasalloai, battumi anging lompoa — iamintu niarenga anging Battu Timboroka — battu rate ri bontoa,

15antunrungi kappala’na ikambe. Tena sikalimo nikkulle assombala’, anruppai anjo anginga. Jari sa’bara’ mamaki’, nanilappassang mamo ammanyu’ kappalaka nierang ri anging.

16Ri wattunta allalo ri se’reang pulo ca’di, ri timboranna pulo niarenga Kauda, ta’linrung maki’ sike’de’ ri anginga. Anjorenta teaimi sipato’ susata angngurusuki linta’ sikocina kappalaka.

17Le’baki nipanai’ sikocia ri kappalaka, nipakajarre’ tommi kappalaka; nisikko’ siagang nipakaluki otere’. Mallakki’ nianyukang mange anjoreng ri pammantangang ambawaya, iamintu kassi’na Sirtis. Jari nipanaummi sombalaka nampa nilappassang kappalaka ampinawangi anginga.

18Pila’ sanna’mi lompona anginga. Sa’genna ammukona nipela’mi barang-baranga naung ri tamparanga.

19Allo ammukona pole napela’ tommi ana’-ana’ kappalaka pakkakasa’-pakkakasa’na kappalaka naung ri tamparanga.

20Pirangallo aremi sallona tena nakiaccini’ allo siagang bintoeng. Kammayatompa pila’ a’jallo’ tommi anginga. Kala’busanna, tappu’ panrannuang maki’ lasalama’.

21Siapa aremi sallona tena ngaseng nangnganre taua. Jari mangemi Paulus ammenteng ri tangnga-tangngana ke’nanga nampa nakana, "Sikamma sari’battangku! Ka’de’ nupilangngeri kanangku natanibokoia Kreta, tenaja nalanikasia’ ngaseng anne kapanrakanga siagang karugianga.

22Mingka kamma-kamma anne kupala’ dudui pole mae ri kau ngaseng, sollanna nupakalompo ngaseng pa’mai’nu. Tenapa manna sitau battu ri katte lamate. Iaji anne kappalaka bawang latappela’.

23Nasaba’ ri bangngia niaki malaeka’Na Allata’ala battu mae ri nakke, iamintu Allata’ala kusombaya, Allata’ala makoasaya mae ri kalengku.

24Nakana anjo malaekaka, ‘Teako mallakki Paulus! Nasaba’ lamangeko andallekang ri Karaenga ri Roma. Lanri kabajikanNa Allata’ala mae ri kau, nasikontu anne tau nuaganga assombala’, lanipasalama’ ngasengi passabakkang ikau.’

25Lanri kammana minjo, sari’battangku ngaseng, parallui nupakalompo pa’mai’nu! Nasaba’ tappaka’ ri Allata’ala angkanaya laNapa’rupa ngasengi anjo kana le’baka Napabattu mae ri nakke.

26Mingka lanianyukangki’ sallang mange ri biring ri se’reang pulo."

27Ri bangngi makasampulona angngappa’, ammawang-mawang mami kappalaka ri Tamparang Adria. Kira-kira ri wattu lantanna bangngia nakanamo pakkasia’na ana’-ana’ kappalaka angkana a’reppese’mi kappalaka mange ri bontoa.

28Jari naukkuru’mi siagang otere’ nagentungi batu anjo tamparanga. Nania’ tojeng mamo kira-kira patampulo metere’ lantanna anjo tamparanga. Tasalloai naukkuru’mi pole ke’nanga tampa’ nirapika, nania’ mamo tallumpulo metere’ lantanna.

29Malla’mi ke’nanga gassingka tassambangi kappalaka mae ri batu karanga. Jari appanaummi ke’nanga appa’ jangkara’ ri bokona kappalaka. Na’minasamo ke’nanga sollanna linta’mo singara’.

30Ero’mi a’lampa cokko-cokko anjo ana’-ana’ kappalaka ambokoi kappalaka. Napanaummi ke’nanga sikocia, assara-sarai ero’ appanaung jangkara’ battu ri ulunna kappalaka.

31Mingka nakanamo Paulus ri anjo perwiraya siagang sikamma anjo tantara niaka ri kappalaka, angkana, "Punna tammantanga anjo ana’-ana’ kappalaka anrinni ri kappalaka, tena ngaseng nulasalama’ battu ri anne bahayaya."

32Jari mangemi tantaraya angkereki otere’na anjo sikocia, sa’genna ammanyu’ anjo sikocia.

33Ri wattunna a’birimmo ammumbamo alloa, nasuromi Paulus angnganre ngaseng taua. Nakana Paulus, "Sampulomi anggappa’ allonna tuli attayang jako bawang lalang malla’nu, nanutangnganrea apa-apa.

34Kupakaingakko sollannu angnganre sike’de’. Anne untu’ kabajikannu ngaseng, sollannu anggappa ammotere’ kagassingang. Nasaba’ lasalama’ ngasengko nutangngapa-apa."

35Le’baki akkana kamma Paulus, angngallemi roti nampa appala’ sukkuru’ mae ri Batara ri dallekanna ngaseng ke’nanga. Nampa napa’bage-bageang anjo rotia, nanakanre anjo rotia.

36A’jari lompo ngasemmi ammotere’ sumanga’na ke’nanga, siagang massing angnganre tommi ke’nanga.

37Nia’ ruambilangngang tujupulo angngannang jaina anjo taua ri kappalaka.

38Le’baki angnganre ngaseng ke’nanga, napela’mi gandung niaka naerang anjo kappalaka naung ri tamparanga, sollanna a’jari ringang anjo kappalaka.

39Ri wattunna singara’mo, accini’mi bonto ana’-ana’ kappalaka, mingka tanaassengai ke’nanga angkana apa arenna anjo bontoa. Nia’ nacini’ ke’nanga bonto ca’di siagang birinna. Jari ero’mi ke’nanga angngerangi kappalaka mange anjoreng punna akkulleja.

40Jari nipolommi otere’na ngaseng jangkaraka, nampa nilappassang tallang naung ri tamparanga. Nampa nalappassang ngaseng todong ke’nanga passikko’ calagana anjo kappalaka. Le’baki anjo napanai’mi ke’nanga sombalaka ri ulunna kappalaka sollanna nierang ri anging kappalaka mange anjoreng ri birinna bontoa.

41Mingka ta’lappoi kappalaka mae ri kassi’ rawanganna anjo tamparanga. Tassangkala’mi ulunna kappalaka sa’genna takkulleami a’gio’. Na ia bokona kappalaka ancuru’mi nitunrung ri bombang lompo.

42Ero’mi anjo tantaraya ri kappalaka ambuno ngasengi sikamma tunitahanga, lanri nakamallakkangi angkana gassingka nia’ tunitahang a’lange mange ri bontoa nampa lari.

43Mingka nipisangkai ke’nanga ri perwiraya, lanri ero’na napasalama’ Paulus. Nasuro ngasemmi tau akkullea a’lange a’lumpa’ rolong naung nampa a’lange mange ri birinna bontoa;

44ia maraenganga amminawang bokoi anna’gala’ ri papang-papanga, yareka apa-apa maraenganna anjo kappala’ ancurukamo. Kammaminjo bateta sa’genta akkulle salama’ ngaseng battu mange ri bontoa.


  Share Facebook  |  Share Twitter

Download Audio MP3 (Kisah Para Rasul 27):
Mobile (Low Quality) - CD (High Quality)

 <<  Kisah Para Rasul 27 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran