Dual Panel1Appiali Batara Kaminang Koasaya, "LaKukiringi battu tunisuroKu untu’ ampasadiai oloangKu. NaKuti’ring lania’ battu, iNakke Batara nuboyaya, mae ri BallakKu. Labattui anjo suroKu nukanakkukanga na napa’la’bang parjanjiangKu."
2Mingka inai lakkulle attahang ri allo kabattuanNa Batara ampa’nyatai KalenNa? Nasaba’ sanrapangi pepe’na pade’de’ bulaeng ti’no’, siagang sanrapangi sabung tukang pasassaya.
3Battu untu’ angngadeli, sanrapang tau antangkasiai siagang ampakati’noki peraka. Sanrapangi pade’de’ bulaeng ti’no’ siagang pade’de’ pera’ ti’no’, kamma tomminjo tunisuroNa Batara laNatangkasi sikamma imanga sollanna akkulle Napassareang koro’bang-koro’banga situru’ cara Nakaerokia Batara.
4Na sangkamma riolo lamangngellaimi Batara mae ri koro’bang-koro’bang nipassareanga mae ri Ia ri umma’ Yehuda siagang Yerusalem.
5Nakana Batara Kaminang Koasaya, "LabattuA’ mae ri kau ngaseng untu’ angngadeli. LabattuA’ linta’ anjari sa’bi mae ri pabale’-bale’ mataya, sikamma tau a’gau’ bawanga, pasa’bi balle-ballea, a’gau’ jekkonga ansarei gajina tau angnganre gajia, tau anjallakkangai sikamma jandaya, ana’-ana’ kukanga, siagang bansa maraeng battua annompang, mae ri sikontu tau tenaya napakala’birikKa’."
6"INakkemi Batara, siagang tale’baKa’ amminra. Lanri kammana, ikau ngaseng jari-jarina Yakub, tena nipanrakiko.
7Sangkamma boe-boenu riolo, ammengka ngaseng mako battu ri hukkung-hukkungKu siagang tena numajarre’ anggaukangi. Ammotere’ mako mae ri Nakke, na Kuammotere’ todong mae ri kau. Mingka akkuta’nangko angkana, ‘Apa musti nagaukang ikambe untu’ ammotere’ mae ri Katte?’
8Kamma-kamma anne akkuta’nanga’ mae ri kau: Maka akkullei rupataua antipui Allata’ala? Tantu tena nakkulle. Mingka kamma tonji annipunu. Akkuta’nangko angkana, ‘Antekamma batena annipu ikambe?’ PialingKu: Lalang a’bayara’nu bage sampulo battu ri panggappannu siagang lalang assarenu passare.
9Sikontu bansaya natipu ngasengA’, jari nataba ngasengko pacalla.
10Erang ngasengi bage sampulona panggappannu mange ri BallakKu sollanna nia’ kanre alla’bi-la’bi anjoreng. So’riMa’, nalanucini’ angkanaya Kusungkei sikamma pakke’bu’na surugaya siagang Kupila’juiko kabajikang.
11Tena naKupa’biangi olo’-oloka ampanraki lamung-lamunnu; poko’-poko’ anggoro’nu laroasaki rapponna.
12Nalanikanamako ri sikontu bansaya tau mate’ne, nasaba’ pa’rasangannu la’jari tampa’ bajiki nipammantangngi."
13Nakana Batara, "Teai sipato’ bateKu nuhina lalang ri kana-kanannu." "Mingka akkuta’nangko angkana, ‘Apa napau ikambe ri passabakkang iKatte?’
14Nukana ngaseng, ‘Tena matu-matunna taua anynyomba ri Allata’ala. Apa matu-matunna nigaukang kawajibanta mae ri Batara Kaminang Koasaya, yareka nipappicinikang mae ri Ia angkanaya assesse’ lalang maki’ ri kasalanta?
15Mata kalenta anciniki antekamma mate’nena tau tampoa. Tena napila’ salewangang bawang tau ja’dalaka, mingka punna naso’ri kasa’baranNa Allata’ala lalang kaja’dallanna ke’nanga, tena tonja namangngapa-apa.’"
16Nampa sikamma tau mallaka ri Batara massing sipa’bicarami para ia. Napilangngeri siagang Naparhatikangi Batara apa napaua ke’nanga. Sikamma tau mappakalompoa ri Ia siagang tau mallaka ri Ia, nitulisiki arenna lalang ri se’reang kitta’ catatang niaka ri dallekanna.
17Nakana Batara Kaminang Koasaya, "La’jari ke’nanga ummakKu. Ri wattungKu angngalle tindakang, la’jari ke’nanga umma’ nisayangKu. Lakukamaseangi ke’nanga, rapang se’rea mangge ansayangi ana’ mappakalompoa ri kalenna.
18Lanaciniki pole ummakKu passimmaraenna dalle’na tau bajika siagang tau ja’dalaka, tau anynyombaya ri Nakke siagang tau tenaya nanynyomba ri Nakke."