Dual Panel1Untu’ pamimping pakelong. Battu ri Daud, atanNa Batara. (36-2) A’bicarai dosaya ri ati mailalanna tu ja’dalaka, tena sikali malla’na mae ri Allata’ala.
2(36-3) Nakanai kalenna sanna’ heba’na, sa’genna tanaassenga kasalanna, siagang tena nakabirisi.
3(36-4) Kana-kananna ja’dalaki siagang rassi balle-balle, tenamo nagaukangi apa bajika siagang annabaya.
4(36-5) Ri katinroanNa narancana kaja’dallanga; tena baji’ apa nagaukanga, ja’dalaka tanatollakai.
5(36-6) O, Batara, pangngamaseanTa santinggi langika, tamamminraTa sa’genna rammanga.
6(36-7) KabajikanTa ammentengi nai’ santinggi monconga, kaadelanTa sangkamma lantanna tamparang lompoa; Kiparakai rupataua siagang olo’-oloka, o, Batara.
7(36-8) Tamaka lompona anggaranna pangngamaseanTa, o, Allata’ala, a’la’langi rupataua lalang ri la’lanna ka’nyitTa.
8(36-9) Sukkuki ke’nanga ri kanre alla’bi-la’bia ri BallatTa, siagang inungang battua ri binangaTa appakanyamangi.
9(36-10) IKatte kabattuanna katallassanna sikontu apa attallasaka, lalang singaratTa accini’ ikambe singara’.
10(36-11) Poro tulusu’ Kikamaseangi tu mangngassenga ri Katte, siagang a’gau’ baji’ mae ri tu lambusu’ pa’maika.
11(36-12) TeaKi’ balang parekangia’ nibakkai ri tu borroa, yareka nibongka ri tu ja’dalaka.
12(36-13) Ciniki, tu’guru’mi tau anggaukangai kaja’dallanga, tattappasa’mi ke’nanga takkullea ambangung poleang.