Alkitab Mobile SABDA
[VER] : [MAKASAR]     [PL]  [PB] 
 <<  Mazmur 38 >> 

1Pammujina Daud ri wattu assarena koro’bang pappakainga’. (38-2) O, Batara, teaKi’ hukkungia’ lalang kalarroanTa, teaKi’ sessaia’ lalang kalarroanTa.

2(38-3) Annarrusuki ana’ panaTa ambokkaki kalengku, battalaki kusa’ring limanTa anjallakkanga’.

3(38-4) Garring lompoa’ lanri kalarroanTa; tenamo baji’ ri tubuku lanri dosaku.

4(38-5) Tallanga’ lalang ri a’ba kasalangku, teai sipato’ battala’na eranganna dosaku.

5(38-6) A’nanai bokka’-bokkakku siagang a’rasa bottoki, lanri dongo’na panggaukangku.

6(38-7) A’dundua’ siagang a’bukkuka’, sila’busu’ alloa susa siagang si’na.

7(38-8) Nitunui ri rammusu’ tubuku, tenamo baji’ ri batangkalengku.

8(38-9) Ancuru’ma’ siagang tenamo kagassingangku, akkunrarenga’ lanri lussa’na pa’maikku.

9(38-10) O, Batara, Kiassengi sikontu apa kukaerokia, tena nataccokko kunrarengku mae ri Katte.

10(38-11) A’dumba’-dumbaki barambangku, tenamo kagassingangku, tenamo nabaji’ paccinikku.

11(38-12) A’lili ngasemmi bela-belaku lanri garringku, ba’lalo bija pammanakangku bella ngasemmi ri nakke.

12(38-13) Tau eroka ambunoa’ natannangngia’ sikko’; tau eroka ancilakaia’ nagarattaka’ lanatumpasa’.

13(38-14) Mingka sanrapanga’ tau tongolo’ tamallangngera, sanrapanga’ tau pepe tamakkanaya.

14(38-15) Tojeng, sanrapanga’ tau tamallangngere’, lanri kammanami natena kugeakki.

15(38-16) Mingka manrannuanga’ ri Katte, o, Batara, na iKatte, Batara Allata’alaku, Kipialia’.

16(38-17) TeaKi’ balang parekangi musungku sannang ancinika’ susa, teaKi’ balang parekangi ke’nanga akkana borro punna ta’lengga’.

17(38-18) Punna a’biringa’ tu’guru’, tulusu’ pa’risi’na kusa’ring.

18(38-19) Kumangakui dosa-dosaku; lussaki pa’maikku annawa-nawai kasalangku.

19(38-20) Jai siagang kassaki sikamma tau ambalianga’, birisiki ke’nanga anciniki bateku attallasa’.

20(38-21) Tau ambalasakai kabajikanga siagang kaja’dallanga nabalianga’ lanri kugaukanna kabajikanga.

21(38-22) O, Batara, teaKi’ bokoia’, teaKi’ bellai ri nakke, o, Batara.

22(38-23) BattuKi’ linta’ antulunga’, O, Batara, Tumappasalamakku.


  Share Facebook  |  Share Twitter

 <<  Mazmur 38 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel