1Pammujina golongang Korah. (48-2) Tojeng, malompoi Batara siagang sanna’ nipujina ri kota Allata’alata, ri bulu’ matangkasaka.
2(48-3) Sion, bulu’Na Allata’ala, ammenteng sassa’ sanna’ ga’gana kotaNa Karaeng Malompoa ampakarannui sikontu linoa.
3(48-4) Allata’ala ammantangi ri kamara’-kamara’ Balla’ LompoNa, ma’nassa KalenNa tonji anjagai.
4(48-5) Ciniki, a’rappungangi karaeng-karaenga; battui ke’nanga ero’ ambunduki.
5(48-6) Mingka nacini’na anjo buluka, lannasa’mi ke’nanga; gegere’mi ke’nanga nampa lari a’lingu-lingu.
6(48-7) Anjoreng annekkereki ke’nanga napakamma malla’ siagang pa’risi’, sanrapang baine eroka ammana’,
7(48-8) sanrapang kappala’ je’ne’ ancuruka natuju bombang lompo.
8(48-9) Sangkamma apa le’baka nilangngere’, kamma-kamma anne nicini’mi, ri kotaNa Batara Kaminang Makoasaya. Anjo kotaya, kotaNa Allata’alata, Najagai untu’ satunggu-tungguna.
9(48-10) Lalang ri BallatTa, nanawa-nawai ikambe pangngamaseanTa, o, Allata’ala.
10(48-11) Masahoroki arenTa siagang nipuji ri sikontu linoa, ammarentaKi’ siagang adele’.
11(48-12) Boli’mi kamma ra’ya’ Sion siagang Yehuda akkio’ rannu, lanri Kihukkungi balinna ke’nanga.
12(48-13) Inroimi Sion, nujappai akkuliling, siagang rekemmi menarana.
13(48-14) Parhatikangi tembo’na, paressai tembo’ pattahanganna, sollanna akkulle nucarita mae ri turungannu:
14(48-15) Angkana, "Iami Allata’ala, Allata’alata satunggu-tungguna, Iami lampimpingki’ sa’genna mannannungang."