1Untu’ pamimping pakelong. Nirurungang ri kacapi. Kelong pangngajara’na Daud, (54-2) ri wattunna battu tu Zifi mae ri Saul ampaui angkana, "Niaki Daud accokko ri kambe." (54-3) O, Allata’ala, pasalamaka’ lanri koasaTa, sarea’ kaadelang lanri kagassinganTa.
2(54-4) Kipilangngeri pappalakku, o, Allata’ala, Kiparhatikang laloi kana-kanangku.
3(54-5) Saba’ bansa maraenga ambangummi ero’ ambundukia’, eroki tau tampoa ambunoa’, tena najampangi ke’nanga Allata’ala.
4(54-6) Mingka Allata’alami pannulungku; Batara Tumappatojengku.
5(54-7) LaNahukkungi musungku siagang kaja’dallang kalenna ke’nanga, laNapossoki ke’nanga lanri tamamminrayai mae ri nakke.
6(54-8) Rellai pa’maikku assare koro’bang mae ri Katte, siagang appala’ sukkuru’ ri Katte lanri bajitTa, o, Batara.
7(54-9) Le’ba’ma’ Kilappassang battu ri sikontu kaja’dallangku, siagang kucini’mi musungku nibeta.