1Untu’ pamimping pakelonga. Nirurungangi ri kacapi. Situruki lagu makasagantujua. Pammujina Daud. (6-2) O, Batara, teaKi’ kapallakkia’ lalang pangngalarroinTa, teaKi’ hukkungia’ lalang kalussakkangku.
2(6-3) Kikamaseanga’, o Batara, lanri tenamo kagassingangku, Kipakajarreka’ lanri dodongku.
3(6-4) Tamaka linguna atingku; sa’ge kerea’ wattu laKibokoi, o Batara?
4(6-5) Battu poleang maKi’, Batara, naKilappassanga’, Kipasalamaka’ lanri pangngamaseanTa.
5(6-6) Saba’ lalang ri lino kamateang taniu’rangia maKi’; tenamo tau mammuji ri Katte lalang linona tu matea.
6(6-7) Posoa’ na kudodong akkunrareng; bangngi-bangngi ammatti’ je’ne’ matangku ambasai tampa’ katinroangku.
7(6-8) Tabajikami paccinikku napakamma si’na nanremeng-remeng lanri musu-musungku.
8(6-9) Bella ngasengko, he ikau tu ja’dalaka, saba’ Nalangngere’mi Batara karrukku.
9(6-10) Napilangngeri Batara pappalakku na natarima sambayangku.
10(6-11) Sikontu musungku lata’bangkai na siri’-siri’ nammunduru’ linta’ ammakkala’ kacci.